Wikipedia

Juana Álvarez Molina

Juana Álvarez Molina (1897, Medina de Rioseco – 15 d'avientu de 1937, Xixón) foi una ama de casa española víctima de la represión franquista que foi condergada a muerte y fusilada en Xixón.

Juana Álvarez Molina
Vida
Nacimientu Medina de Rioseco, 1897
Nacionalidá España
Muerte Xixón, 15 d'avientu de 1937 (39/40 años)
Causa de la muerte mancada por arma de fueu
Oficiu ama de casa
Cambiar los datos en Wikidata

Biografía

editar

Juana Álvarez nació na llocalidá de Medina de Rioseco (provincia de Valladolid). Yera fía de María y Estanislao.[1] Vecina de Xixón, dedicóse a los sos llabores, casó con Luis Laruelo y tuvo siete fíos.[1][2] El so home yera un líder republicanu, miembru del sindicatu El Fieltro dientro de la Confederación Nacional del Trabayu y tamién del Comité de Control de la fábrica de sombreros de La Calzada "La Sombrerera".[1][2][3][4] Esti comité apoderárase de la fábrica mientres la guerra civil española y empobinada la so producción.[4] Laruelo consiguió fuxir a Francia nunu de los últimos barcos que salió del puertu d'El Musel yá que yera buscáu polos dueños de la fábrica la familia Paquet, y polos xerentes, los García Rendueles, dos poderoses families xixoneses.[3][5]

Mientres, el 25 de payares de 1937, Álvarez foi detenida polos nacionales na cai Oriental, en La Calzada, so l'acusación de participar en requisamientos y manifestaciones.[2][5] Foi col enfotu de consiguir que'l so home s'entregara.[5] El 2 d'avientu d'ese mesmu añu, foi sometida nel Antiguu Institutu Xovellanos de Xixón a un conseyu de guerra onde la condergaron a muerte.[2][6] El motivu real foi nun revelar el llugar nel que s'escondía'l so home, un fechu que Álvarez desconocía, dao que nun sabía que llograra fuxir a Francia.[1][2][7][8]

Foi executada por fusilamientu'l 14 d'avientu de 1937 a los 40 años.[2] Nel so treslláu al paredón, Álvarez enferronóse con tanta fuerza a les barres del autobús que se diz que los guardies tuvieron que corta-y una mano cola bayoneta para poder desprendela.[2][4][5] El so cuerpu foi refundiáu a una fuesa común nel campusantu de Ciares de Xixón.[6] Al pie d'ella, tamién fusilaron a Felicísimo García Casas de 24 años, un vecín d'Urdiales del Páramo, en La Bañeza, que cruciara a la zona republicana.[2] Nel momentu de la so muerte, los fíos mayores d'Álvarez llucharen como milicianos na guerra y el más pequeñu tenía unos seis años.[4][5]

Reconocencies

editar

El 14 d'abril de 2010, incluyóse nun monolitu homenaxe nel campusantu de Ciares de Xixón el nome d'Álvarez, onde que se recueyen les 1.934 víctimes de la represión franquista na ciudá.[9]

En 2017, descubrióse una placa enfrente del Muséu Nicanor Piñole, Antiguu Asilu Pola, n'homenaxe a les ocho muyeres represaliaes pol franquismu en Xixón entre avientu de 1937 y agostu de 1939.[7][10] Na placa, amás del nome d'Álvarez, incluyéronse los d'Eladia García Palacios, Anita Vázquez Barrancúa, Estefanía Cueto Puertas, Belarmina Suárez Muñiz, Anita Orejas, Teresa Santianes de Molenes Giménez y Máxima Vallinas Fernández.[7][10][11]

Bibliografía

editar
  • Ortega Valcárcel, M. Enriqueta. 1994. La represión franquista en Asturias. Ejecutados y fallecidos en la cárcel del Coto, Gijón. Avilés. Azucel, D.L. 84-86546-51-6.

Referencies

editar
  1. ↑ 1,0 1,1 1,2 1,3 Laurelo Roa, Marcelino. La Libertad es un bien muy preciado. Consejos de Guerra, páx. 25. Consultáu'l 8 de mayu de 2021.
  2. ↑ 2,0 2,1 2,2 2,3 2,4 2,5 2,6 2,7 «En HOMENAJE a las MUJERES REPUBLICANAS TORTURADAS y ASESINADAS por fusileros franquistas en las tapias del cementerio de Gijón» (castellanu). RecueRda RepúBlica, documento memoria (2017-10-01). Consultáu'l 2021-05-08.
  3. ↑ 3,0 3,1 Álvarez, Alicia (2017-04-19). «"Hay que recuperar la historia de la República y de las mujeres que lucharon por ella"» (castellanu). Cadena SER. Archiváu dende l'orixinal, el 8 de mayu de 2021. Consultáu'l 2021-05-08.
  4. ↑ 4,0 4,1 4,2 4,3 «ELADIA GARCÍA PALACIOS Y SIETE MUJERES MÁS» (castellanu). Consultáu'l 2021-05-08.
  5. ↑ 5,0 5,1 5,2 5,3 5,4 «Asturias Republicana - SEGUNDA REPUBLICA». www.asturiasrepublicana.com. Archiváu dende l'orixinal, el 8 de mayu de 2021. Consultáu'l 2021-05-09.
  6. ↑ 6,0 6,1 «Mujeres «condenadas de antemano»» (castellanu). El Comercio (2017-07-27). Consultáu'l 2021-05-08.
  7. ↑ 7,0 7,1 7,2 «Homenaje a las ocho mujeres republicanas fusiladas en la ciudad» (castellanu). La Voz de Asturias (2017-04-18). Consultáu'l 2021-05-05.
  8. ↑ «Una placa junto al antiguo Asilo Pola recordará a las republicanas fusiladas en Gijón» (castellanu). El Comercio (2017-04-17). Consultáu'l 2021-05-08.
  9. ↑ «Un monolito homenajea en el cementerio de Ceares a las víctimas de la represión franquista» (castellanu). El Comercio (2010-04-14). Consultáu'l 2021-05-05.
  10. ↑ 10,0 10,1 ««A mi madre la mataron porque alguien la vio con un pañuelo rojo y una pistola»» (castellanu). El Comercio (2017-07-25). Consultáu'l 2021-05-05.
  11. ↑ Ceínos, J. M. (2017-07-27). «La plaza de Europa ya guarda recuerdo de las mujeres republicanas» (castellanu). La Nueva España. Consultáu'l 2021-05-05.

Enllaces esternos

editar
Sacáu de «https://ast.wikipedia.org/w/index.php?title=Juana_Álvarez_Molina&oldid=4302620»