Asgaya

Asgaya foi un grupu de música folk n'asturianu.

Asgaya
Orixe	Principáu d'Asturies
Xéneru(os)	música folk
[editar datos en Wikidata]

Historia

Asgaya ñaz de la reunión de músicos apasionaos en torno a la tradición asturiana. Dende'l entamu, el grupu trabayó sobre temes populares, tradicionales, compartiendo ente toos la xera d'arreglalos y adaptalos d'una manera personal. A esti conxuntu de melodíes vanse añadiendo progresivamente composiciones propies pa conformar un repertoriu que pretende reflexar la máxima consideración de los nuesos oríxenes y al mesmu tiempu mirar hacia delantre.

A finales del añu 2006 presentabase «Escontra'l tiempu», títulu que confirma parte de la identidá y el deseu musical de la banda que lo creó, «Asgaya». Cuasi un añu enantes había visto la lluz un EP con tres temes que sirvieron para dase a conocer dientro y fuera de la nuesa tierra.

Tovía conel so discu a medio facer, el grupo foi invitáu a participar en cites colos soníos célticos por festivales de Costa Rica. «Peregrino Gris» o el llexendariu Andy Irvine («Planxty», «Patrick Street», «Mozaik») tamién formaben parte d'esti singular cartel u los soníos ástures volvieron a Hispanoamérica pa actuaciones fuera de los compromisos colos Centros Asturianos.

Nun ta lloñe nel tiempu pa Roberto Junquera -gaiteru, arreglista, intérprete, compositor y productor- el nome de «Guxán de Lluz», grupu que lideró nel so momentu y que tal como él mesmu indica, «paez que siguese viendo como pasu previu a "Asgaya" y nun ye ciertu. "Guxán de Lluz" -diz Junquera- foi un grupu pol que tuvi que bregar cuasi al final de manera esaxerada y poniendo trabayu, esfuerciu y empeñu que nun teníen recompensa, nin dientro nin fuera de la banda. Foi un grupu que pusu un puntu de distinción dientro del folk que se facía hace cinco o seis años n'Asturies, pero ye un error que la xente crea qu'"Asgaya" ye la continuación d'aquel proyeuto».

La idea inicial de Roberto Junquera yera encaminase, tres la disolución de «Guxán de Lluz», «hacia un proyeuto personal col mio nome y u tuviera al mio llau músicos de confianza que trabayaran sobre les mios idees. Ye un proyeuto aparcao, pero non escaecíu. Nel camín -prosigue Junquera- m'encontré cola violinista Ross Gala y tres muncho falar convencióme pa guetar una formación de grupu. Surdió entoncies "Asgaya", allá por marzu de 2005, y guetamos músicos de forma direuta, porque los conocíamos o sabíen cómo trabayaben o porque a traviés d'otros compañeros veníen recomendaos y encaxaban na llinia guetada por "Asgaya"».

La música d'Asgaya ye música tradicional d'antaño, composiciones propies, temes cantaos notablemente trataos, fusión de pieces orixinales con temes mui reconocíos del folclor ástur tán presentes n'«Escontra'l tiempu», hasta un total de doce. «Lo que'l grupu persiguió dendi'l entamu -aclara Junquera- ye la continuación d'un sonío de folk astur, mui definío y ricamente tratáu nel so momentu por "Xaréu Folk" o por "Ubiña". Nun ye casual el títulu de'"Escontra'l tiempu". Vamos daque escontra del tiempu y ritmos musicales qu'imperen nel nueso folk, que tal vez mira en excesu hacia arreglos mui célticos, mui identificables colo fecho n'Irlanda o Escocia. Vamos escontra d'estos tiempos del nueso folk que parecen aceptar solamente esa llinia melódica que a nosotros nos gusta mucho y respetamos, que tamién tiene cabida en nuestro disco, pero que preferimos que se vea dominada por aquellos soníos que ñacieron del nueso folk orixinal. Aquella conxugación de ricas voces de Marta Arbás y les gaites de Xuacu Amieva y Pangua, por exemplu».

Pese a que'l títulu del discu define la «llinia editorial y musical de'"Asgaya"» queda patente nel trabayu la pluralidá rica, equilibrada y compensada qu'ofrecen toos y cada uno de les temes. «Al tener claru'l deséu de siguir por esa llinia musical -diz Junquera- toos nos pusimos d'alcuerdo pa trabayar en común. Somos siete componentes y ente toos ensayamos les armoníes, les partes rítmiques o los acordes d'un mou parcial; cuando facemos l'ensayu global too entra en xuego y se busca encaxar les pieces aportaes por caún para dale forma definitiva. Hasta agora ha ido bien y a ello contribuye perfectamente'l qu'"Asgaya" esté formao por xente que llega de mui diversos estilos y formaciones».

Componentes

• Rosa Temprano: Voz principal
• Roberto Junquera: Gaites, Tecláu, Percusiones
• Ross Gala: Violín, Voz
• Alberto Rionda: Guitarra
• Pablo Pérez: Bouzouki
• David Adeva: Baxu
• Sergio Álvarez: Flauta, Percusiones

Discografía

Escontra'l Tiempu (2006)

1. A lo Lixeru mús Sergio Álvarez / let Rosa Temprano
2. Na Ca'l Fuau Fernando Largo
3. Basilisa Tabiernas Tradicional
4. Na Fonte mús · Ross Gala / let · Rosa Temprano
5. Reels Astures tradicional / Roberto Junquera
6. La Molinera let · Rosa Temprano / tradicional
7. Muñeires de Flórez Sergio Álvarez
8. A onde vas a dar agua tradicional
9. Añada mús Sergio Álvarez / let Rosa Temprano
10. Xuntu al Deva mús Roberto Junquera
11. 10/8 mús Sergio Álvarez / let Rosa Temprano
12. Danza de Santa Ana tradicional

Enllaces esternos

• Datos: Q13146752