Alma mater
Alma mater ye una llocución llatina que significa lliteralmente «madre nutricia» (qu'alimenta) y que s'usa pa referise metafóricamente a una universidá, aludiendo a la so función provisora d'alimentu intelectual, xeneralmente pa referise al sitiu onde determinada persona cursa o cursó los sos estudios universitarios.
La llocución yera usada na Antigua Roma pa describir a la diosa madre y, más tarde, a la Virxe María, pero l'orixe del so usu actual ye'l lema Alma Mater Studiorum («madre nutricia de los estudios») de la universidá más antigua del mundu occidental en funcionamientu ininterrumpíu: la Universidá de Boloña, fundada en 1088. La llocución pasó a munches llingües modernes col significáu d'academia nel sentíu de comunidá científica.
En rellación, hai d'añader que la pallabra matriculación, por casu, derívase tamién de mater, pero por aciu matricŭla, el diminutivu de matrix (matriz).[1] D'ende suxúrese que la institución universitaria alimenta de conocencies y curia de los sos alumnos.
Tamién s'usa pa describir a una persona que ye la fuercia impulsora d'una institución o iniciativa. Esti usu ye impropiu y derívase d'interpretar «alma» como'l sustantivu equivalente a «espíritu vivificador» (del llatín anima), y non como l'axetivu llatín (almus, -a, -um) que significa «nutriciu» (del verbu alere, alimentar).
Referencies
editar- ↑ Anders, Valentín. «Etimoloxía de MATRÍCULA». dechile.net. Consultáu'l 21 de mayu de 2016.
Enllaces esternos
editar
Wikimedia Commons tien conteníu multimedia tocante a Alma mater.
Datos: Q174376- Multimedia: Alma mater
