Abrir el menú principal

Armando Palacio Valdés

escritor español

Armando Palacio Valdés (4  d'ochobre de 1853Entrialgo - 29  de xineru de 1938Madrid) foi un escritor y críticu lliterariu asturianu, perteneciente al Realismu del sieglu XIX.

Armando Palacio Valdés
Armando Palacio Valdés, de Compañy, en Mundo Gráfico.jpg
Vida
Nome completu Armando Palacio y Valdés
Nacimientu Entrialgo4  d'ochobre de 1853
Nacionalidá Bandera d'España España
Llingua materna castellanu
Fallecimientu

Madrid29  de xineru de 1938

(84 años)
Estudios
Estudios Universidá d'Uviéu
Llingües castellanu
Oficiu
Oficiu escritor, críticu lliterariu y novelista
Nominaciones
Miembru de Real Academia Española
Xéneru artísticu novela
www.palaciovaldes.com/
Cambiar los datos en Wikidata

BiografíaEditar

Fíu de Silverio Palacio y Eduarda Valdés. So pá yera un abogáu uvieín y so ma pertenecía a una familia acomodada. Educóse n'Avilés hasta 1865, añu nel que se treslladó a Uviéu a vivir col so güelu pa estudiar el bachilleratu, lo que, daquella, facíase nel mesmu edificiu de la Universidá. Ellí lleó na biblioteca la Iliada, d'Homero tornada en versu blancu por José Mamerto Gómez Hermosilla, que lu impresionó fuertemente y abrió'l so interés pola lliteratura y la mitoloxía; tres d'ello enclinóse per otres d'Historia; prestara-y enforma d'ente les históriques la Historia de la civilización europea de François Guizot, del que tamién lleó Historia de la revolución inglesa; la primer d'eses obres descubrió-y la Filosofía de la Historia y tres relleela delles vegaes decidió deprendéla de memoria; dende ehí estendió la so llectura a la Historia de los Reis Católicos y la Historia de Felipe II de William H. Prescott; la Conquista de Méxicu, d'Antonio de Solís, la Historia Universal de Cesare Cantú; el Viaxe del xoven Anacarsis pela Grecia, les Lleiciones de lliteratura d'Hugo Blair, que-y ficieron sentir un gran apreciu pola poesía del Romanticismu, etcétera. Daquella formó parte d'un grupu de mozos intelectuales mayores qu'él de los que se consagraron a la lliteratura Leopoldo Alas y Tomás Tuero, colos qu'entabló una especial amistá.

Tres algamar el so títulu de bachiller n'Artes en 1870, decidió siguir la carrera de Lleis en Madrid, que finó en 1874. Perteneció a la tertulia del fiel club xuntu con otros escritores asturianos. Dirixó la Revista Europea, onde espublizó artículos que llueu esbilló en Semblanzas literarias (1871). Tamién hai bonos retratos lliterarios en Los oradores del Ateneo (1878) y en El nuevo viaje al Parnaso (1879), onde desfilem conferenciantes, ateneístes, novelistes y poetes de la dómina. Escribió tamién como críticu, en collaboración con Leopoldo Alas, La literatura en 1881. Casó dos vegaes: so primer esposa, Luisa Maximina Prendes, finó en 1885 depués de namás qu'un añu y mediu de matrimoniu. Casó en 1899 en segundes nupcies con Manuela Vega y Gil, que-y sobrevivió. Al morrer José María de Pereda en 1906, ocupó'l sillón vacante na Real Academia Española.

 
Marta y María por Favila en Avilés.

Diose a conocer como novelista con El señorito Octavio (1881), pero ganó la celebridá con Marta y María (1883), ambientada na ciudá ficticia de Nieva, qu'en realidá representa a Avilés. Nesta dómina de la so evolución lliteraria suel ambientar les sos noveles n'Asturies. Asina asocede tamién con El idilio de un enfermo (1884), que ye quiciás so obra más perfeuta pol acabu, ironía, cenciellez d'argumentu y sobriedá nel retratu de los personaxes, dalgo que Palacio Valdés nunca llogró repetir; tamién d'ambiente asturianu son José (1885) y El cuarto poder (1888), onde de la mesma manera qu'en La Regenta de Leopoldo Alas faise una sátira de la burguesía provinciana, denunciase la babayada de los duelos y la fatuidá de los seductores.

La so novela Riverita (1886), que tien una segunda parte llamada Maximina (1887), trescurre en Madrid y revela ciertu pesimismu y elementos autobiográficos. D'otra miente, la obra más famosa d'Armando Palacio Valdés, La hermana San Sulpicio (1889), trescurre en tierres andaluces, amosando los sos vezos demientras narra los amores ente una monxa que llogra salir del conventu y un médicu gallegu qu'al fin casa cola relixosa. La espuma (1891) ye una novela qu'intenta describir l'alta sociedá madrilana. La fe, 1892, como'l so propiu títulu indica, trata'l tema relixosu, y en El maestrante (1893) acercase a ún de los grandes temes de la novela del Realismu, l'adulteriu, de nuevu n'ambiente asturianu. Andalucía xurde otra vuelta en Los majos de Cádiz (1896) y los vezos valencianos en La alegría del capitán Ribot (1899).

Ente toles sos obres, Palacio Valdés prefería Tristán o el pesimismo (1906), cuyu protagonista encarna'l tipu humano que fracasa pol negativu conceutu que tien de la Humanidá. La aldea perdida (1903) ye como una égloga novelada al rodiu de la industria minera y quier ser una amosanza de que'l progresu industrial causa grandes daños morales. El narrador distanciase demasiáu del so tema añorando una Arcadia perdida y retratando rústicos como héroes homéricos y otorgando nomes de dioses clásicos a aldeanos. Ye una manera superficial de tratar la industrialización d'Asturies; a Palacio Valdés se-y daba meyor la descripción de la ciudá que de la vida rural.

Los papeles del doctor Angélico (1911) ye un compilatoriu de cuentos, camientos filosóficos y rellatos inconexos, anque perinteresantes. En Años de juventud del doctor Angélico (1918) cunta la historia d'un médicu (cases de güéspedes, amores cola muyer d'un xeneral etc...). Ye autobiográfica La novela de un novelista (1921), pero amás tratase d'una de les sos obres maestres, con episodios onde fai gala d'una gran ironía y un formidable sentíu del humor. Otres novelas suyes son La hija de Natalia (1924), Santa Rogelia (1926), Los cármenes de Granada (1927), y Sinfonía pastoral (1931).

Fexo dos coleiciones más de cuentos en El pájaro en la nieve y otros cuentos (1925) y Cuentos escogidos (1923). Recoyó dellos artículos curtios de prensa en Aguas fuertes (1884). Sobre la política femenina escribió l'ensayu históricu El gobierno de las mujeres (1931) y sobre la Primer Guerra Mundial en La guerra injusta, onde se declara aliadófilu y amuesase mui averáu a la Xeneración del 98 nel so ataque escontra l'atrasu y la inxusticia social de la España d'entamos del sieglu XX.

En 1929 espublizó'l so Testamento literario, nel qu'espón numberosos puntos de vista sobre filosofía, estética, sociedá etc..., con alcordances y anécdotes de la vida lliteraria na dómina que conoció. Postreru ye'l Álbum de un viejo (1940), que ye la segunda parte de La novela de un novelista y que lleva un prólogu del autor a una coleición de cincuenta artículos. Les sos Obras completas foron editaes por Aguilar en Madrid en 1935; y el so epistolariu con Clarín en 1941.

Armando Palacio Valdés foi un gran creador de tipos femeninos y yera bonu na pintura costumbrista; sabía tamién bosquexar personaxes secundarios. Al contrariu qu'otros autores concede al humor un papel importante na so obra. La so obra ta enforma tornada, especialmente al inglés, y igualmente apreciada fuera d'España; ye seguramente xunto a Vicente Blasco Ibáñez l'autor español del sieglu XIX más lleíu nel estranxeru. El so estilu ye nidiu ensin incluyir neoloxismos nin arcaísmos.

ObresEditar

  • Semblanzas literarias (1871).
  • Los oradores del Ateneo (1878)
  • El nuevo viaje al Parnaso (1879)
  • Con Leopoldo Alas, La literatura en 1881
  • El señorito Octavio (1881).
  • Marta y María (1883).
  • Aguas fuertes (1884).
  • El idilio de un enfermo (1884).
  • José (1885).
  • Riverita (1886).
  • Maximina (1887).
  • El cuarto poder (1888).
  • La hermana San Sulpicio (1889).
  • La espuma (1891).
  • La fe, 1892.
  • El maestrante (1893).
  • El origen del pensamiento (1893).
  • Los majos de Cádiz (1896).
  • La alegría del capitán Ribot (1899).
  • La aldea perdida (1903).
  • Tristán o el pesimismo (1906).
  • Los papeles del doctor Angélico (1911)
  • Años de juventud del doctor Angélico (1918)
  • La novela de un novelista (1921).
  • Cuentos escogidos (1923).
  • La hija de Natalia (1924).
  • El pájaro en la nieve y otros cuentos (1925)
  • Santa Rogelia (1926).
  • Los cármenes de Granada (1927).
  • Testamento literario (1929).
  • Sinfonía pastoral (1931).
  • El gobierno de las mujeres (1931)
  • Obras completas (1935).
  • Álbum de un viejo (1940).

BibliografíaEditar

  • Diccionario de literatura española. Madrid: Revista de Occidente, 1964.

Ver tamiénEditar

Enllaces esternosEditar