Tarmu

En botánica, el tarmu, táramu o tallu ye la exa de la parte aérea de les cormófites y ye l'órganu que sostién a les fueyes, flores y frutos. Les sos funciones principales son les de sostén y de tresporte de fotosintatos (carbohidratos y otros compuestos que se producen mientres la fotosíntesis) ente los raigaños y les fueyes.

El tarmu o tallu d'una planta.

Estrémase del raigañu pola presencia de nuedos nos que s'enxerten les yemes axilares y les fueyes y pol so xeotropismu negativu, esto ye, que xorrecen n'escontra de la fuercia de la gravedá. Ente los cormófitos esisten especies con un solu tallu que'l so renuevu nun ramifiquen y plantes con munchos tallos (pluricaules) que'l so renuevu ramifícase de delles formes d'alcuerdu a l'actividá de los meristemes.

Dende'l puntu de vista de l'Anatomía, el tallu ta constituyíu por trés sistemes de texíos: el dérmicu, el fundamental y el vascular o fascicular. Les variaciones na estructura de los tarmos de distintes especies y de los taxones mayores básense principalmente nes diferencies na distribución relativa de los texíos fundamental y vascular. La crecedera en llargor del tarmu débese a l'actividá de los meristemes apicales y al allargamientu subsecuente de los entrenudos y denómase crecedera primaria. La crecedera secundaria carauterízase pol aumentu de la grosez del tarmu y ye la resultancia de l'actividá de los denominaos meristemes secundarios (cámbium y felóxenu). Esti tipu de crecedera ye carauterísticu de les ximnospermes y la mayoría de les eudicotiledónees arbórees y arbustives y da como resultáu la producción de madera.

Los tarmos clasifíquense dende diversos puntos de vista, que van dende la consistencia hasta los cambeos que pudieren presentar p'afaese a distintos ambientes. Tal diversidá ye la base de la gran cantidá d'aplicaciones económiques que tienen los tarmos, dende l'alimenticia hasta les más variaes industries.

Enllaces esternos

• Wikimedia Commons acueye conteníu multimedia sobre Tarmu.

• Datos: Q134267
• Multimedia: Plant stems