Yihe Quan

El Yihe Quan o Yihemen Quan (Boxéu Harmoniosu, o de la Xusta Harmonía) ye ún de los estilos de Kung Fu o boxéu chinu que’l fundador del Shorinji Kempo, Doshin So, dicía qu'aprendiera na so mocedá en China.

D’acordies col estudiosu del Shorinji Kempo Rogelio Casero , sacantes el testimoniu de Doshin So nun se pescuda malpenes información sobre esti estilu, a pesar de que paez tener una rellación obvia cola –ésta sí d'abonda sonadía– “Yihe Quan” (más tarde denominada Yihetuan), la principal sociedá secreta qu'afaló la Rebelión Boxer de 1900.

Como estilu de llucha, “Yihe Quan” ye’l nome qu'adoptó na Rebelión de los Boxers el Meihua Quan (Boxéu de la Flor de Cirolar). Al paecer un prauticante de Meihua Quan llamáu Zhao Sanduo foi’l creador de la Yihe Quan (“Sociedá de la Xusta Harmonía”, Giwaken en xaponés) na última década del sieglu XIX. Esto fizo que popularmente fuera fácil venceyar un nome col otru.

Una versión menos conocida atribúi la creación del estilu Yihe Quan a un tal Zhu Hungtang, de la provincia de Shandong, que de mano centróse dafechu na práutica del Kung Fu a cencielles, ensin enseñar dengún tipu de filosofía, pero que dempués de lleer dellos llibros sobre la secta Bagua (Bagua Jiao) y la sociedá del Llotu Blancu (Bailian Jiao), sufrió tal cambéu ideolóxicu qu'acabó tresformando l'estilu de Kung Fu orixinal nuna sociedá secreta.

Per otra parte dizse que l'estilu Yihe Quan yera’l sistema que prauticaben los siguidores de la secta homónima, pero esto nun paez dafechamente cierto, yá que renomaos maestros d'otros sistemes de Kung Fu, como’l Bagua Zhang, pertenecieron a la Sociedá de la Xusta Harmonía. Asina mesmo delles fontes afirmen que tamién el sistema Wing Chun yera mui apreciáu polos miembros d'esta sociedá secreta. Poro tien más xacíu pensar que, anque a lo primero tolos miembros de la secta prauticaben l'estilu Yihe Quan, posteriormente, cuando la revuelta de los Boxers, auniéronse-yos lluchadores d'estremaos sistemes y sectes arreyaes. En tou casu quiciabes nun haya que mezclar la idea de Yihe Quan como sociedá secreta, cola de Yihe Quan como estilu de boxéu chinu identificáu col Meihua Quan esclusivamente.

Doshin So, pela so parte, da bien poques referencies del Yihe Quan. Diz namái que’l so maestru, Wen Taizong (Wen Laoshi), deprendió esti sistema de Huang Longbo nel sen de la sociedá Gelaohui (Sociedá de los Hermanos Mayores) a partir de 1912. Sicasí ye raro que, siendo Wen Taizong monxu Shaolin hasta 1912, nun deprendiera Kung Fu nel monesteriu, sinón tres colar d'ellí.

So Doshin cunta que’l maestru Wen Taizong tamién-y deprendió les téuniques de Lohan Quan, Wuhua Quan y Long Xing Zhuji; pero nun esclara si estos son nomes d'estilos o de simples formes, o si yeren parte del Yihe Quan o bien enseñances aparte. Anque los tres nomes coinciden colos d'estilos de Kung Fu, tratábense cuasi de xuru de lo que los artistes marciales chinos denominen “formes” (taolu), ello ye, encadenamientos téunicos que se faen individualmente y que tienen una aplicación práutica; masque pue que fueren tamién otra clas d'exercicios, como grupos de téuniques, o aplicaciones o formes en pareya, pero non estilos completos.

Doshin So describe’el Yihe Quan (Giwaken) como un estilu de boxéu rápidu y duru, pero nun paez qu'haya denguna asemeyanza téunica nin dinámica ente’l Shorinji Kempo y el Yihe Quan actual, anque pueda haber della en cuantes a la teoría o los conceutos. Sicasí, teniendo en cuenta qu'esti Yihe Quan ye’l Meihua Quan, hai que dicir que na segunda fase de deprendimientu del Meihua Quan, denominada Chengquan, entámase un estudiu por pareyes qu'inclúi agarres, proyeiciones y remanamientos articulares, lo que pudo influyir nes téuniques d'esta mena qu'hai nel Shorinji Kempo. Arriendes de que'l Meihua Quan interésase de manera pola doctrina budista y la medicina tradicional.

Enllaces esternos

• http://www.shorinjikempo-cartagena.org/Estilosrog1.htm INVESTIGACIÓN SOBRE LOS ESTILOS CHINOS QUE APRENDIÓ SO DOSHIN. 1ª PARTE, por Rogelio Casero Abellán

• Datos: Q3572281