Llista superciliar

La llista superciliar ye una franxa que presenten marcada delles aves nel plumaxe de la cabeza. Trátase d'una banda de grosez variable, qu'empieza na base del picu, va percima del güeyu y per debaxo del pileu que termina na parte posterior de la cabeza. Tamién la conoz como ceya. Estrémase de les llistes loral y ocular porque van al mesmu altor que los güeyos, per delantre y per darrera respeutivamente. Cuando la llinia ta presente solo percima del lorum y non continua per darrera del güeyu denómase llista supraloral.

La llista superciliar atópase sobre los güeyos.

El color, la forma, el llargor y otres carauterístiques de la llista superciliar son útiles pa la identificación de les aves. Por casu, la llista superciliar del mosquiteru aveséu, úsase pa estremalu del mui asemeyáu mosquiteru de Schwarz. La llista superciliar del mosquiteru aveséu ye ablancazada, estrecha y con una forma bien definida delantre del güeyu y que se va ampliando y escureciendo a midida que va escontra tras, ente que la del mosquiteru de Schwarz ye amarellentada y más ancha na parte delantera faciéndose más estrecha y ablancazada a midida que va escontra tras. La franxa superciliar del Parkesia noveboracensis estrémase sutilmente del so pariente próximu (y de plumaxe asemeyáu) Parkesia_motacilla. El primeru tien una franxa superciliar bicolor que s'amplía significativamente darrera del güeyu, ente que'l segundu tienla de color crema uniforme y ye casi del mesmu anchor a entrambos llaos del güeyu, o daqué más estrechu darrera del güeyu.

• 
  La calambiya nortiza presenta una prominente llista superciliar blanca.
• 
  El Eurypyga helias tien una llista superciliar blanca llarga y definida.
• 
  La Lymnocryptes minimus tien la llista superciliar estremada per una llinia escura.
• 
  Nel Phylloscopus inornatus enllárgase hasta la nuca.

Bibliografía

• (2006) Field Guide to the Birds of North America. Washington, D.C.: National Geographic Society. ISBN 0-7922-5314-0.
• Hayman, Peter; Marchant, John; Prater, Tony (1986) Shorebirds. Breckenham, UK: Croom Helm. ISBN 0-7099-2034-2.

• Datos: Q331315