Xuegos Olímpicos de Branu de 1940

XII edición de los xuegos olímpicos de branu, atayaos por mor de la Segunda Guerra Mundial

Los Xuegos Olímpicos de 1940, oficialmente conocíos como Xuegos de la XII Olimpiada, fueron atayaos pol desenvolvimientu de la Segunda Guerra Mundial. La ciudá onde teníen que celebrase yera Ḥélsinki (Finlandia), dempués del arrenunciu de la so sede inicial, Tokiu (Xapón).

Xuegos Olímpicos de Branu de 1940
Xeneral
Tipu de competición Xuegos Olímpicos de branu
País Xapón
Historia
Desapaición 1939
Competición
Xuegos Olímpicos de Berlín 1936 Xuegos Olímpicos de Branu de 1940 Xuegos Olímpicos de Londres 1944
Cambiar los datos en Wikidata
Póster oficial de Tokyo pa los Xuegos Olímpicos de Branu de 1940.

El 31 de xunetu de 1936, realizóse la eleición en Berlín (Alemaña), sede de los Xuegos Olímpicos d'aquel añu. Tokiu, capital de Xapón foi escoyida de forma unánime p'allugar la edición de 1940. De cumplise'l calendariu, les pruebes tendríen llugar ente'l 21 de setiembre y el 6 d'ochobre. Sicasí, l'españíu de la Segunda guerra sino-xaponesa en 1937 obligó a que'l país arrenunciara a ellos.

Como sede alternativa, el Comité Olímpicu Internacional escoyó a Ḥélsinki, capital de Finlandia, que programó les pruebes ente'l 20 de xunetu y el 4 d'agostu. Pero nesti casu, l'españíu de la Segunda Guerra Mundial obligó a una suspensión definitiva de la edición, que nunca se celebró. Años más llueu, Ḥélsinki convirtióse na sede de los Xuegos Olímpicos de 1952, ente que Tokyo entamaríelos en 1964.

Historia editar

Eleición de Tokiu editar

Na ceremonia d'apertura de los Xuegos Olímpicos de 1932, l'alcalde de Tokyo, col sofitu del Gobiernu nipón, pidió a los miembros xaponeses del Comité Olímpicu Internacional, Jigorō Kanō y Seiichi Kishi, qu'encamentaren a la capital como sede de los Xuegos Olímpicos de 1940. N'agostu de 1936, el COI escoyó a Tokyo como sede con 36 votos, frente a los 27 del aspirante Ḥélsinki (Finlandia). Amás, escoyóse como sede pa los Xuegos d'Iviernu, que se celebraben esi mesmu añu, a Sapporo. La confirmación definitiva tuvo llugar na xunta añal del COI de 1937, que se celebró en Varsovia (Polonia).[1]

Tokyo desenvolviera un programa qu'empezaría'l 21 de setiembre cola ceremonia inaugural, y remataría'l 6 d'ochobre. Taba previstu l'usu del Estadiu Meiji Jingu Gaien, sede de los Xuegos del Alloñáu Oriente de 1930, como estadiu olímpicu, qu'amás concentraría na so contorna les sedes de natación.[2] Anguaño esi estadiu nun esiste, y sobre los sos terrenes ta asitiáu l'Estadiu Olímpicu de Tokyo. Como deportes d'exhibición, escoyóse yudu y béisbol. El presupuestu total pa la organización de los Xuegos superaba los 12 millones de yenes, apurríos na so mayoría pol Gobiernu de Xapón.[2]

Anque Xapón yá preparara'l calendariu, el país viose obligáu a arrenunciar a los Xuegos Olímpicos de Tokyo y Sapporo pol desenvolvimientu de la Segunda guerra sino-xaponesa, qu'españó en 1937. L'arrenunciu fíxose oficial el 16 de xunetu de 1938.[2]

Eleición de Ḥélsinki editar

Col arrenunciu de Tokyo como sede principal, el Comité Olímpicu Internacional escoyó en 1938 a Ḥélsinki, capital de Finlandia, como sede alternativa. Johan Wilhelm Rangell xugó un papel importante na eleición, gracies a les sos conexones col COI. En menos de dos años, la nueva sede tenía qu'ampliar la capacidá hotelera pa dar cabida a les aproximaes 160.000 persones que podíen allegar, y pola falta de tiempu suxurieron midíes alternatives, como agospiamientu en cases particulares ufiertaes por voluntarios.[3] Amás, construyiríase una Villa Olímpica na redoma de Ḥélsinki, que más tarde podría ser reutilizada.[3]

El comité organizador fixo inclusive públicu'l programa de los Xuegos, qu'empezaríen el 20 de xunetu con una ceremonia inaugural, y concluyiríen el 4 d'agostu. L'Estadiu Olímpicu de Ḥélsinki, inauguráu en 1938, sería'l centru de les actividaes atlétiques. Ḥélsinki contemplaba la introducción del vuelu ensin motor como disciplina olímpica, daqué que nunca se llevó a cabu. Como había pocu tiempu pa tenelo tou a puntu, el Gobiernu finés dio un creitu estraordinariu de 200 millones de marcos finlandeses, ente que'l Conceyu de Ḥélsinki apurriría otros 100 millones. A empiezos de 1939, unes 60 naciones confirmaren la so presencia.[3]

Col españíu de la Segunda Guerra Mundial, los Xuegos Olímpicos fueron suspendíos.[3] Lo mesmo asocedió años dempués cola edición de 1944, que tenía que celebrase en Londres.

Deportes editar

Anque nunca se llegaron a celebrar, les siguientes pruebes taben programaes nos Xuegos Olímpicos de 1940 como disciplines olímpiques:[2]

Referencies editar

  1. Comité Olímpicu de Japón (ed.): «History of Japan's Bids for the Olympics» (inglés). Consultáu'l 30 de noviembre de 2011.
  2. 2,0 2,1 2,2 2,3 Comité Olímpicu Internacional (ed.): «Official Olympic Games Report 1940 Tokyo and Helsinki» (inglés). Consultáu'l 30 de noviembre de 2011.
  3. 3,0 3,1 3,2 3,3 EF Deportes (ed.): «Helsinki 1940: los Juegos Olímpicos olvidados» (castellanu). Consultáu'l 30 de noviembre de 2011.

Enllaces esternos editar


Predecesor:
  Berlín 1936
XII Xuegos Olímpicos de branu
  Ḥélsinki 1940
(Non celebraos)
Socesor:
  Londres 1944
(Non celebraos)