Alicia García-Salcedo González

Alicia García-Salcedo González
Vida
Nacimientu	Uviéu, xunetu de 1903
Nacionalidá	España
Muerte	Llanes, 5 de xineru de 2003 (99 años)
Estudios
Estudios	Universidá d'Uviéu
Oficiu	abogada
Creencies
Relixón	catolicismu

Alicia García-Salcedo González (xunetu de 1903, Uviéu – 5 de xineru de 2003, Llanes) foi una abogada católica asturiana conocida por convertise en 1935 na primer muyer abogada d'Asturies.

Vida y profesión

El padre y los tíos d'Alicia yeren tamién abogaos, y foi d'ehí d'aú-y vieno l'interés pola carrera de derechu. Alicia, fizo los sos estudios de Bachiller (1932) y matriculóse en Derechu na Universidá d'Uviéu^[1], obteniendo unes mui meritories calificaciones académiques na rama de penal, dedicando parte de la so vida a esta especialidá.

Nel añu 1922, el Colexu d'Abogaos d'Uviéu, modificó los sos estatutos permitiendo que les muyeres pudieren formar parte del coleutivu. Y foi asina como en 1935, Salcedo solicitó la so incorporación na organización y foi admitida en calidá d'exerciente col númberu 287. D'esti mou convirtióse na primer muyer abogada qu'exercitaba la profesión n'Asturies. Dase'l casu qu'un mes enantes, María del Carmen Menéndez Manjón incorporárase al Colexu d'Abogaos de Xixón, pero como non-exerciente.

Exerció la so profesión con gran repercusión mentanto más de 20 años, participaba en mítines eleutorales y actos relixosos defendiendo les sos idees. En xineru de 1936, Alicia, que se definía como una activista de dereches y católica, declaraba na revista Estampa (Madrid):

«Yo enxamás vistiré la toga p'acusar a naide. Yo soi una muyer. [..] tengo un conceutu mui míu tocante a les actividaes que la muyer tien de desendolcar na sociedá; el papel que no tien de tar acutáu ye'l de muyer. Nun atalanto la figura femenina señalando col deu hacia la cárcel o la forca».^[2]

Nos años 60 emigró a Venezuela^[3] au fundó'l colexu español d'enseñanza media mixtu Diego de Losada, onde foi direutora hasta la so xubilación nel añu 1984. Arriendes de dirixir el colexu, mentanto la so estancia na capital venezolana Salcedo caltuvo una intensa actividá cultural ya inteleutual, entamando representaciones de teatru clásicu, meses redondes, y collaborando con dellos medios de comunicación.

En 1984, tornó a Asturies, y morrió en Llanes a la edá de 99 años. Como homenaxe a la primer abogada que s'incorporó al órganu colexal y qu'exerció la profesión n'Asturies, el Colexu d'Abogaos d'Uviéu convoca añalmente el Premiu a la Igualdá «Alicia Salcedo»^[4], col envís de «promover y difundir la igualdá de tratu y oportunidaes ente muyeres y homes»

Ver tamién

Referencies

Enllaces esternos

[1] ttps://www.lavozdeasturias.es/noticia/oviedo/2018/11/09/inspiradora-historia-primera-abogada-asturias/00031541762180972496593.htm

[2] ttps://www.abogacia.es/2016/12/14/quien-fue-alicia-salcedo-la-primera-colegiada-del-colegio-de-oviedo-da-nombre-al-premiu-a-la-igualdad/

[3] ttps://www.elcomercio.es/asturias/asturianas-abrieron-camino-20171129001134-ntvo.html

[4] ttps://www.bolsamania.com/noticias/sociedad/el-colegio-de-abogados-de-oviedo-concede-el-primer-premio-a-la-igualdad-alicia-salcedo-a-la-abogada-maria-jose-balda--2547295.html

[1]

[2]

[3]

[4]