Grau Fahrenheit

La escala Fahrenheit ye una escala de temperatura basada nuna propuesta en 1724 pol físicu alemán nacíu en Polonia Daniel Gabriel Fahrenheit (1686–1736), del que recibe'l so nome^[1].

La escala usa el grau Fahrenheit, que'l so símbolu ye °F, como unidá. La escala, como foi definida pol so autor, tien dellos fitos que la definen. El cero de la escala (0 °F) represéntalu la temperatura d'una salmuera fecha, en partes iguales, por xelu y sal. Otros fitos importantes na escala son el puntu de fusión de l'agua, 32 °F, y la estimación de la temperatura media del cuerpu humanu, definida por Fahrenheit en 96° pero correxida por mediciones modernes hasta establecela en 98,6 °F^[2]. Anguaño la escala defínese xeneralmente por dos puntos: el de fusión de l'agua (32 °F) y el d'evaporación d'esta en condiciones atmosfériques normales y al nivel del mar (212 °F). Hai, poro, 180 °F de separación ente esos dos puntos.

A finales del sieglu XX esta escala ye la escala oficial de midición de temperatures namái nunos pocos países: Estaos Xuníos, los sos territorios non incorporaos, los sos estaos llibres asociaos del Pacíficu (Islles Márxal, Paláu y los Estaos Federaos de Micronesia), Les Bahames, Belize y les Islles Caimán. Los demás países usen darréu la escala Celsius.

Definición y conversión editar

El puntu de fusión de l'agua vien marcáu, nesta escala, pol valor de 32 °F, mentantu que'l puntu de bullidura d'esta ye 212 °F. Esto fai que la diferencia ente dambos seya de 180°, y lleva a definir el grau Fahrenheit como 1⁄180 del intervalu ente'l puntu de fusión de l'agua y el so puntu de bullidura. Na escala de Celsius esti intervalu ye de 100°, y poro, un intervalu de temperatura de 1 °F ye equivalente a 5⁄9 °C. Les dos escales crúcense a −40°: −40 °C y −40 °F son la mesma temperatura, y el cero absolutu tien un valor nesta escal de −459,67 °F.

Pueden usase estes fórmules pa una conversión exacta ente les dos escales...

Fahrenheit a Celsius: $({}^{\circ }\mathrm {F} -32)\div 1,8={}^{\circ }\mathrm {C}$
Celsius a Fahrenheit: $({}^{\circ }\mathrm {C} \times 1,8)+32={}^{\circ }\mathrm {F}$

...y tamién estes otres, qu'aprovechen pa facer les operaciones aritmétiques el puntu de cruce de les dos escales a −40°.

Fahrenheit a Celsius: $(({}^{\circ }\mathrm {F} +40)\div 1,8)-40={}^{\circ }\mathrm {C}$
Celsius a Fahrenheit: $(({}^{\circ }\mathrm {C} +40)\times 1,8)-40={}^{\circ }\mathrm {F}$

Referencies editar

Enllaces esternos editar

[1] Balmert, Robert T., Modern Engineering Thermodynamics, p.9. Academic Press, 2010. ISBN 978-0-12-374996-3.

[2] Entrada "Escala de temperatura Fahrenheit" na Encyclopedia Britannica Online (n'inglés)

[1]

[2]