Mal holandés
Llámase mal holandés, n'economía, a la aparente rellación que hai ente l'aumentu de la esplotación de los recursos naturales d'un país y el decayimientu de l'actividá del sector industrial (o de l'agricultura). El mecanismu que lo esplica ye que l'aumentu d'ingresos provenientes de la venta de los recursos naturales (o la llegada al país de dineru procedente d'otros países en forma d'axudes) fará que la moneda del país seya más fuerte en comparanza cola de los otros países. Esto fai que les otres esportaciones del país, manufactures o productos agrícolas, resúlten-yos más caros a los compradores d'otros países, lo que fai qu'estos sectores vuélvanse menos competitivos. Magar que'l conceptu aveza a aplicase a países nos que se descubren nuevos recursos naturales, puede referise a cualesquier procesu de desarrollu económicu que tenga como resultáu la llegada a un país de grandes cantidaes de divisa foriata, seya por una xubida importante del precio de dalgún recurso natural o pola entrada de perres d'otros países, seya pa inversión económica direuta o como axuda al desarrollu[1]
El términu foi acuñáu en 1977 pola revista The Economist pa describir el decayimientu del sector manufactureru holandés que siguió al descubrimientu d'un gran xacimientu de gas natural en 1959[2]
Referencies
editar- ↑ Ebrahim-zadeh, Christine. "Back to Basics – Dutch Disease: Too much wealth managed unwisely". Finance and Development (Volumen 40, númberu 1, marzu 2003), revista trimestral del Fondu Monetariu Internacional.
- ↑ The Dutch Disease. The Economist, 26 de payares de 1977, páxs. 82-83.