Fuku mariniegu

El traxe mariniegu o fuku mariniegu ye un uniforme xaponés pa escolinos (セーラー服 sērā-fuku) emplegáu por estudiantes moces d'escuela media o superior. Entamó a emplegase como uniforme escolar en 1921 pola direutora de la Universidá Fukuoka Jo Gakuin (福岡女学院), Elizabeth Lee. Foi diseñao a partir del uniforme que d'aquella emplegaba la Royal Navy británica, au tuviere ella nun intercambiu d'estudiantes.

Carauterístiques

Ye enforma más semeyao a uniformes navales que'l traxe masculín (gakuran). Consiste nuna blusa con un cuellu mariniegu prendíu, nomao (襟 eri) y nuna saya plisada. Hai versiones pal branu y l'iviernu, nes que camuden los llargos y axustes de les ropes. Tien un llazu na parte frontal, atáu a la blusa aunque con delles variaciones. Colores habituales son el azul marín, el blancu, el gris y el negru.

Zapatos, calcetinos y otros accesorios son parte del uniforme. Los calcetos son polo xeneral blancos o azules, y los zapatos marrones o negros. Como nun son partes esenciales del uniforme, ye habitual que les moces sustitúyanlos por elementos más modernos.

Importancia cultural

El Fuku mariniegu tien un elementu de señaldá pa les antigües alumnes y ta asociao cola mocedá. Fuku mariniegos d'imitación son un traxe popular na fiesta de Halloween y otros eventos folixeros, y ye mercáu en grandes almacenes y tiendes de disfraces en too Xapón.

Como quiera que los uniformes escolares tienen tamién daqué de fetiche, Fuku mariniegos de segunda mano son subastaos en tiendes underground conocíes como burusera, pese a que la llei xaponesa fixera perdificil ese práutiques.

L'uniforme ta verdaderamente consideráu un símbolu de sumisión y conformidá, y ye frecuente qu'apaeza con modificaciones naquellos estudiantes enfotaos en amosar daqué de inconformidá y individualismu. Eses modificaciones afeuten a la llargura de les sayes, el desanicie del llazu, la colocación de parches y insignies embaxu'l cuellu mariniegu, etc. En décades pasaes foron habituales tamién Fuku mariniegos de colores ablucantes emplegaos por grupos alternativos.

El Fuku mariniegu, xunta dellos uniformes escolares, tienen un papel perimportante pa la nomada cultura otaku y el fetichismu sexual xaponés, como ponse n'evidencia en obres anime, manga, y doujinshi. Dellos exemplos:

La serie de dibuxos animaos Sailor Moon, na que les protagonistes lleven Fuku mariniegu.
"Sailor Fuku o Nugasanaide" foi un cantar popular del Onyanko Club na década de 1980.
Les serie de cine y televisión Sukeban Deka amuesen moces delincuentes.
La protagonista d'InuYasha, Kagome Higurashi, ye casique siempres amosada col so Fuku mariniegu.

Referencies

Enllaces esternos

Wikimedia Commons tien conteníu multimedia tocante a Fuku mariniegu.