Elie Hobeika

Elie Hobeika (22 de setiembre de 1956, Keserwan ^(es)  – 24 de xineru de 2002, Beirut) foi un militar y políticu d'El Líbanu. Consideráu como ún de los organizadores y executores de la Masacre de Sabra y Chatila. Morrió nun atentáu con coche bomba en barriu beirutí d'Hazmieh.

Elie Hobeika
Miembro del Parlamento de Líbano (es)
Vida
Nacimientu	Keserwan (es) , 22 de setiembre de 1956
Nacionalidá	El Líbanu
Muerte	Beirut, 24 de xineru de 2002 (45 años)
Causa de la muerte	homicidiu
Estudios
Llingües falaes	árabe
Oficiu	políticu, militar
Creencies
Relixón	cristianismu
Partíu políticu	Falanxes Libaneses

Biografía

Según el periódicu "The Guardian", Hobeika desendolcó toles sos aiciones na Guerra Civil Libanesa influenciáu pol asesinatu de la mayor parte de la so familia y de la so moza a manes de milicies palestines na Masacre de Damour en 1976.

En 1978, tres finar los sos estudios, trabayó pal Banco do Brasil, tando ya n'aquellos díes involucráu nel partíu de les Falanxes Libaneses. Al poco d'ello treslladóse a Damascu pa continuar los sos estudios y foi ellí onde se casó con Gira Raymond Nachaty cola que tuvo un fíu de nome Joseph.

Sabra y Chatila

Durante la guerra, el cabezaleru de les Falanxes, Bashir Gemayel, yera asesináu un 14 de setiembre de 1982 por un terrorista venceyáu al gobiernu siriu según el FBI. Dos díes depués d'ello, milicianos de les Fuercies Libaneses, al mandu de Hobeika perpetraron como vengación la Masacre de Sabra y Chatila y onde s'asesinaron un númberu indetermináu de refuxaos palestinos.

Les fontes históriques calculen qu'ente 350 y 3500 palestinos morrieron aquelli día a manes de los falanxistes que cola complicidá del exércitu israelín pudo perpretala y llueu fuxir ensin degún problema.

En Mayu de 1985, nomáronlu comandante de les Fuercies Libaneses. Llueu pali que pali entamó a averase al réxime siriu que lu llevó a roblar l'Alcuerdu Tripartiu d'avientu de 1985 colos chiítes y col Partíu Socialista del Progresu. Esti pactu y la so enemistá con Samir Geagea lleváronlu a una guerra interna que finó con Geagea como cabezaleru del grupu paramilitar y con Hobeika exiliáu primeru en París y llueu en Damascu.

Carrera ministerial

Tres terminar la guerra, Hobeika entamó la so carrera ministerial nel estáu primero dientru'l gobiernu d'Omar Karami. En 1992 entró nel equipu de Rashid Solh como ministru d'Estáu pa los desplazaos, depués lo foi d'Asuntos Sociales y de persones con movilidá reducida nel gobiernu d'Hariri. Tamién foi ministru de Recursos Hídricos y Llétricos.

Foi'l fundaor del partíu Wa'ad de calter llaicu (Partíu Democráticu Nacional) col que se presentó a les eleiciones xenerales de 2000.

Asesinatu

Díes enantes de la so muerte, Hobeika dixo públicamente que tenía la intención de declarar escontra Ariel Sharon sobro la so responsabilidá na Masacre de Sabra y Chatila nun tribunal belga que lu procesara por crímenes escontra la humanidá. Hobeika morrió, xunto al so fíu y trés guardaespaldes, pol españíu d'un coche bomba'l 24 de xineru de 2002.

Munches son les acusaciones sobro quién o qué organización política o Estáu ta detrás de la so muerte. El gobiernu libanés acusó direutamente a Israel de facer esa xabazada pues Hobeika amenaciara con asoleyar dellos documentos onde s'amosaba la responsabilidá del exércitu xudíu nos fechos de Sabra y Chatila. Pola contra Israel acusó a Siria de tar detrás d'ello al considerar qu'Hobeika taba convirtiéndose nun testigu poco afayadizu pal gobiernu siriu.

Anguaño^[¿cuándo?] hai una causa xudicial abierta qu'investiga lo asocedío pero esta lleva varios años ensin avanzar nes sos investigaciones.

Referencies

• Datos: Q467879
• Multimedia: Elie Hobeika