Keysi Fighting Method
Keysi Fighting Method (KFM, Métodu de Combate de Keysi) ye un métodu de defensa personal basáu nos instintos naturales de llucha y en delles téuniques de llucha caleyera, desarrolláu por Justo Diéguez Serrano (col nomatu de “Keysi”) dende la so esperiencia n’engarraes na cai. El sistema foi fundáu cola aida d'Andy Norman.[1] Dambos fundadores, Justo Diéguez y Andy Norman, son instructores certificaos de Jeet Kune Do por Dan Inosanto.[2] El Keysi Fighting Method fíxose famosu desque s’usara nes coreografíes de llucha de les películes Batman Begins y la so derivada, El Caballeru Escuru.
| Tamién | KFM |
|---|---|
| Enfoque | Sistema híbridu, enfocáu a la defensa personal |
| País d'orixe | España |
| Fundador | Justo Diéguez Serrano, Andy Norman |
| Paternidá | Conceutos de Jeet Kune Do y análisis de la llucha caleyera |
| Deporte olímpicu | Non |
| Sitiu oficial | http://www.keysikfm.com/ |
 | |
Carauterístiques
editarEl KFM, creáu a primeros de los años 1980, nun ye daqué peracabao, sinón que ta siempre nun estáu d'evolución constante.[3]
Fai usu de les distintes distancies d'ataque, con o ensin armes. La marca de fábrica del KFM ye’l pensador y l'ataque del pensador (pensataq), qu'emplega una postura defensiva perfuerte pa protexer la parte más preciosa del cuerpu, la cabeza, y destruye y busca finar al adversariu usando golpes en toles distancies: puñetazos direutos, puños “martiellu”, pataes, rodiyazos, cabezaos, y los agudos coldazos, nes llinies alta, media y baxa del contrariu.
De la qu'usa’l pensador, el lluchador pon entrambes manes sobre la cabeza protexéndola per aciu de movimientos circulares d'antebrazos y coldos. El pensador emplega un sistema de "ventanes" demientres estos movimientos rápidos y fluyíos pa tener controláu al adversariu. Esti sistema permite al lluchador protexer la cara y la cabeza al tiempu que caltién al contrariu a la vista.
Al aviesu de munches artes marciales, el KFM tiende a metese nuna distancia percurtia metanos el combate. Dende la defensa del pensador llánzase de cutiu una restrayada de contrataques a oxetivos vitales (como’l bíceps, reñones o plexu solar). El KFM tamién se carauteriza por pescanciar cómo les persones avecen movese o atacar nun combate, estudiando cómo, de la que ye golpiáu, el cuerpu del oponente se mueve dexando albentestate nuevos oxetivos.
Otru aspeutu del KFM ye cómo s’enfrenta en "360 graos" a ataques de múltiples atacantes tando de pie, de rodiyes, sentáu o echáu. Parte de la filosofía del KFM ye tamién tracamundiar los términos "depredador y presa", onde la posible víctima conviértese en depredador y los posibles atacantes en presa.
La mayoría de les escueles de KFM tán n’Europa, pero yá se fixeron seminarios nos Estaos Xuníos, donde hai actualmente clases en Nueva York, Texas, Georgia, Maryland, Delaware y Orlando, Florida. Tamién ta escomenzando a espardese per Australia, con escueles de momentu en Perth, Brisbane y Canberra.
Na cultura popular
editar- El KFM apaez na película Batman Begins como l'estilu de llucha de Batman dempués de que lu amosara a los coordinadores d'especialistes el campeón mundial de Jujutsu Buster Reeves, que yera’l doble de Christian Bale nes escenes d'aición de la película.[4][5] Vuelve a usase como l'estilu de llucha principal de Batman na siguiente película, El Caballeru Escuru.[6][7][8]
- Na película Misión Imposible III, Tom Cruise usa dellos movimientos de KFM.
Referencies
editar- ↑ «www.keysikfm.com History». Archiváu dende l'orixinal, el 2010-07-12.
- ↑ inosanto.com
- ↑ «www.keysikfm.com». Archiváu dende l'orixinal, el 2010-07-12.
- ↑ Telegraph.co.uk DVD review
- ↑ Méntase nel documental "Shaping Mind and Body" del DVD Batman Begins Deluxe Edition.
- ↑ Christian's killer Keysi training ALISON MALONEY 11 Oct 2007
- ↑ «Shaping Mind & Body». Archiváu dende l'orixinal, el 2007-10-11.
- ↑ Keysi Fighting Method
External links
editar- Páxina oficial de Keysi Fighting Method
- Notes de producción de Batman Begins a respeutive’l Keysi y por qué s’usó na película
- Videu
Datos: Q977591
