Normes ortográfiques del asturianu

(Redirixío dende Normes Ortográfiques)

Les Normes ortográfiques del asturianu ye la codificación normativizadora primera y básica del asturianu afitada pola máxima institución llingüística asturiana: l'Academia de la Llingua Asturiana. Foi'l primer llabor normativu que fizo l'Academia, presentando unes primeres normes ortográfiques el 22 de xineru de 1981,[1] siendo la primer obra asoleyada de toles sos publicaciones.

Normes ortográfiques del asturianu
obra lliteraria
Datos
Autor Academia de la Llingua Asturiana
Fecha 22 xineru 1981
Llingua de la obra asturianu
Cambiar los datos en Wikidata

Historia y desendolcu editar

Enantes d'esti primer llabor normativu, l'asturianu contaba dende los años setenta del sieglu XX con dos posibles "normes", les de Conceyu Bable o les del Conceyu d'Asturies de Madrid.[2] Cola creación de l'Academia, publícase en 1981 una primera ortografía institucionalizada, sol nome de Normes ortográfiques y entamos de normalización, que van ser l'entamu de la norma estándar actual pal asturianu. D'esta primer edición llama l'atención el desaniciu dafechu de los denomaos «grupos consonánticos cultos» de manera xeneral (dicionariu, lletura, istante, oservación en cuentes de les formes actuales diccionariu, llectura, instante, observación), y la representación escrita de la pérdiga de la «-r» final del infinitivu enantes del artículu («...propónse l'Academia amestá los estremaos criterios...»); y sobremanera, la primer apaición na escritura asturiana de los dígrafos ⟨ḷḷ⟩ y ⟨[3].

En marzu de 1985 publícase la segunda edición de les Normes ortográfiques y entamos normativos,[4] y dos años depués el primer «anexu», Amestadures I (1987), y al añu siguiente'l segundu d'ellos, l'Amestadures II (1988), que desarrollen les regles básiques presentaes nes dos primeres ediciones. En 1989 asoléyase la tercer edición, sol mesmu títulu, onde tán yá recoyíes esos anovamientos, ente los que destaca la recuperación na escritura de los grupos consonánticos cultos y, na reimpresión de 1990, el desaniciu de l'apostrofación ⟨'n⟩ de la preposición en.[5]

Nel añu 1989 publica tamién l'Academia'l so «diccionariu» verbal Conxugación de verbos asturianos,[6] que s'axuntará coles Normes nun únicu volume dende la cuarta edición de 1993, sol nome de Normes ortográfiques y conxugación de verbos y que va ser el formatu definitivu dende entóncenes pa les Normes.[7]

Cola publicación en 1998 de la Gramática de la Llingua Asturiana, van surdir dalgunes novedaes y ameyoramientos na normativa ortográfica, que van tar recoyíos depués tamién na quinta edición, agora col nome cenciellu de Normes ortográfiques; destaquen l'apaición de los dígrafos ⟨ts⟩ y ⟨yy⟩, y l'enderechamientu de la ortografía con «-o» final nos alverbios y numberales, amás d'enantar l'apartáu sobro los grupos consonánticos.[8] Publícase a finales del añu 2000, depués del asoleyamientu del DALLA. Va tener dos ediciones posteriores, la sesta en 2005,[9] y la séptima en 2012,[10] que nun van ser otra cosa qu'una reimpresión ensin nengún cambéu bultable na normativa ortográfica.

En 2021 edítase la octava edición, cola novedá d'incluyir y utilizar l'Alfabetu Fonéticu Internacional pa trescribir los soníos del asturianu (hasta la versión anterior, usábense solo los signos fonéticos de la Revista de Filología Española), y la igualación de les grafíes «l.l» y «h.» a «ḷḷ» y «», dexando de ser una simple solución gráfica por dificultá tipográfica n'escribiles.[11]

Enllaces esternos editar

Referencies editar

  1. [1] Lletres Asturianes 1, páxina 61. Academia de la Llingua Asturiana, Uviéu, mayu de 1981.
  2. Ramón d'Andrés, Cuestiones d'asturianu normativu. Volume II; páx. 51 y ss. Publicaciones Ámbitu, Uviéu, 2002. ISBN 84-95640-28-7.
  3. Ramón d'Andrés (2021). Diccionariu de consultes llingüístiques del asturianu (n'asturianu). Uviéu: Ediciones Trabe.
  4. Lletres Asturianes 15. Apéndiz. Academia de la Llingua Asturiana, Uviéu, mayu de 1985.
  5. Normes ortográfiques y entamos normativos; 3ª edición correxida. Academia de la Llingua Asturiana, Uviéu, 1990. ISBN 84-86936-13-6.
  6. Conxugación de verbos asturianos. Academia de la Llingua Asturiana, Uviéu, 1989. ISBN 84-86936-08-X.
  7. Normes ortográfiques y conxugación de verbos; 4ª edición revisada. Academia de la Llingua Asturiana, Uviéu, 1993. ISBN 84-86936-95-0.
  8. Normes ortográfiques; 5ª edición. Academia de la Llingua Asturiana, Uviéu, 2000. ISBN 84-8168-211-X.
  9. Normes ortográfiques; 6ª edición revisada. Academia de la Llingua Asturiana, Uviéu, 2005. ISBN 84-8168-394-9.
  10. Normes ortográfiques; 7ª edición revisada. Academia de la Llingua Asturiana, Uviéu, 2012. ISBN 978-84-8168-532-9.
  11. Normes ortográfiques; 8ª edición revisada. Academia de la Llingua Asturiana, Uviéu, 2021. ISBN 978-84-8168-572-5.