Luis Menéndez Alonso

Luis Menéndez Alonso, conocíu como Lumen (12 de payares de 1892 – 1937), foi un escritor y bibliotecariu español, d'ideoloxía krausista, fundador de dellos proyeutos d'espardimientu cultural, ente ellos la Biblioteca Popular Circulante d'Avilés (depués Biblioteca Pública Municipal “Bances Candamo”).

Luis Menéndez Alonso
Vida
Nacimientu	12 de payares de 1892
Nacionalidá	España
Muerte	1937 (44/45 años)
Estudios
Llingües falaes	castellanu
Oficiu	periodista, bibliotecariu

Biografía

Nació n'Avilés el 12 de payares de 1892, fíu de Bernardo Menéndez Díaz y Manuela Alonso Álvarez. Aficionáu a la lliteratura dende neñu, publicó la so primer collaboración periodística en El Diariu d'Avilés en 1911. En 1912 casóse con María del Carmen Díaz Gutiérrez y frutu d'esti matrimoniu nacieron seis fíos.

Mientres trabayaba como oficial de peluquería, siguió publicando contribuciones en distintos periódicos y revistes locales y provinciales, algamando ciertu prestíu como escritor. Tamién publicó artículos en revistes hispanoamericanes y llogró un premiu nos Xuegos Florales de Xàtiva.

En 1918, xunto con un grupu d'amigos, escurrió crear una biblioteca que dexara'l préstamu a casa. Naz asina la Biblioteca Popular Circulante, qu'empezó a funcionar en 1920 cola cesión d'un local per parte del Conceyu, una subvención de 500 pesetes añales y el nomamientu de Lumen como bibliotecariu.

Aportó a direutor de les revistes La Batelera en 1923 y El Bollu en 1924, lo mesmo que de Avilés Gráficu, publicación fundada por él y qu'apaeció per primer vegada en 1925. En 1926 gana per oposición una plaza na Secretaría del Conceyu d'Avilés.

Siguiendo los ideales krausistes, participó en múltiples actividaes rellacionaes cola estensión de la enseñanza, la cultura y l'arte al pueblu, convencíu de qu'asina se contribuyía a la modernización y progresu de la sociedá.

Interesáu tamién poles artes plástiques, collaboró viviegamente na so dinamización n'Avilés, entamando numberoses esposiciones de mozos artistes avilesinos y participando na creación de la Sociedá d'Amigos del Arte d'Avilés, que'l so fin yera fomentar l'arte, ayudar a los artistes y crear un muséu local.

Foi militante d'Izquierda Republicana, partíu políticu fundáu por Manuel Azaña en 1934. Mientres la Guerra Civil Española, foi encausáu por rebelión” y, tres la celebración d'un xuiciu sumarísimu, condergáu a muerte. El 12 de payares de 1937, precisamente'l día que cumplía 45 años, foi fusiláu por fuercies del exércitu subleváu, y como n'otros munchos casos borrada temporalmente la so memoria.

Obra

• Amás de los sos artículos en revistes y periódicos, de los que nun esiste una escoyeta, collaboró con Constantino Suárez Fernández, “Españolín”, na ellaboración de la so obra Escritores y artistes asturianos: índiz bio-bibliográficu (enllaz rotu disponible n'Internet Archive; ver l'historial y la última versión)., un diccionariu en siete volúmenes qu'ufierta una completa referencia bio-bibliográfica de la lliteratura asturiana.
• Mirando escontra'l cume, antoloxía de la so obra en versu publicada per Mundu Llatín en 1925 y prologada por José Francés.
• La hora de los imposibles, novela inédita.

Reconocencies

Pasio de Luis Menéndez Alonso "Lumen" nel Parque de La Ferrera, Avilés.

En 1925, la intelectualidá avilesina tributó-y un homenaxe presidíu por José Francés y José Manuel Pedregal. En 1980, el Conceyu en plenu alcordó por unanimidá poner el so nome a unu de los principales paseos del Parque de La Ferrera, que va dende la cai Rivero hasta l'edificiu de La Noria. El 21 d'abril de 2006, sol títulu Lumen vuelve a casa, instalóse, na Casa Municipal de Cultura d'Avilés, un bustu de bronce del escritor donáu pola so familia, obra del escultor avilesín Ramón Caso de los Cobos.

Referencies

• Datos: Q23942910
• Multimedia: Luis Menéndez Alonso