El Garrapiellu

La Tertulia Cultural El Garrapiellu ye una asociación fundada en xineru de 1990 que tien como oxetivu la defensa y promoción de la cultura asturiana. Los socios y amigos d'El Garrapiellu trabayen pol caltenimientu y espoxigue de la Cultura propia d'Asturies y de les señes d'identidá asturianes en toles sos manifestaciones culturales: el patrimoniu artísticu, etnográficu, arquiteutónicu, y la defensa de la llingua, el folclor y la hestoria propia d'Asturies.

El País Asturianu ye como un cuerpu con elementos interconectaos y si falla unu los demás tán destinaos al desaniciu.

El pueblu qu'anguaño desconoza o desprecie lo que ye, lo que-y fai ser un pueblu ente los pueblos del mundu, tará condergáu a nun esistir, a desapaecer como coleutividá y alcontraráse relegáu a una marxinalidá política, económica y cultural mui grave que nun-y permitirá tener voz nin recursos propios de sobrevivencia. Desconocer o despreciear les propies señes d'identidá como pueblu supón anguaño cayer nun neocolonialismu y nuna absorción por otros entes más poderosos que conderguen a ese pueblu inseguru de sigo mesmu a una murnia emigración, transculturización y a un estermín. Pol contrario, un pueblu qu'estime la so cultura propia ta llamáu a ser un pueblu trunfador, pues tamién con meyores argumentos y con mayor fuercia podrá defender la so economía, industria, mediu ambiente y los sos intereses estratéxicos de tou tipu.

Mirar polo nuestro, pola nuestra Cultura Asturiana, con mayúscula, ye d'un interés vital pa tolos asturianos y asturianes d'anguaño pues nun somos dueños de la nuestra Cultura, nin de la nuestra llingua, arte o naturaleza, sinón qu'esta ayalga esiste dende muncho enantes que nós y por ello pertenez a tola humanidá y a nós lo que nos correspuende como obligación ye caltenela, guardala, curiala y tresmitila a les nueves xeneraciones d'asturianos y asturianes y ufiertala asina al mundu.

Enllaces esternos

• Datos: Q13147071