Abrir el menú principal

Oficina Quebequesa de la Llingua Francesa

Office québécois de la langue française edificiu en Montreal, Quebec.

La Oficina quebequesa de la llingua francesa (Office québécois de la langue française) ye una institución pública de Quebec creada'l 24 de marzu de 1961, coles mesmes que'l Ministeriu d'Asuntos Culturales de Quebec. La Carta de la llingua francesa, adoptada pola Asamblea Nacional de Quebec en 1977 aumentó les sos responsabilidaes asignándo-y tamién l'aplicación de la política llingüística de Quebec. Creáronse tamién entós dos nueves organizaciones: el Conseyu Cimeru de la llingua francesa y la Comisión de la toponimia.

La institución llamábase enantes Oficina de la llingua francesa, pero camudó'l so nome al d'Oficina quebequesa de la llingua francesa dempués de l'adopción de la Llei 104 pola Asamblea Nacional el 12 de xunu de 2002. Esta mesma llei fai una reorganización de la Oficina fundiéndola cola Comisión pa la Proteición de la Llingua Francesa y una parte del Conseyu Cimeru de la llingua francesa. En 2004, la Oficina cuntaba con un presupuestu de 17,8 millones de dólares canadienses.

La so misión consiste en defender el llugar de la llingua francesa en Quebec, y en particular, asegurar lo establecío na Carta de la llingua francesa y ellaborar los programes de promoción previstos pola llei.

La Oficina atópase formada por 8 miembros, unu de los cualos ye'l Presidente Director Xeneral, nomaos pol gobiernu de Quebec por un periodu máximu de 5 años. En xineru de 2011, la Presidenta direutora xeneral yera Louise Marchand, que sustituyó a France Boucher.

Enllaces esternosEditar