Escudu del Conseyu d'Asturies y Lleón

Dende la proclamación del Conseyu Interprovincial d'Asturies y Lleón, el 6 de setiembre de 1936, hasta la tresformación d'esti en Conseyu Soberanu d'Asturies y Lleón el 25 d'agostu de 1937, y dementres la vida operativa d'esti últimu, emplegáronse diferentes variantes heráldiques pa representar a l'alministración llegal del territoriu recién formáu. Les emisiones de moneda y timbre que les autoridaes republicanes asitiaes na capital, Xixón, fueron capaces de diseñar, emprentar y poner en condiciones de circulación sumen un total de siete modelos diferentes. Con tantes variantes ye esperable qu'haiga una bayura de detalles y matices qu'aporten interés al estudiu del emblema d'esta efímera institución, pero tamién hai los suficientes puntos en común ente ellos como pa reconocer aquello que queríen representar.

Escudu del Conseyu d'Asturies y Lleón
Datos
Estáu	IIª República Española Conseyu Soberanu d'Asturies y Lleón
Propietariu	Conseyu Interprovincial d'Asturies y Lleón Conseyu Soberanu d'Asturies y Lleón
Fecha d'adopción	1936

Versión del escudu del Conseyu d'Asturies y Lleón ensin l'enramáu de carbayu y lloréu.

Semeyances

• Siempre apaecen les dos provincies representaes en dos escudos separaos.
• Nos escudos correspondientes a Asturies, ésta represéntase con una esquemática Cruz de la Victoria que lleva les lletres griegues alfa y omega mayúscules pendientes de caún de los brazos de la cuz.
• Nos escudos correspondientes a Lleón, ésta represéntase con un lleón rampante coronáu d'una corona mural y lleopardáu (col rau paralelu al llombu y la punta del mesmu apuntando a la so retaguardia).

Variantes

• Nel billete de 100 pesetes emitíu pol Bancu d'España de Xixón en setiembre de 1937 y que nun circuló, represéntense a cada provincia, embaxu del escudu de la República Española, en sendos escudos (Asturies a mandrecha y Lleón a manzorga) terciaos hacia l'esterior, ovalaos, separaos 35º de la exa vertical y ensin sustenes.
• Nel billete de 50 pesetes emitíu pol Bancu d'España de Xixón en setiembre de 1937 y que nun circuló, represéntense a cada provincia, embaxu del escudu de la República Española, en sendos escudos de tipu español (Asturies a mandrecha y Lleón a manzorga), acolaos.
• Nos billetes de 2 y 1 pesetes emitíos pol Conseyu d'Asturies y Lleón en 1936, represéntense a cada provincia, como marca d'agua, con sendos escudos (Asturies a mandrecha y Lleón a manzorga) ovalaos, terciaos hacia l'esterior y separaos 20º de la exa vertical, con dos rames enllazaes, una rama de carbayu y otra de lloréu, susteniendo l'escudu d'Asturies y el de Lleón respeutivamente, timbraos d'una corona mural.
• Nos billetes de 50 céntimos emitíos pol Conseyu d'Asturies y Lleón en 1936, represéntense a cada provincia, como marca d'agua, con dos escudos timbraos caún de corona mural, terciaos hacia l'interior, ovalaos y separaos 15º de la exa vertical. L'escudu lleonés, susteníu por una rama de carbayu, na esquina inferior izquierda del billete y l'asturianu, susteníu por una rama de lloréu, na esquina inferior drecha.
• Nos billetes de 40 y 25 céntimos emitíos pol Conseyu d'Asturies y Lleón en 1936, represéntense a cada provincia, como marca d'agua, con dos escudos timbraos caún de corona mural, terciaos hacia l'interior, ovalaos y separaos 25º de la exa vertical. L'escudu asturianu, susteníu por una rama de lloréu, na esquina inferior izquierda del billete y el lleonés, susteníu por una rama de carbayu, na esquina inferior drecha.
• En dellos sellos de 5 céntimos emitíos pol Conseyu d'Asturies y Lleón, represéntense a cada provincia en dos escudos (Asturies a mandrecha y Lleón a manzorga) de tipu francés modernu terciaos hacia l'esterior, separaos 15º de la exa vertical, ensin sustenes y timbraos d'una corona mural.
• En dellos sellos de 5 céntimos emitíos pol Conseyu d'Asturies y Lleón, represéntense a cada provincia en dos escudos (Asturies a mandrecha y Lleón a manzorga) de tipu francés modernu terciaos hacia l'esterior, separaos 5º de la exa vertical, ensin sustenes y timbraos d'una corona mural.

Ver tamién

• Conseyu Soberanu d'Asturies y Llión

Enllaces esternos

• Datos: Q97227281