Radio y Televisión Nacional de Lituania

Radio y Televisión Nacional de Lituania
	radiodifusión pública
Llocalización
Sede	Vilnius
Direición	Lituania
Forma xurídica	empresa estatal
Historia
Fundación	30 abril 1957
Sector
Industria	mediu de comunicación de mases
Productos destacaos	Radio
Forma parte de	ver Xunión Europea de Radiodifusión;
	Web oficial

Lietuvos nacionalinis radijas ir televizija (n'asturianu, Radio y Televisión Nacional Lituana) ye l'ente públicu de radio y televisión de Lituania. Foi fundada'l 30 d'abril de 1957. Anguaño xestiona tres emisores de radio y tres canales de televisión. Forma parte de la Xunión Europea de Radiodifusión dende 1993.

Historia

La radio pública lituana entamó les sos emisiones el 12 de xunu de 1926 dende Kaunas, la capital del país naquella dómina, con una programación basada en boletinos informativos y música. Mientres la Segunda Guerra Mundial los estudios fueron ocupaos poles tropes soviétiques y nazis, hasta que'l país foi finalmente anexonáu pola Xunión Soviética en 1945. Un añu dempués empecipiáronse les tresmisiones d'un serviciu internacional de radio y en 1956 creóse una segunda emisora dedicada a la música.

El 30 d'abril de 1957 empezaron les emisiones regulares de la televisión lituana. En xunu del mesmu añu, la república socialista integró los servicios públicos de radio y televisión nuna única empresa nomada 'Comité de Radio y Televisión' y tuvo controlada peles autoridaes. En 1958 punxéronse en marcha los servicios informativos televisaos y la canal consolidóse gracies a la producción propia. A partir de 1975 emitióse programación en color.

Cola independencia de Lituania de la Xunión Soviética, la empresa de radiodifusión pública camudó'l so nome pol de Radio y Televisión Lituana (LRT). El 13 de xineru de 1991, efeutivos del exércitu soviéticu ocuparon la sede de LRT y la torre de televisión de la capital, Vilnius, nuna aición que remató cola muerte de trece persones. Les instalaciones permanecieron baxo'l control del exércitu rusu mientres 222 díes, hasta que Lituania foi reconocida internacionalmente como estáu soberanu. El 1 de xineru de 1993, LRT foi almitida na Xunión Europea de Radiodifusión.

El grupu punxo en marcha un sitiu web nel añu 2000, y en 2003 creó una segunda canal de televisión d'ámbitu cultural que se llamó LRT2 (anguaño LRT Kultūra). En 2007 punxo en marcha la tercera emisora de radio y una canal internacional de televisión, LTV World (anguaño LRT Lituanica), disponible n'Europa y América al traviés del satélite. En xunetu de 2012 la empresa camudó'l so nome pol de Radio y Televisión Nacional de Lituania y unificó toles sos marques so les sigles LRT.

Direutores

Antanas Sutkus – 1929–1934
Juozas Bieliūnas – 1934–1938
Edvardas Zabarauskas – 1938–1940
Juozas Banaitis – del 19 de xunu de 1940 al 22 de xunu de 1941
Petras Babickas – de xunu a xunetu de 1941
Juozas Baltušis – 1945–1946
Mira Bordonaitė – 1946–1951
Fridis Krastinis – 1951–1953
Jonas Januitis – 1953–1989
Domas Šniukas – 1989–1990
Skirmantas Valiulis – 1990–1992
Laimonas Tapinas – 1992–1995
Juozas Neverauskas – 1995–1996
Vytautas Kvietkauskas – d'avientu de 1996 a xineru de 1997 y d'ochobre a avientu de 1997
Dalia Kutraitė – de xineru a febreru de 1997
Arvydas Ilginis – de febreru a ochobre de 1997 y d'avientu de 1997 a agostu de 1999
Algirdas Trakimavičius – 1999–2000
Vaidotas Žukas – 2000–2001
Jūratė Sofija Laučiūtė – de febreru a abril de 2001
Valentinas Milaknis – 2001–2003
Kęstutis Petrauskis]] – 2003–2008
Audrius Siaurusevičius – dende 2008

Canales

Radio

LRT Radijas: Nació en 1957 y ye la principal radio pública. Tien calter xeneralista. La so programación básase na información y nel entretenimientu.

LRT Klasika: Creada en 2003, ta dedicada a la emisión de música clásica.

LRT Opus: Creada en 2006, ta destinada al públicu xuvenil cola emisión d'una programación de música y entretenimientu.

Televisión

LRT Televizija: Nació en 1957 y ye la canal principal de televisión de LRT. Emite una programación xeneralista dedicada a tolos públicos basada en series, películes, programes d'entretenimientu, informativos, eventos especiales y deportes.

LRT Plius: Segunda canal creada nel añu 2003. Emite una programación cultural y programes de calter minoritariu, como ciclos de cine o documentales.

LRT Lituanica: Canal internacional de LRT.

Referencies

Enllaces esternos

Sitiu web oficial de LRT