Wikipedia

Kobudo d'Okinawa

(Redirixío dende Ryukyu Kobudo)

Kobudo d'Okinawa ye un términu xaponés que pue tornase a "vía marcial antigua d'Okinawa". Úsense tamién como sinónimos los de Ryukyu Kobujutsu, Ryukyu Kobudo, o simplemente Kobudo (古武道), pero nesti últimu casu hai que tener cuidáu de nun lu tracamundiar coles artes marciales xaponeses tradicionales (llamaes tamién “kobudo”) prauticaes nes escueles antigües (koryu). Xeneralmente refierse a les tradiciones clásiques d'armes de les artes marciales d'Okinawa, sobre too’l bo (palu llargu), el sai (porra con forma de daga), el tonfa (porra con rabil), el kama (focín), y el nunchaku (palos encadenaos); pero tamién el tekko (puñu de fierro), tinbe-rochin (escudu y llanza), y el surujin (cadena con contrapesu). Armes okinawenses menos comunes inclúin el tambo (palu curtiu), el hambo (palu de llargor mediu) y l'eku (remu del bote tradicional).

Kobudo d'Okinawa
Tamién Ryukyu Kobujutsu, Ryukyu Kobudo, Kobudo
Enfoque Armes tradicionales d'Okinawa
País d'orixe Antiguu reinu de les Ryūkyū,  Xapón
Deporte olímpicu Non
Cambiar los datos en Wikidata

Historia del Kobudo

editar

La historia del Kobudo ta perciñida a la historia d'Okinawa. A lo llargo del sieglu XIV los distintos territorios de la isla axuntárense alredor de tres reinos en guerra. Poro, créyese qu'esti foi un periodu de gran desarrollu de les artes marciales. Nel sieglu XV el reinu de Chuzan llogró vencer a los otros, permitiendo que la isla s’uniera baxo un gobiernu independiente.

Décades más tarde, el gobiernu central fixo un refileru de cambios nel archipiélagu, incluyendo la torga de llevar espaes. En resultes, empecipiaron a desendolcase téuniques afechisques pa poder usar ferramientes agrícoles y cotidianes como armes de defensa personal. Nun s’apauten los investigadores sobre si la iniciativa tuvo ente la xente común (llabradores, pescadores, etc), o ente los “peichin (la clas guerrera de les Islles Ryukyu).

Ye cuasi seguro, ensin embargu, que’l comerciu bayurosu nos sieglos XV y XVI ente les Ryukyu y dellos países asiáticos, contribúi al desarrollu del kobudo. Atópense mui bien delles semeyances ente les armes chines antigües y les que s’utilicen nel archipiélagu.

En 1609 el reinu de Ryukyu foi invadíu pol clan xaponés Satsuma (lligáu al shogun Tokugawa), que reforzó la política de torga d'armes, incluyendo la d'importar armes de metal. Escenariu talu foi granible pal desendolcu d'artes marciales non dependientes de la espada, que van acabar formando’l Kárate y Kobudo que lleguen hasta nós.

Por mor de toes estes torgues, el deprendimientu d'aquelles artes marciales pasábase dafurto ente los sos prauticantes, calteniéndose per sieglos al marxe del algame públicu. Del mesmu xeitu prodúxose bien poca documentación al respeutive, torgando la comprendoria de la historia de la so creación y desendolcu.

Solamente a principios del sieglu XX maestros como Moden Yabiku, Shinko Matayoshi y Shinken Taira entamaron un trabayu d'investigación sistemática en visu a la continuidá de la práutica del kobudo, poniéndolu al algame de tola sociedá. Nesti sen hai que considerar tamién la contribución de Shimpo Matayoshi pal espardimientu del estilu Matayoshi Kobudo.

Armes tradicionales

editar

SAI

editar

El Sai (porra de tres puntes, como una traenta pequeña) ye un arma de kobudo utilizada en tríu, dos como armes principales y una tercera escondida, pal casu de que’l que les remanara fuera desarmáu o se-y francieren. Enantes d'usase como arma usóse na construcción de barganaces. Anguaño nun s’utiliza muncho en situaciones reales, por ser difícil d'esconder, anque ye mortal. Tamién ye, ente les armes del kobudo, la más difícil de remanar.

El sai tien que tener como máximo’l tamañu del antebrazu del que lu empuña. Úsase poniendo la punta apegada al antebrazu (usu non mortal), o coles tres puntes p'alantre (usu mortal). Pue emplegase colos siguientes oxetivos:

  • Golpiar cola cueta de metal.
  • Furar cola punta principal.
  • Cortar o bloquiar coles dos puntes menores.
  • Aunir dos sais al encruz, pa defender un posible ataque a la cabeza, xeneralmente solmenáu por armes d'artes marciales.
  • Francer katanes (espaes) trabándoles coles puntes menores.
  • Como arma de reflundiu, furar armadures, dalgo que ye posible gracies al so patrón de pesu de 600 gramos (de cutiu arrefundiaos contra un oponente qu'empuña armes llargues).

NUNCHAKU

editar

El nunchaku, o palu doble, ye un arma utilizada en solitario (vense tamién disciplines modernes derivaes que los usen en pareya).

Pue usase con dellos fines:

  • Inmovilizar un miembru d'un adversariu.
  • Desarmar a un adversariu.
  • Solmena-y al adversariu una golpada cola madera.
  • Bloqueos, puñaes, etc.

TONFA

editar
 
Pareya de tonfes.

Un tonfa (arma de madera asemeyada a la porra de rabil de delles fuercies policiales modernes) ye un arma de kobudo utilizada en pareya.

Pue usase con dellos fines:

  • Golpiar al adversariu cola parte trasera (la punta más curtia).
  • Golpiar al adversariu cola punta más llarga.
  • Golpiar al adversariu col rabil o mangu.
  • Bloquiar, puñar, etc.

BO

editar

El Bo (llamáu “kon” n’okinawense) ye básicamente un palu con un llargor estándar de 1,80 metros aproximao (“rokushakubo”, pola midida llamada “shaku”, que vien ser un “pie”; “rokushaku” = 6 pies aprox.). Hailos más curtios, de 1,50 metros, y otros más llargos, de 2 metros. Antaño usábase p'acarrexar los cubos arreyaos en cada cabu.

Pue usase con diferentes fines:

  • Golpiar al adversariu con una o otra punta.
  • Puñar al adversariu con una de les puntes.
  • Bloquiar, barrer, etc.

Eku

editar

L’eku ye’l remu que s’usaba antiguamente n’Okinawa, que pasó a usase como arma de defensa.

Kama

editar

El kama ya un focín (precisamente’l mesmu que s’usaba nes plantaciones) remanáu solu o en pareya.

Referencies

editar

Enllaces esternos

editar
Sacáu de «https://ast.wikipedia.org/w/index.php?title=Kobudo_d%27Okinawa&oldid=4257464»