Día Internacional de la Llingua Materna

El Día Internacional de la Llingua Materna celébrase añalmente'l 21 de febreru en tol mundu pa concienciar sobre la diversidá llingüística y cultural y el multillingüismu. Foi proclamáu pola UNESCO'l 17 de payares de 1999. La so celebración reconocióse tamién pol Conceyu Xeneral de les Naciones Xuníes na so resolución del añu 2008 como l'Añu Internacional de les Llingües.^[1]

El Día Internacional de la Llingua Materna tuvo llugar cada añu dende febreru de 2000 pa promocionar la diversidá llingüística y cultural y el multillingüismu. La data representa'l día de 1952 cuando los estudiantes, manifestándose pola reconocencia de la so llingua, el bengalín, como una de les dos llingües nacionales del Paquistán d'entós, fueron disparaos y asesinaos pola policía en Dhaka, la capital de lo que ye agora Bangladex.

El Día Internacional de la Llingua Materna proclamóse pola Conferencia Xeneral de la Organización de les Naciones Xuníes pal Enseñu, Ciencia y Cultura (UNESCO) en payares de 1999 (30C/62). El 16 de mayu de 2009 l'Asamblea Xeneral de les Naciones Xuníes na so resolución A/RES/61/266 fai un llamáu a los Estaos Miembros «pa promocionar la conservación y la proteición de toles llingües falaes polos pueblos del mundu». Na mesma resolución, el Conceyu Xeneral proclamó l'añu 2008 como l'añu Internacional de la llingua, pa promocionar la unidá na diversidá y l'entendimientu internacional per aciu del multillingüismu y multiculturalismu.

Les llingües son les más poderoses ferramientes pa conservar y desendolcar el nuestru patrimoniu tanxible ya intanxible. Toa aición pa promocionar l'espardimientu de la llingua materna sirvirá non solo pa fomentar la diversidá llingüística y la educación multillingüe, sinón tamién pa desendolcar la conciencia más completa de les tradiciones llingüístiques y culturales al traviés del mundu y pa inspirar solidaridá basada nel entendimientu, tolerancia y diálogu.^[2]

Referencies

Enllaces esternos

[1] Asamblea Xeneral de les NN.XX., Sexaxésimuprimer periodu de sesiones, tema 114 del programa, Resolución aprobada pola Asamblea Xeneral, 61/266. Multillingüismu (A/RES/61/266)

[2] Páxina de les NN.XX. del Día Internacional de la Llingua Materna

[1]

[2]