Zilla (kaiju)
La versión del monstruu de la película norteamericana de Godzilla de 1998 foi bien distinta al Godzilla orixinal, siendo más asemeyaú a un tiranosauriu cuasique pol ésitu de Jurassic Park[1] unos años enantes. L'orixe tamién ye distintu, siendo una iguana mutada por aciu de pruebes nucleares na Polinesia Francesa. Tantes yeren les diferencies que más p'alantre decidieron renomalu "Zilla" pa nun lu tracamundiar col orixinal.[2]
| Kaiju de Godzilla | |
|---|---|
| Zilla | |
 | |
| Especie | Iguana marina mutada por aciu de la radiación. |
| Xéneru | Hermafrodita |
| Altor | 54 metros |
| Llargor | 90 metros |
| Pesu | 500 tonelaes |
| Alies | Godzilla, Cyber Godzilla |
| Parientes | Zilla Jr. (Fíu/a) |
Les sos habilidaes más llamaderes son una gran axilidá, una velocidá qu'algama los 458 km/h, una gran capacidá d'aguantar la respiración so l'agua, reproducise asexualmente, escavar, dar saltos tremendos y echar un gas inflamable como aliendu (na película nun ye a echar un aliendu atómicu como'l Godzilla orixinal, pero sí na serie animada). Tamién tien un comportamientu más animal y una resistencia menor, yá que son a acabar con él llanzando-y misiles.
Anque na película'l monstruu muerre, a la final vemos que sobrevive la cría d'ún de los güevos que punxo, y a los pocos meses estrenaron una serie animada protagonizada por esta (davezu llamada Zilla Jr.) en creciendo, medio adomada polos personaxes humanos y que combate otros monstruos. Nesta serie, unos estraterrestres reanimen el cuerpu del Zilla orixinal convirtiéndolu en cyborg.[3]
Como l'adautación recibió males critiques en Xapón[4], tomen el personaxe a broma y faen un par de chancies con él nes películes mesmes de Godzilla. En Gojira, Mosura, Kingu Gidora: Daikaijū Sōkōgeki comenten que los americanos piensen que los atacó Godzilla pero que nun yera él, y en Gojira: Final Wars apaez un Zilla (de munchu mayor tamañu, 90 metros d'altor)[5] y Godzilla acaba con él ensin nengún esfuerciu.[6]
Tamién apaez un Zilla nos cómics d'IDW Godzilla: Rulers of Earth y Godzilla: Oblivion (d'ochenta metros d'altor), asina como na novela Godzilla: Monster Apocalypse.
Referencies
editar- ↑ https://www.deseret.com/1998/5/20/19380979/godzilla-smells-like-jurassic-park
- ↑ https://wikizilla.org/wiki/Godzilla/TriStar
- ↑ https://wikizilla.org/wiki/Cyber_Godzilla
- ↑ https://screenrant.com/godzilla-1998-movie-toho-hated-reason-millennium-series/
- ↑ https://wikizilla.org/wiki/Zilla
- ↑ https://wikizilla.org/wiki/Godzilla:_Final_Wars
Enllaces esternos
editar
Wikimedia Commons acueye conteníu multimedia sobre Zilla.
Datos: Q536204- Multimedia: Zilla (Godzilla)
