Escultures rupestres de Dazu

Escultures rupestres de Dazu
Patrimoniu de la Humanidá — UNESCO
	Escultures nel monte Baoding.
Llugar	China
Criterios	Cultural: i, ii, iii
Referencia	912
Inscripción	1999 (XXIII Sesión)
Área	Asia y Oceanía

Les escultures rupestres de Dazu, asitiaes nel condáu de Dazu cerca de la ciudá china de Chongqing, formen una serie d'escepcionales escultures relixoses, fechaes principalmente del sieglu VII al XIV. Fueron declaraes Patrimoniu de la Humanidá pola Unesco en 1999.^[1]

Les más antigües d'estes obres daten del añu 650 pero les más destacaes fueron realizaes ente'l sieglu IX y el sieglu XII, periodu de plena espansión artística de la escultura rupestre china. En total hai 75 espacios protexíos qu'alluguen unes 50.000 estatues, inscripciones y epígrafes formaos por más de 100.000 caráuteres chinos.

Estes escultures destaquen especialmente pola gran riqueza de los suxetos representaos, tantu los relixosos como los seglares, que formen una síntesis ente'l budismu, el taoísmu y el confucianismu. Ufierten tamién una representación de la vida nesa dómina, tantu de los príncipes y personaxes públicos como de la xente modesto.

Tán partíes nos lladrales de cinco montes serrapatoses de la contorna de Dazu:

Monte Bei (Bei Shan): un cantil de 300 metros de llargor alluga más 10.000 escultures. Más de la metá representen temes venceyaes al budismu tántrico.
Monte Baoding (Baoding Shan): esti llugar, asitiáu en cantu d'un gargüelu en forma d'O, alluga dos grupos d'escultures consideraes como l'apoteosis de la escultura rupestre china. Destaca'l Avalokitesvara de los 1.000 brazos (en realidá son 1.007).
Monte Nan (Nan Shan): el llugar alluga escultures del sieglu XII qu'amuesen especialmente temes taoístes.
Monte Shizhuan (Shizhuan Shan): equí atópense escultures de finales del sieglu XI que representen de manera separada imáxenes budistes, taoístes y confucionistas.
Monte Shimen (Shimen Shan): nesti llugar hai escultures de la primer metá del sieglu XII que representen temes taoístes y budistes.