Sparring

El sparring ye una forma d'entrenamientu común a munches artes marciales. Anque la so forma exauta varia, ye n’esencia una forma de combate relativamente llibre, con abondes regles, vezos o alcuerdos al envís de torgar al máximo les lesiones. Por estensión llámase dacuando al alderique argumental "sparring verbal".

Prauticantes de Kung fu faciendo sparring con un “dao” (espada) y un “gun” (palu)

Diferencies ente estilos

La naturaleza física del sparring varia cola naturaleza de les habilidaes que se quieren desendolcar; el sparring nun arte de golpiar como’l Chun Kuk Do entama davezu colos prauticantes en llaos opuestos de la zona de combate y dase un puntu por golpiar nel área afayadiza y una falta por facelo nun área torgada o por salir de la zona. El sparring nun arte de llucha como’l yudu pue entamar colos deportistes garrándose y terminar si se dixebren.

La organización de los combates de sparring tamién varia; si los participantes se conocen y se lleven bien pue basta-yos namái con prauticar, ensin regles, árbitru o cronómetru. Si los que lo faen son estraños, hai dalguna tensión emocional o’l sparring se ta evaluando, pue ser acionao introducir regles formales y qu'un artista marcial con esperiencia supervise o arbitre’l combate.

En delles escueles déxase entamar col sparring de la que se principia nelles, cola sida de que los estudiantes tienen que deprender cómo enfrentase a un adversariu rápidu, potente y decidíu. N’otres escueles pue pidise a los estudiantes qu'esperen unos meses por razones de seguridá, o por mor de que tienen primero que deprender les habilidaes que supuestamente van tener qu'emplegar na so práutica del sparring.

Normalmente’l sparring estrémase de los combates de competición, darréu que’l propósitu del sparring ye davezu la educación de los prauticantes.

Usu y deporte

El papel educativu del sparring ye suxetu de dalgún alderique. Nos combates de sparring hai que tomar dalgunes midíes de proteición de los participantes. Estes pueden incluyir equipamientu proteutor, torgar delles téuniques y árees puntuables, combatir despacio o a una velocidá fixada, torgar delles formes d'engañu, o munches otres posibilidaes. Estes precauciones pueden resultar en cambeos na naturaleza de les habilidaes que se quieren deprender. Por exemplu, si unu fai siempre sparring llevando guantes acolchaos pesaos, pue enfotase en téuniques que na realidá tienen el riesgu de romper los güesos de la mano. Munches escueles reconocen esti pilancu, pero asina y too valoren el sparring porque obliga al estudiante a improvisar, a pensar baxo presión, y a tener controlaes les emociones.

Tamién s’alderica’l nivel de contautu: un contautu más sonce pue resultar en menos lesiones, pero’l contautu duru pue preparar meyor a los prauticantes pa la competición o pa la defensa personal. En dellos estilos deportivos, como Sanda, Taekwondo, Muay Thai, Kárate Kyokushinkai, Kendo y Artes marciales mestes, faise sparring a contautu plenu.

Denomación y tipos

El sparring tien nomes y formes diferentes según les escueles. Delles escueles prefieren nun llamalu sparring, porque creyen que’l de so ye d'una castra estremada de lo que davezu se llama sparring.

• Nel Jiu-jitsu brasilanu al sparring llámenlu davezu “rolling”.
• Nel boxéu recibe davezu esi mesmu nome de “sparring”.
• En Capoeira lo más paecío al sparring ye’l “jogo” (xugar dientro la “roda”).
• Nes artes marciales chines, el sparring suel entrenase de mano como aplicaciones individuales, pa combinales dempués nel entrenamientu llibre de téuniques a curtia, media y llarga distancia (ver: San Shou; manes qu'emburrien).
• En mui bien d'artes marciales xaponeses, llámase davezu “randori” a una actividá asemeyada al sparring.
  • En Yudu, el randori ye de fechu un sparring ente dos yudoques.
  • Na mayoría de les escueles d'Aikido’l randori ye una forma estándar de sparring onde un aikidoka deféndese contra dellos atacantes.
• En Kárate, llámase kumite (組手) al sparring.
• En Taekwondo, el sparring denómase “kyorugi” na Federación Mundial de Taekwondo (WTF) o “matsogi” na Federación Internacional de Taekwon-Do (ITF).
  • Na WTF la mayoría de los ataques son pataes, mentanto na ITF afálase l'usu tanto de les manes como de los pies. Na ITF nun se suelen emplegar cascos nos combates, anque sábese que delles organizaciones sí prautiquen d'esta miente.
• En Pencak Silat el sparring llámase "berpencak".
• Na esgrima occidental, mesmo na esgrima histórica, el combate recibe la denomación de "combate llibre", "asaltu", o simplemente "esgrima."