Estilu Yang de tai chi chuan

L’estilu Yang de tai chi chuan ye dientro d'esti arte’l más popular y el más prauticáu anguaño nel mundu, y el segundu más antiguu de los cinco estilos familiares principales del Tai Chi Chuan.

Demostración del estilu Yang

Historia editar

La familia Yang entamó a rellacionase col estudiu del tai chi chuan a primeros del sieglu XIX. El fundador del estilu Yang foi Yang Luchan, tamién conocíu como Yang Fukui (1799–1872), qu'estudió con Chen Changxing dende 1820. Yang convertióse en maestru reconocíu, y de resultes la so espresión del tai chi chuan principió a conocese como l'estilu Yang, qu'había llevar direuto al desendolcu d'otros tres estilos principales de tai chi chuan. Yang Luchan (y hai quien diz que l'arte del tai chi chuan en xeneral) algamó nomadía per aciu de que lu contratara la familia imperial china pa enseñar tai chi chuan a los guardies imperiales del batallón de palaciu en 1850, una posición que caltuvo hasta la so muerte[1].

Yang Luchan tresmitió l'arte a:

  • El so segundu fíu (masque’l primeru en llegar a la madurez), Yang Banhou (1837–1890), que foi tamién emplegáu como instructor d'artes marciales pola familia imperial china. Yang Banhou convertióse nel maestru formal de Wu Quanyu, un oficial abanderáu de la caballería manchú del batallón de palaciu, anque primero ésti fuera discípulu de Yang Luchan. Wu Quanyu foi’l primer discípulu que tuvo Yang Banhou. El fíu de Wu Quanyu, Wu Jianquan, tamién oficial abanderáu, llegó a ser conocíu como cofundador (xuntamente col padre) del estilu Wu.
  • El so tercer fíu, Yang Jianhou (1839–1917), que lu tresmitió a los sos fíos Yang Shaohou (1862–1930) y Yang Chengfu (1883–1936).
  • Wu Yuxiang (1813–1880), que tamién desendolcó’l so propiu estilu Wu/Hao, qu'había llevar, al cabu de tres xeneraciones, al desendolcu del estilu Sun de tai chi chuan.

Yang Chengfu quitó l'enérxicu Fa-jing (發勁 lliberación de poder) de la forma de mano en solitario, asina como’l saltu enerxéticu, patiar, y otros movimientos bruscos al envís de centrase nel Ta Chia (大架 estilu d'estructura grande), pero dexólos nes formes d'armes (espada, sable, palu y llanza). La forma de mano tien movimientos lentos, regulares, espandíos y suaves que presten a los prauticantes en xeneral. D’esta miente Yang Chenfu ye’l máximu responsable d'estandarizar y popularizar l'estilu Yang de tai chi chuan tan ampliamente prauticáu anguaño.

Formes curties editar

Dizse que les formes curties de Cheng Man Ching (Zheng Manquing) y la Comisión China de Deportes deriven de formes de la familia Yang, masque nun seya reconocíu como tai chi chuan de la familia Yang polos actuales maestros de la familia. Les families Chen, Yang y Wu promueven agora les sos propies formes acurtiaes de demostración en visu a les competiciones.

Yang Chengfu tamién desendolcó la so propia versión acurtiada de la forma llarga yang en visu a poder aprendela más fácilmente a los estudiantes actuales que tienen una vida moderna perocupada. Magar que la encurtiara, Yang Chengfu foi a caltener la esencia de la forma llarga de Yang.

Recién, el gobiernu chinu tamién encargó formes curties de 16 movimientos de caún de los cinco estilos principales. Anque les Formes de 16 enseñáronse una temporada, toles families presentáronles como un tou a los asistentes del Primer Aconceyamientu Internacional de Tai Chi Chuan en Nashville, Tennessee, en xunetu del 2009.[2]

Carauterístiques editar

El Tai Chi Chuan consiste sobre too n’estudiar un conxuntu de movimientos llamáu secuencia o “forma”, que ye obligao realizar siempre en combinación con una respiración acionada. Ente les carauterístiques principales tán la lentitú, la circularidá, la suavidá y l'harmonía de los movimientos. Nun se riquen dotes o habilidaes físiques especiales en cuantes que ye la disciplina la que s’adauta al prauticante (calteniendo sicasí los puntos clave nel camín de la práutica) y non al aviesu. La práutica del Tai Chi Chuan procura al organismu una restrayada de beneficios tanto físicos como síquicos. A nivel físicu, el cambéu lentu, controláu y continuu de la postura trai arreyáu, ensin dulda, un ameyoramientu del equilibriu y del sistema articular en conxuntu, asina como induldables beneficios nel planu respiratoriu. Ameyoramientos asemeyaos cinquen al componente sicolóxicu de la persona, que tien d'algamar un estáu mental siempre relaxáu.

L’estilu Yang de tai chi chuan caltién toles carauterístiques d'ataque y defensa (golpes col puñu, mano abierta, pataes, palanques) del arte marcial que ye, pero estes foron atapaes cuciamente pa facelu, a primer vista, asemeyáu a una ximnasia. Al efeutu los movimientos execútense de forma lenta y regular, pero la so aplicación ha ser rápida y esplosiva, dexando al contrariu ensin posibilidá de contratacar. Diz una vieya sentencia del Tai Chi Chuan: "si él nun se mueve yo nun me muevo, pero si él ataca yo llego primero". Nos niveles altos, por mor de que nun s’usa la fuercia muscular sinón la enerxía interno, ta tamién previsto estudiar los puntos de presión o zones febles. Ye la combinación natural d'un arte marcial y un métodu pa caltener una salú bona. Al mesmu tiempu coordina y alterna movimientos abegosos con otros más cenciellos, y esta combinación amañosa permite que’l prauticante se sienta a los sos deleres, inclusive cuando la forma s’executa una vuelta tres d'otra. Adáutase a toles edaes y nun precisa capacidaes especiales, siendo pa satisfacer munches necesidaes estremaes. La so práutica apareya beneficios por demás, tanto dende’l puntu de vista enerxéticu-postural como dende l'aplicativu-marcial.

En fin y en pos, ye una disciplina que si se prautica lentamente conviértese nuna perfeuta ximnasia sicofísica pero que, prauticada con velocidá y utilizando la enerxía interno tamién de forma esplosiva, ye un arte marcial.

Referencies editar

Enllaces esternos editar