Los aliens o xenomorfos son seres estraterrestres de ficción, antagonistes de la serie de películes Alien, asina como de les noveles, cómics y videoxuegos derivaos. Diseñáronlos a partir de la obra Necronomicon IV, de H. R. Giger.

Nos cómics menciónase'l nome científicu Linguafoeda acheronsis (llingua mortífera d'Acheron), y al empar Internecivus raptus (lladrón mortíferu).

Fisioloxía editar

El ciclo de vida del xenomorfu ye percomplexu. Del güevu naz un "abrazacares", un ser pequeñu, asemeyáu a un crustaceu y con una cola llarga. Esti bichu aférrase a la cara d'un güéspede, empreñándolu, tres lo que muerre. L'embrión, dientro la víctima, toma parte del so ADN y, unes hores dempués, conviértese nun "arrevientapechos", nomáu asina porque ye lo que fai p'abandonar el güespede, matándolu. Aína, la cría crez abondo y conviértese n'adultu, davezu con traces del organismu que parasitó. Dacuando paez tener una forma fixa, independientemente del güéspede, anque la causa d'esto nun s'esplica.

Por aciu de la so natura, l'aspeutu pue variar muncho, pero na mayoría los casos poseyen cuatro estremidaes con garres que-y permiten esguilar con facilidá, cola punzante y una boca dientro de la otra, a mou de llingua con dientes, que ye a travesar paredes d'un güelpe. El so sangre ye perácido, pudiendo corroyer inclusive'l metal, tienen más o menos la intelixencia d'un monu y son peragresivos. Eso sí, ablayen escontra'l fueu.

Organización social editar

Como les abeyes y otros inseutos, los xenomorfos organícense n'ensames con una reina[1] como cabezalera, que pue surdir direutamente d'un güevu o como evolución d'un espécime d'otra casta. La reina ye muncho más grande, fuerte e intelixente que los fíos, anque nun suel salir del nial, siendo la so función poner güevos. Pa esto tien la so traza más carauterística, que ye una güevera enorme. Paecen poder mandar a los fíos, probablemente con un amiestu de feromones y ultrasoníos.

Amás de la reina, esiste un gran númberu de castres, caúna con una xera distinta, ente les que s'alcuentren les siguientes:

Bázcaru[2]: La más frecuente, constrúi el nial secretando una resina, y tamién recueye güéspedes pa los abrazacares. Puen cuspir el sangre ácido como métodu d'ataque.

Trabayador[3]: Un bázcaru pue convertise en trabayador cuando'l nial lo rique. Ye más pequeñu y claru, non violentu, y nun suel salir del nial, que constrúi más eficazmente porque la boca interior pasa ser esclusivamente un secretor de resina. Tamién faciliten la apaición d'otres castres, apurriendo almangre.

Guerreru[4]: Más grandes, rápidos, duros y xabaces. Amás amuesen cierta capacidá pa planiar ataques y organizase. Por si nun foren yá peligrosos, en morriendo españen, chiscando too de sangre ácido. Paecen tener cierta capacidá pa evolucionar de forma estremada dependiendo de la so contorna, p'adautase meyor a esta.[5]

Pretorianu[6]: N'ensames de más de trescientos miembros, la reina escueye guerreros pa convertilos en comandantes, d'aspeutu asemeyáu al de la reina pero un poco más pequeños, anque tamién puen nacer direutamente de güevos, teniendo estos un color verdosu. Nun s'alloñen del nial, y anque son llistos ataquen direutamente, yá que col so poder nun-yos fai falta planiar nada. Estos tamién puen evolucionar na forma más poderosa nomada estrozador[7], nun acarriador[8] que tresporta abrazacares, o nuna nueva reina que fadrá'l so nial.

Reina abrazacares:[9] Dacuando nacen abrazacares de gran tamañu y color encarnáu, non cola función d'empreñar un güéspede sinón de curiar los güevos.

En colonies mui grandes surde una reina madre[10], más poderosa que la reina, y nes más grandes tovía una emperatriz[11] a la que se subordinen toles demás.

Variedá fenotípica editar

Como se tien dicho, les carauterístiques y habilidaes de los xenomorfos dependen muncho del güéspede nel que se desarrollaron. Esisten milenta, pero ente les más notables podemos mentar les siguientes:

Humanoide:[12] El más frecuente nes películes, noveles, cómics y videoxuegos. Los bázcaros bípedos de color negru, con un altor d'ente 2,13 y 2,43, y sacante la carauterística cabeza allargada, la cola y los tucos que-y surden del llombu, recuerda bastante a una cadarma humana. Los pretorianos miden tres metros, y les reines cuatro y mediu.

Corredor:[13] Con un perru como güéspede, ye un cuadrúpedu mui rápidu y áxil, pero un poco más pequeñu que los humanoides. Los guerreros nómense "centineles" y son perbonos esguilando, mientres que los pretorianos nómense "machacadores" porque desarrollen una durez na tiesta, resistente a les bales, cola que truñen con gran fuercia. La reina ye a cuspir una nube de fumu ácido.[14] Otros animales terrestres dan resultaos paecíos, como'l puma (cola piel blanco pembaxo y dorao penriba), les panteres (de color negru y ensin cola) o los bovinos (negru y coloráu, con cuernos).

Predalien:[15] Cuando un xenomorfu toma como güéspede un yautja surde un monstruu perpoderosu, siendo'l bázcaru un ser de tres metros d'altor, cola caxa asemeyada a la d'un yautja, lo que-y permite vocalizar como estos, y el pelleyu d'un tonu desigual que va del marrón blanquecín al negru. Ye tan resistente que ye quién a sobrevivir tres pasar unos segundos somorguiáu en magma, y por si nun fora yá bastante peligrosu, cuando lu fieren de gravedá pue mudar la piel, tresformándose nuna nueva forma más poderosa, de color encarnáu. Esta habilidá nun paez llegar a tálamu, polo que pue emplegala más d'una vegada. A los predaliens présta-yos mutilar a les sos víctimes y quedase trofeos, davezu cranios. Los yautja, pela so parte, considérenlos espantos escontra natura, y traten d'eliminalos.

Tarkatanín:[16] Nel videoxuegu Mortal Kombat X aparecen xenomorfos nacíos del cuerpu d'un tarkatan. Son más bracos y gruesos que los nacíos d'humanos, y cola tiesta más redonda. Los dientes son más llargos y afilaos, y lo más carauterístico ye que tienen un pinchu retráctil en cada brazu.

Vampirín: Nacíos d'un vampiru, tienen un aspeutu asemeyáu a los humanoides, pero embúrialos la lluz del sol[17] y pue suponese que tamién tán dotaos de les otres debilidaes y poderes de los vampiros. Les reines poseyen tamién ales que-yos permiten esnalar.[18]

Escuru:[19] Nacíu d'un diañu que sirve a The Darkness. Tien los poderes d'esti, poro ye indestruyible na escuridá. Ye verdosu, cornudu y con rostru asemeyáu al d'un diañu, siendo asina'l más paecíu a unu humanu.

Parademoñáu:[20] Surdíos de los parademoños de Apokolips, son mui paecíos a los humanoides pero de mayor tamañu.

Orixe editar

L'orixe de los xenomorfos plantégase na película Prometheus de Ridley Scott, na que se ve que la raza de los "inxenieros" (tamién conocíos como space jokeys o biomecanoids) esperimentaron semando'l so ADN nuna riestra de planetes pa crear vida, inclusive la Tierra. Amás, crearon un axente patóxeno qu'usaben pa finar colos esperimentos, dacuando fayendo qu'un monstruu gafu se xestara dientro'l güéspede. Sicasí, nun menten si esto se faía pa erradicar les formes de vida creaes o si, pela contra, éstes creábense xustamente cola fin d'incubar talos seres.

Na película "Alien: Covenant", esplícase que l'androide David 8 descubre estes investigaciones nel mundu los inxenieros a finales del sieglu XXI, y entós esperimenta col axente patóxeno fasta crear el xenomorfu perfeutu, que tien l'aspeutu clásicu del monstruu. Sin embargu, muncho enantes de que David 8 llograra crear esti espécime, yá taben produciéndolos en masa los inxenieros, y los tresportaben pela galaxa pa los sos esperimentos. Na primer película d'Alien, una nave escacharrada nel planeta LV-426 contenía'l cadabre fosilizáu d'un inxenieru muertu sieglos atrás, y les bodegues d'esta nave taben enllenes de güevos evolucionaos d'obreres y reines, polo que se deduz que morrió en metá d'una misión de infestación. Otru niciu de la antigüedá d'esta raza ye la película Aliens vs. Predator, qu'amuesa que los yautjas yá infestaben humanos con xenomorfos va cinco mil años, col cometíu de cazalos dempués.

Nel cómic Aliens: Outbreak amuésase una versión alternativa al canon, que presenta el mundu nativu de los xenomorfos, u nun son la especie dominante sinón un eslabón más na cadena alimenticia'l planeta. Los xenomorfos tórnense un andanciu incontrolable cuando son sacaos del so hábitat y l'equilibriu se ruempe. Esto desmentiría la teoría de que foron creaos polos inxenieros.

Referencies editar

Enllaces esternos editar