Lleis Fundamentales
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Conócense como Lleis Fundamentales del Reinu al conxuntu d'ocho lleis qu'organizaben los poderes del Estáu demientres el réxime del Xeneral Franco. Más que d'una constitución, tratábase d'una carta dada, puesto que nun fueron ellaboraes nin aprobaes por representantes del pueblu, sinón na voluntá autoritaria d'un dictador que llegara al poder como consecuencia de la Guerra Civil Española del 1936-1939.
Les Lleis Fundamentales fueron:
- Fueru del Trabayu de 1938. Recibe influyencia de la Carta di Lavoro. Regula la vida llaboral y económica. Establécense llendes pa la xornada llaboral o les retribuciones mínimes, pero toes estes concesiones taben supeditaes al interés de la nación.
- Llei Constitutiva de les Cortes de 1942. Ellabórase pola perspeutiva de la victoria aliada. Créense cortes como instrumentu de collaboración y autolimitación, pa tresnar y ellaborar les lleis.
- Fueru de los Españoles de 1945. Afítense los derechos y deberes de los españoles.
- Llei del Referendu Nacional de 1945. Establézse l'usu del referendu p'asuntos importantes. La Llei de Socesión na Xefatura del Estáu fai obligatoriu'l referendu pa modificar les Lleis Fundamentales.
- Llei de Socesión na Xefatura del Estáu de 1946. Regula la socesión. España configúrase como un reinu. Franco queda como Xefe d'Estáu vitaliciu. Créase'l Conseyu del Reinu y el Conseyu de Rexencia.
- Llei de Principios del Movimientu Nacional de 1958. Establez unos principios rectores del ordenamientu xurídicu franquista.
- Llei Orgánica del Estáu de 1967. Enumbérense los fines del Estáu, afítense los poderes del xefe del Estáu y declárase la so responsabilidá política.
- Llei pa la Reforma Política de 1976.
Esta última llei, aprobada pol Gobiernu d'Adolfo Suárez, foi la ferramienta xurídica que permitió entamar la Transición española, ensin romper la cadarma del Estáu. La Llei pa la Reforma Política foi sometida a referendu el 15 d'avientu de 1976 obteniendo la so aprobación.
Les Lleis fundamentales fueron abolíes pola Constitución Española de 1978.
Ver tamién
editar
Referencies
editarEnllaces esternos
editar
Wikimedia Commons tien conteníu multimedia tocante a Lleis Fundamentales.
Datos: Q3049377
