Yiquan

Yiquan (Boxéu de la Mente) o Dachengquan (Boxéu de la Gran Realización) ye un sistema chinu d'artes marciales fundáu por Wang Xiangzhai, maestru de Xingyiquan.

Yiquan 意拳
Tamién	Dachengquan, I Chuan
Fecha de fundación	Primer terciu del sieglu XX
País d'orixe	China
Fundador	Wang Xiangzhai (1885-1963)
Métodos téunicos	Exercitamientu de les sensaciones internes y entrenamientu del combate real
Escueles proxenitores	Xingyiquan
Deporte olímpicu	Non

Historia

Dempués d'estudiar Xingyiquan con Guo Yunshen (1829-1898) cuando yera neñu, Wang Xiangzhai viaxó per China conociendo y comparando habilidaes con maestros de dellos estilos de kung fu. A mediaos de los años 1920 llegó a la conclusión de que davezu nun s’enseñaba bien el xingyiquan darréu que taba mui centráu no formal desdexando la verdadera esencia del poder marcial. Entamó a enseñar lo qu'atalantaba que yera la verdadera esencia del arte usando un nome diferente, quitando’l “xing” (forma). Wang Xiangzhai, que conocía muncho bien la teoría y hestoria del so arte, usó’l nome "Yiquan" (意拳) que yá s’usara en testos antiguos como’l "Liuhequan xu" (Antepar al Boxéu de les Seis Harmoníes, al paecer escritu por Dai Longbang), onde rezaba: "Siendo Yue Fei un neñu, recibió enseñances especiales de Zhou Tong. Llegó a ser diestru nel métodu de la llanza. Entós usó’l so arte de la llanza pa crear un métodu de boxéu, y llamólu Yi Quan. Misteriosu y fabulosu, naide tuvo enxamás arremangu talu..."

Nos años 1940 un estudiante de Wang Xiangzhai escribió un artículu sobre la so escuela y llamóla "Dachengquan" (大成拳), que vien significar “boxéu de la gran realización”. Esti nome yá nun lu diba usar Wang Xiangzhai al cabu la so vida y, d'esta miente, tres la so muerte, los sos estudiantes volvieron usar el primer nome de la enseñanza del so maestru: Yiquan.

Nos años 1930, en Shanghai, Wang estudiaba medicina y cultura con Qian Yan Tang, eruditu y médicu famosu. De Qian vieno la idea de qu'una esploración mayor del exerciciu llamáu Zhan Zhuang (“arrechu como un poste”) podía ser fundamental pal desendolcu del Yiquan. Wang pescudó sobre esta idea na biblioteca del médicu, que taba enllena de testos clásicos. Wang siempre taba cambiando la práutica y metodoloxía del Yiquan, anovando siempre basándose en principios naturales.

Carauterístiques

El Yiquan nun tien “formes” cuasimente, ello ye nun tien conxuntos fixos de téuniques o de movimientos de combate. Empara d'ello, ponse l'atención en desendolcar la forma de movese y les habilidaes de llucha del prauticante a traviés d'un sistema d'entrenamientu de métodos y conceutos, trabayando p'ameyorar la perceición del cuerpu, del movimientu y de la fuercia. El Yiquan estrémase tamién d'otres artes marciales orientales en que resalva conceutos tradicionales como qi, meridianos, dantian, etc., por mor de que pescanciar la naturaleza d'ún ye daqué qu'asocede equí y agora, y los prexuicios bloquien esti procesu.

El Yiquan tien quiciabes influyencies d'otres artes coles que Wang tuvo contautu, como la Grulla Blanca de Fujian, el Tai Chi Chuan, el Bagua Zhang, y el Liuhebafa. Asina mesmo otres téuniques, como la “postura del dragón que nada”, presente nel shiao jiao, tresfórmense per aciu de les sensaciones, entendimientu y condición del prauticante. En realidá abonden nel Yiquan movimientos y postures típicos d'otros sistemes. Yera la megolla d'estes otres artes lo que les facía efeutives, y esta megolla ye lo qu'estraxo’l maestru Wang. Esencialmente sólo hai un principiu qu'amerite la pena en toles artes marciales, una megolla, un momentu de verdá, un Puñu Natural.

Xeneralidaes

L’entrenamientu en Yiquan divídese polo xeneral en:

• Zhan zhuang (站樁) –Postura arrecha como un poste, o postura del árbol–- onde lo importante ta nel acondicionamientu natural, en trabayar p'ameyorar l'atención al cuerpu y en desendolcar Hun Yuan Li, "la fuercia vital natural" o "tolo que forma’l conxuntu".
• Shi li (試力) –Comprobar la fuercia– exercicios en movimientu, tentando de llevar a los movimientos les sensaciones d'Hun Yuan Li desenrollaes col Zhan zhuang.
• Moca bu (摩擦步) –Pasos resfregaos– Shi li pa les piernes.
• Fa li –Emisión de fuercia– una práutica que dexó Wang a lo último.
• Shi Sheng –Producir soníu cola voz– una práutica de nivel cimeru, que solamente cinca a los que yá tienen una conocencia pergrande.
• JiJi Fa –Combate real– non d'entrenamientu.

Principiu de la Naturaleza: Toa verdá y aición socede en Shunjian, un plizcatu del agora. Tolo qu'hai enantes y dempués de momentu talu ye “Wu”, el Vaciu, y, poro, incontrolable o inconcebible. Tou oxetivu y prexuiciu son fixos y non acordies con esti estáu indetermináu de la Naturaleza. "El Dao al que llamen Dao nun ye’l Dao eternu" (Lao Tzu).

Enllaces esternos

• Sobre la enseñanza de Wang Xiangzhai
• Gran Maestru Wang Xiang Zhai (1885-1963)
• Wang Xiangzhai – Principios Xenerales del Dachengquan
• Instrucciones en versu de Wang Xiangzhai pal Dachengquan
• El trabayu de pasu resfregáu Mocabu del Yiquan
• Sitiu de Han Shi Yiquan Hawaii Archiváu 2016-03-04 en Wayback Machine
• Artes Chines de la Salú, de Sifu Gregory Fong Archiváu 2011-02-21 en Wayback Machine
• Academia Beijing Yiquan, del maestru Yao Cheng Rong Archiváu 2020-11-28 en Wayback Machine
• Orange County Fight Center Archiváu 2011-07-14 en Wayback Machine
• Academia Francesa de Kung Fu Wushu y Qi Gong

• Datos: Q573249