Eusebio Figueroa Oreamuno

Eusebio Figueroa Oreamuno (mayu de 1827, Cartago – 1883, San Xosé) foi un políticu y abogáu costarricense. Nació en Cartago, Costa Rica, en mayu de 1827. Los sos padres fueron Antonio Figueroa y Álvarez y Ramona Estefanía Oreamuno y Jiménez, fía de Joaquín de Oreamuno y Muñoz de la Trinidá, Comandante Xeneral de les Armes en marzu de 1823. Casóse con Cristina Espinach Bonilla.

Eusebio Figueroa Oreamuno
Vida
Nacimientu	Cartago, mayu de 1827
Nacionalidá	Costa Rica
Muerte	San Xosé, 1883 (55/56 años)
Oficiu	políticu, xuez

Estudios

Cursó estudios na Universidá Oriental de Nicaragua, onde llogró'l grau de Doctor en lleis.

Cargos públicos en Nicaragua

Foi Asesor del Consuláu de Comerciu, Fiscal Xeneral del Exércitu, Redactor de la Gaceta Oficial y miembru de la Cámara de Representantes, Secretariu de les Llegaciones de Nicaragua en Guatemala y Francia y Ministru Plenipotenciario de Nicaragua en dellos países de Centroamérica.

Cargos públicos en Costa Rica

Foi redactor de la Gaceta Oficial, Ministru de Costa Rica n'El Salvador en 1863, Fiscal y Maxistráu de la Corte Suprema de Xusticia, Secretariu de Gobernación y carteres amiestes de 1868 a 1869, Vicepresidente de l'Asamblea Constituyente de 1869, y Primer Designáu a la Presidencia de 1869 a 1870, Encargáu interín de la Presidencia del 21 al 22 de mayu de 1869, Ministru de Costa Rica n'Europa de 1869 a 1870 y Secretariu de Rellaciones Esteriores y carteres amiestes de mayu de 1883 hasta la so muerte.

Presidente de la Corte Suprema de Xusticia

El 1° d'agostu de 1876 foi designáu pol Presidente Vicente Herrera Zeledón como Maxistráu de la Corte Suprema de Xusticia de Costa Rica, pero como'l Presidente designáu, Vicente Sáenz Llorente, tornó'l cargu, el 3 d'esi mesmu mes foi nomáu como titular de la Presidencia del altu tribunal. Foi reelixíu como Presidente de la Corte n'ochobre de 1877 pol Gran Conseyu Nacional y desempeñó el cargu hasta ochobre de 1878.

Otres actividaes

Foi Caderalgu de Derechu, miembru de la Direición d'Estudios y Rector (1866-1867 y mayu-xunu de 1883) de la Universidá de Santu Tomás. Promovió la fundación del Colexu d'Abogaos de Costa Rica, del que foi'l primer Presidente (1881).

Muerte

Morrió en San Xosé, Costa Rica, el 11 d'agostu de 1883, en duelu col Ministru Plenipotenciario de Costa Rica n'España, León Fernández Bonilla.

Ver tamién

• Llistáu de los Presidentes de la Corte Suprema de Xusticia de Costa Rica

Enllaces esternos

• Datos: Q5414228