Roger Walkowiak

Roger Walkowiak
Vida
Nacimientu	Montluçon, 2 de marzu de 1927
Nacionalidá	Francia ; Polonia
Muerte	Vichy, 7 de febreru de 2017 (89 años)
Estudios
Llingües falaes	francés
Oficiu
Oficiu	ciclista
	Participante Tour de Francia 1951 ; Tour de Francia 1953 ; Tour de Francia 1955 ; Tour de Francia 1956 ; Tour de Francia 1957 ; Tour de Francia 1958 ; Vuelta a España 1956 ; Vuelta a España 1957 ; Challenge Desgrange-Colombo 1956 (es) (10.) ;

Roger Walkowiak (2 de marzu de 1927, Montluçon – 7 de febreru de 2017, Vichy)^[4] foi un ciclista francés, profesional ente 1951 y 1960, mientres los cualos llogró once victories.

Biografía

Trátase d'un ciclista pocu conocíu hasta'l branu de 1956, llogrando pocos ésitos, ente ellos, una victoria d'etapa na Vuelta a España d'esi mesmu añu.

De xuru, el so mayor ésitu profesional foi la victoria nel Tour de Francia 1956, que ganó pa sorpresa xeneral. Llegó como miembru de reserva al equipu del Nordeste y Centru de Francia magar ser de la zona Suroeste, porque un miembru del equipu fuera promocionáu al equipu nacional francés (Gilbert Bauvin) y yera l'únicu disponible. Consiguió ponese de líder gracies a dos escapaes n'etapes llanes na que llogró una renta de más de 30 minutos sobre los favoritos, magar el tiempu perdíu n'otres etapes nun-y daba una renta demasiao grande que fixera prever el so trunfu final.

Perdió'l lideralgu y daqué de tiempu nos Pirineos, pero siguía non demasiáu lloñe de los corredores en cabeza. Volvió recuperar el lideralgu tres un notable desempeñu nel monte alpín. Na 18ª etapa^[5] producióse la sorpresa. "Namái" perdió 7 minutos y mediu con Charly Gaul, llegáu a rueda de Bahamontes (que llanzara la so bicicleta pol ribayu de rabia al nun poder siguir a Gaul pretendiendo parar la carrera, teniendo qu'ayudar el so equipu a recuperala), quedando más descolgados los favoritos, y vistiéndose de mariellu yá hasta'l final. Supo alministrar la ventaya de cuatro minutos magar qu'entá quedaben dos etapes con monte y una contrarreló individual, onde peor lo pasó, pero aguantó. Llegó a París con apenes minutu y mediu de ventaya sobre'l ciclista al qu'había sustituído nel so equipu (Gilbert Bauvin).

L'ésitu foi ruinamente recibíu por prensa y públicu, quedando esllucíu, pos el públicu prefería la victoria de dalgún ídolu, y a poder ser local. Esta reacción sumió-y nuna depresión que-y acompañó'l restu de la so vida, desligándose totalmente del ciclismu tres la so retirada.

Dende entós conozse'l términu «ganar a lo Walkowiak» a ganar una vuelta per etapes gracies a una gran renta de tiempu llograda n'etapes de transición, por un candidatu pocu conocíu, o más xeneralmente a una victoria inesperada o ensin estilu.

Al añu siguiente ganó una etapa na Vuelta a España, pero yá nunca llogró dempués d'ello actuaciones de méritu.

Foi'l segundu ciclista en ganar el Tour ensin ganar nenguna etapa, y sigue siendo l'únicu en ganar un Tour ensin ganar nunca una etapa.

Una vegada retiráu rexentó un chigre n'el so pueblu, pero como la xente siguía bromiándolu cola so "esllucida" victoria nel Tour, coló nuevamente a la fábrica de automoción onde trabayara de moza, nun teniendo nenguna rellación col mundu del ciclismu hasta casi la so muerte. Nun concedió entevistes a medios por más de dos décades, al culpalos del desllucimientu de la so victoria.

Hinault foi preguntáu pola victoria de Walkowiak y afirmó: "Naide tien el derechu a dicir que lu sirvieron en bandexa'l Tour. Nun lo robó. El Tour nun llega envueltu como un regalu". Namái a partir d'entós repunxo parte de los sos lloreos. La victoria d'Óscar Pereiro en 2006 foi abondo similar a la suya, volviendo pone-y d'actualidá.