Cotonou

Cotonou ye la mayor ciudá de Benín. Magar que la capital oficial ye Porto-Novo, Cotonou ye la capital económica del país y sede del so gobiernu, amás de ser, per aciu del so puertu, del so aeropuertu internacional y de les sos conexones per tren, el principal ñudu de comunicaciones del país. Oficialmente la so población yera, en 2006, de 761.137 persones; nostante, delles estimaciones estraoficiales xuben la cifra a 1.200.000 habitantes. La ciudá, asitiada nel suroeste del país, ente l'océanu Atlánticu y el llagu Nokoué, sigue medrando enforma, principalmente haza l'oeste.

Cotonou
Alministración
País	Benín
Departamentu	Littoral
Tipu d'entidá	comuna de Benín (es)
Cabezaleru/a del gobiernu	Luc Atrokpo
Xeografía
Coordenaes	6°22′N 2°25′E
Cotonou Cotonou (Benín)
Superficie	79 km²
Altitú	3 m
Demografía
Población	679 012 hab. (2013)
Porcentaxe	100.02% de Littoral
Densidá	8595,09 hab/km²
Más información
Estaya horaria	UTC+01:00
Llocalidaes hermaniaes	Taipéi, Lagos, Atlanta, Žilina, Créteil, Rosny-sous-Bois (es) , Ningbó, Xinebra y Abidjan

Historia

El nome de la ciudá quier dicir, na llingua fon, desembocadura del ríu la muerte. Al entamar el sieglu XIX Cotonou (nomáu d'aquella Kotonou) yera un pueblín de pescadores que taba embaxo l'autoridá del reinu de Dahomey. En 1851 los franceses roblaron un tratáu col rei de Dahomey Ghezo pol que se-yos permitía establecer una factoría comercial en Cotonou. Demientres el reináu del siguiente rei, Glele (1858-89), el territoriu foi cedíu a Francia por un tratáu firmáu el 19 de mayu de 1868. En 1883 l'Armada francesa ocupó la ciudá pa prevenir un intentu inglés de conquistar la zona. Pese a los intentos del fíu de Glele, Behanzin, de denunciar el tratáu que firmara so padre, nun foi quien a convencer a los franceses. De magar la ciudá foi medrando enforma hasta convertise nel mayor puertu de la rexón.

Xeografía

Cotonou ta asitiada na franxa costera que hai ente'l llagu Nokoué y l'océanu Atlánticu. La ciudá ta partida en dos por una canal, nomada llaguna de Cotonou, escaváu polos franceses en 1855. La ciudá ye, tamién, el llugar nel que'l ríu Oueme desemboca nel océanu. Esa situación-y permite tener ún de los mayores puertos del África occidental. Na ciudá ta tamién l'aeropuertu internacional Cadjehoun, que comunica la ciudá coles otres ciudaes importantes del país y con otres ciudaes africanes, amás de con París y Bruxeles. La ciudá ye, tamién, puntu de salida d'un ferrocarril que percorre'l país de sur a norte, dende Cotonou hasta Parakou, y ye tamién el centru d'un ñudu de carreteres que la comuniquen colos países vecinos.

Desembocadura del ríu Oueme

Vista del puertu de Cotonou

Economía

Cotonou ye, pola so situación y infraestructures, ún de los principales centros comerciales del África occidental, especialmente dende qu'en 2002 españó la guerra civil en Costa del Marfil. La so capital, Abidjan, perdió bien del tráficu comercial que tenía, que coló pa Cotonou. Pel so puertu entren mercancíes pal país, pero tamién pa los países de la zona que nun tienen salida al mar: Malí, Burkina Fasu y Níxer. Ye, amás, la capital económica de Benín: nella tienen la so sé les principales empreses y bancos del país, y na so rodiada alcontramos dos terceres partes de toles industries del país. Sicasí, na ciudá ta perestendida la corrupción y hai bien de comerciu illegal, principalmente cola vecina Nixeria.

Ente la industria de la ciudá rescampla la de fabricación d'aceite de palma, cementu, texíos y bebides. Hai, tamién, serreríes, y plataformes marines, cerca la ciudá, de les que se saca petroleu. Esti, xunto cola bauxita y el fierro, son dalgunes de les principales esportaciones del país. La ciudá ye, tamién, un centru importante del comerciu de coches, una y bones hai grandes esplanaes nes que se venden coches de marques europees. Va tiempu na ciudá montábense inclusive dellos coches de la marca Citroën, como'l 2CV.

Fachada de la catedral de Cotonou

Sitios d'interés

Ente los edificios de la ciudá rescamplen, ente más otros, los que vienen darréu:

• La catedral de Notre-Dame-de-Miséricorde, sede de l'archidiócesis católica de Cotonou. L'edificiu, inauguráu en 1901, rescampla ente los de la rodiada pola so decoración a franxes blanques y de color burdeos.La diócesis foi creada en 1883, magar que d'aquella dependía del vicariatu apostólicu de Benin City, en Nixeria. Dende 1955 ye sé metropolitana. El so arzobispu ye, dende agostu de 2010, Antoine Ganyé.
• La Universidá Nacional de Benín, la principal del país. Foi fundada en 1970 col nome de Université du Dahomey, que foi'l de so hasta 1975, cuando recibió el que tien anguaño: Université Nationale du Bénin. La universidá abarca 19 facultaes y escueles y tien seis campus, ente los que rescampla'l de Université d'Abomey-Calavi (UAC). En 1999 tenía 16.000 estudiantes, de los que 3.300 yeren muyeres.
• La ponte Ancien Pont (ponte antigua).
• El mercáu de Dantokpa, que ye, coles sos 20 hectárees d'estensión,una de les mayores árees comerciales del país.

Enllaces esternos

• (en francés) Cotonou ça bouge. Páxina web sobro la ciudá

• Datos: Q43595
• Multimedia: Cotonou