Familia romana

La familia romana foi una institución civil y relixosa de l'Antigua Roma que más o menos se correspuende colo qu'anguaño entendemos por familia nuclear. Baxo'l nome de familia civilis (en llatín familia civil) entendíase la familia como una composición del padre (pater familias), la madre, los fíos, los esclavos ya inclusive'l mobiliariu domésticu.

Cada familia civil tenía a la cabeza un pater familias que yera'l padre más vieyu de la casa, esto ye, non necesariamente'l padre d'unos fíos, sinón aquel home de quien el pá yá morriera, heredando asina'l títulu y los derechos del pater familias. Ser pater familias diba venceyao a la condición de ciudadanu romanu y, por tanto, de ser un home llibre. El pater familias yera'l xefe de la familia, el sacerdote principal d'ésta y tenía una serie de derechos (potestates) sobre'l restu miembros de la familia.

Estatus de cada miembru de la familia

Dientro de la familia los miembros podíen selo por alieni iuris (derechu ayenu) o por sui iuris (derechu propiu, lliteralmente derechu de sigo mesmu). Los miembros sui iuris son los patres familias y tienen una serie de derechos sobre'l restu los miembros, a saber:

• Dominica potestas: derechu sobre los esclavos.
• Patria potestas: derechu sobre los fíos, con potestaes como, por casu, sobre la so vida o muerte, casalos, abandonalos ensin reconocelos o mancipalos (prestalos como esclavos).
• Manus: derechu sobre la muyer.
• Mancipium o Iura patronatus: derechu d'un home llibre sobre otres persones llibres.

Distinción ente gens y familia

Esquema de la familia romana. Los cognaos son los parientes de sangre por parte de la madre (y, por tanto, sacantes la madre nun son de la propia gens) y los agnaos los parientes de sangre por parte de padre (y, por tanto, la mayoría son de la propia gens).

La gens (llat.: gens, gentis) ye l'agrupación de diferentes families civiles colos sos patres familias na tiesta, que tienen raigaños comunes. Correspuéndese colo qu'anguaño entendemos por familia nel sentíu ampliu, incluyendo miembros d'otres cases baxo l'autoridá d'otru padre.

Orixinalmente, según F. Engels, la gens ye'l grupu natural al que pertenecen les persones y que supunxo la primer división por sangre de la sociedá. Esta institución yera poseedora de propiedaes, desendolcó cultos relixosos propios y afitó con quién se consideraba adecuao reproducise o non, esto ye, daba sentíu al conceptu d'incestu.

Na Antigua Roma sobrevive esta institución -anque perdió munchu protagonismu yá na dómina histórica y siguirá perdiéndolu col pasu del tiempu- en forma de zones d'enterramientu común pa los miembros de la gens y derechos d'herencia dientro d'ella (restos de l'antigua propiedá común a tola gens), un nomen común a toa ella (lo que pa nós sería l'apellíu) o unos cultos propios (sacra gentilicia).

La gens pierde protagonismu frente a la institución de la familia civilis que surde al comprender los padres colos miembros baxo la so potestá como una unidá propia. Del mesmu xeitu que la gens comparte un nomen, cada familia caracterízase dientro d'esta gens por mediu del cognomen (que da n'asturianu coñome). La gens acaba dándose por estinta yá na dómina de Gayo nel sieglu II d.C.

Ser miembru d'una gens

Una persona pasa a formar parte d'una gens (y, por tanto, d'una de les familiae civiles que la formen) de trés maneres diferentes:

• Por nacimientu: Non sólo ye preciso nacer nuna familia pa formar parte d'ella, sinón qu'además al ñácaru tien que lu reconocer el padre. En casu contrariu, los padres tienen drechu a abandonar a los fíos recién nacíos. D'esti xeitu, na Antigua Roma yera normal atopar guaḥes abandonaos na cai, cerca de les fontes, cola basura, etc, y podíen quedar ehí hasta morrer o, como tamién pasaba davezu, daquién llevábalos y criábalos como esclavos. Si se reconocía al ñácaru, esti formaba parte automáticamente de la familia civilis encabezada pol padre y por tanto de la mesma gens.
• Por matrimoniu: la sociedá romana yera una sociedá patrilinial en que la gens vien marcada por llinia masculina. D'esta miente, los fíos que se reconocen nuna familia formen parte de la gens del padre, y, como ellos, tamién les muyeres. Una muyer reconocida y criada con una familia forma parte de la gens del padre hasta que, por mediu del matrimoniu, el padre pásala de la so gens orixinal a la del futuru maríu. La muyer pasa, por tanto, de tar baxo la potestá del padre (patria potestas) a la potestá del maríu (manus) y a formar parte de la so gens. Darréu que la herencia de propiedaes namás pue dase dientro d'una gens y que'l nomen ye propiu d'una gens (un "apellíu"), la muyer pasa a perder drechu a heredar de los sos parientes de sangre y garra'l nomen de la gens a la que pasa.
• Por adopción: dende antiguo ta atestiguada la institución de l'adopción ente los romanos. De fechu, a diferencia de na actualidá, nun yera preciso que l'adoptáu fuera un nenu, sinón que mesmo un home sui iuris podía adoptar a otra persona llibre a cualquier edá, xeneralmente siendo ésta menor que l'adoptante. Un casu perconocíu ye'l de Cayo Xulio César, quien adoptó a Octaviano, que pasó de la gens Claudia a la gens Xulia y pasó a llamase Cayo Xulio César Octaviano (ex-Octavio), más alantre tamién con un adnomen Augusto, y que foi'l primer emperador de Roma.

Praeomen, nomen y cognomen

Cada ciudadanu romanu tien trés nomina (nomes), qu'entren en rellación colos conceptos de familia y gens.

• Praenomen: ye'l nome del individuu dientro de la familia y la gens. Había una serie de pocos nomes en Roma que se repetíen enforma. Según fueron incorporando xente d'otres etnies a la ciudadanía romana, el númberu de praenomina fue ampliando. Esta pallabra tien derivaos nes llingües romances como prenom en francés (nome de persona).
• Nomen: ye'l nome de la gens, análogu del nuestru apellíu. Esti nome compartíenlu tolos miembros d'una gens, formen parte d'ésta a través de nacimientu, matrimoniu o adopción. Un esclavu lliberáu (llibertu) tamién podía adoptar el nomen y praenomen del dueñu. Esta pallabra deriva nes llingües romances como nome (ast., gallego-portugués), nom (catalán/valencianu, francés, etc), nombre (castellán), etc.
• Cognomen: Nun principiu, el cognomen ye'l nome de la familia civilis pa diferenciala dientro la gens, normalmente garren algún rasgu visible de los miembros. Sicasí, col pasu del tiempu tamién sirvió pa carauterizar a un individuu en particular. Esta pallabra deriva nel asturianu coñome (sinónimu de nomatu).
  • Adnomen: En dellos casos, un home podía tener tamién un adnomen que yera una especie de nomatu qu'alquiere a lo llargo de la so vida por algún fechu especial. Por exemplu, el perconocíu Publio Cornelio Escipión Africanu recibió l'adnomen d'Africanu poles sos xestes n'África.

El nome de la muyer

La muyer nun principiu llevaba simplemente el praenomen del padre, si ye la primer fía, el restu podíen llevar numberales ordinales (Secunda, Tertia, Quinta...). Col pasu del tiempu, empiecen a llevar tamién el nomen de la familia y nos anicios del imperiu yá lleven con normalidá el nomen con un nome característicu individual. Na dómina imperial lleven el nomen de la gens y el cognomen del padre en femenín.

Divinidaes de la familia

Lar de bronce del sieglu I (M. A. N., Madrid).

La familia romana, igual que la gens, ye tamién una institución relixosa con una serie de cultos más o menos reglaos que tienen como sacerdote al pater familias. Los trés tipos principales de divinidá que s'adoren dientro d'una familia son:

• Penates: proteutores de la casa y concretamente l'almacén.
• Los lares domestici: que s'identifiquen colos fundadores de la gens. Esta pallabra ye la que da resultáu llar.
• Los Manes: almes de los antepasaos y otros miembros muertos de la familia.

Matrimoniu

El matrimoniu (en llatín matrimonium, coniugium o consortium) ye'l métodu de perpetuar una gens por aciu de la descendencia. A diferencia del conceptu modernu del matrimoniu, na Antigua Roma hasta edá tardía el matrimoniu yera una institución civil y relixosa que nun taba venceyada como tal al amor, sinón a la reproducción. Darréu d'esto, el matrimoniu namás yera posible entre un home (vir) y una muyer (uxor), ya inclusive hubo restricciones pa homes que tuvieran castraos.

Según el xurista romanu Modestino, el matrimoniu ye:

Nuptiae sunt coniunctio maris et feminae, et consortium omnis vitae, divini et humani iuris communicatio [Les nupcies son la xunión del home y la muyer, el consorciu de toa una vida, la comunicación ente'l derechu humanu y divinu]. - Modestin., D., 23, 2, 1.

Nun principiu el matrimoniu namás yera posible ente ciudadanos romanos, pero col tiempu fue abriéndose tamién a ciudadanos llatinos (socii) ya incluso llegaron a producise especies de rellaciones "paramatrimoniales" como'l connubium ente ciudadanos romanos y non ciudadanos.

Pa qu'un matrimoniu fuera efectivu necesitaba qu'home y muyer superaran la pubertá, que nun fueran de la mesma gens y que los dos tuvieran el consentimientu de los respeutivos patres familias. Inicialmente'l matrimoniu podía ser concertáu, pero na dómina imperial requería'l consentimientu de los novios. El matrimoniu en Roma comportaba una dote, que yera un patrimoniu (dineru, ganáu, bienes, etc) que'l padre de la novia entregaba al futuru maríu. En casu de divorciu, esti tenía que devolve-y al padre la dote xunto cola muyer.

Tipos de matrimoniu cum manu

Usus

L'usus ye'l más antiguu y preséntase como los restos d'antiguos rituales, nesti casu el raptu con violencia, qu'amás tenía un simbolismu especial na Antigua Roma por recordar el capítulu del Raptu de les Sabines.

Esta forma de matrimoniu, con mui poca parafernalia, consistía en caltener a la muyer en casa de forma ininterrumpida per un añu, pero si la muyer pasaba trés nueches fuera que nun fuera a final d'añu, quedaba disueltu.

Coemptio (Compra)

La pallabra coemptio (del verbu coemo, comprar) fai referencia a un tipu de matrimoniu en qu'un pater familias vendía la fía a otru home pa que casaran. Esta tradición de la compra ye bastante primitiva y col pasu del tiempu quedó de forma simbólica, esto ye, el maríu nun compraba como tal a la muyer.

Confarreatio

El so nome vien del pan fárreo (vid. farina), esto ye, pan de trigu que se presenta nun ritu a Xúpiter Farreu cola presencia del Flamen Dialis, que ye l'altu sacerdote de Xúpiter. Esti tipu de matrimoniu yera más bien propiu de los patricios y tenía mayor parafernalia. Teniendo un papel más sagráu que'l restu, el divorciu yera más complicáu nesti tipu de matrimoniu.

Matrimoniu sine manu

El matrimoniu sine manu (ensin manus) ye aquel en que'l maríu nun recibía la potestá del manus, ye dicir, potestá sobre la muyer. Nun tien un impautu xurídicu tan grande como les otres formes de matrimoniu y, de fechu, la muyer nun pasaba a la gens del maríu, polo tanto nun solo nun quedaba baxo la potestá d'otru pater familias sinón qu'amás tampoco tenía drechu a heredar si morría el maríu, darréu que la herencia namás pue ser posible dientro de la propia gens.

Esti tipu de matrimoniu ye más modernu y acaba xeneralizándose más col pasu del tiempu, sobremanera na dómina imperial.

Concubinatu

Xunto al matrimoniu, existía tamién la institución del concubinatu, que consistía en qu'una muyer viviera con un home de forma asemeyada a la d'una esposa pero sin tener nenguna fidelidá recíproca. Esto inclúi, darréu d'ello, la falta de manus y ye un tipu d'unión perfectamente disoluble.

Esta institución yera escluyente col matrimoniu, esto ye, un home nun podía tener una concubina y una esposa al empar. Tampoco podía haber varies concubines, nin la concubina podía ser pariente.

El concubinatu tuvo especial relevancia a la hora d'unise ciudadanos romanos con non ciudadanos, por exemplu nes provincies.

Ceremonia de boda

Pa celebrar la boda había qu'escoyer un día fastu, esto ye, un día apropiáu marcáu polos augures. El meyor mes pa contraer matrimoniu yera'l de xunu, mientres que'l peor (nefastu) yera'l de mayu.

Pa entamar la ceremonia, la muyer consagraba los sos xuguetes a un dios y ponía'l traxe nupcial que consistía nuna túnica blanca hasta los pies, la tunica recta, amás tamién ponía unes cintes (vittae) na tiesta y un velu (flameum nuptiale) blancu o de color claru, que podía cubri-y la cara.

Celebrábase na casa de la novia, el pater familias facía un sacrificiu del que se tomaben los auspicios del matrimoniu, firmábense los testimoniales del contratu matrimonial y xuníense les manes de los esposos. Ente ellos, un nenu aguantaba una antorcha que personificaba a Himeneo, dios del matrimoniu. Darréu facíase una cena en casa de la novia. Entós, tenía llugar la deductio en que, a mou de representación, el futuru esposu arrancaba a la novia del regazu la madre mientres ella simulaba llorar y aturullar. Esto facía de recuerdu del raptu de les sabines o d'una forma pritmitiva de matrimoniu. Depués llevaben a la novia peles cais hasta la casa del noviu.

Una vez taben frente a la casa del noviu, esti unxía los goncios de la puerta con aceite y entrugaba a la novia:

— Qui es? [¿Quién yes?]

Y ella respondía:

— Ubi tu Caius, ego Caia [Onde tu yes Cayo, yo soi Caya]

Darréu, llevaben a la novia en brazos pa pasala pela puerta de la casa sin que tocara el suelu y el ritu acababa al día siguiente cuando la muyer (agora uxor) facía ofrendes a los Lares y Penates del so nuevu llar y entamaba un envite na nueva casa.

Los fíos

Relieve d'un guaḥe con una bulla.

En Roma, pa que un nenu fuera fíu llextímu debía o bien tar enxendráu dientro'l matrimoniu y depués ser reconocíu pol padre o bien tar adoptáu posteriormente. Respeuto a los ñácaros recién nacíos, los padres podíen abandonalos pa que queden esperando a la muerte o a que daquién los recoyera pa llevalos como esclavos. Too esto dexa entrever qu'en Roma la socesión nun yera tanto por drechu de sangre (ius sanguinis) como por reconocimientu.

Cuando se los reconocía, los fíos recibíen una bulla, que yera una especie de colgadiellu cóncavu fechu de metal que nel interior llevaba sustancies a les que se-y atribuía virtudes xeneralmente máxiques, como proteición escontra mal de güeyu. Esti colgadiellu y la so tradición tienen el so orixe n'Etruria. Esta bulla representa la infancia, darréu que cuando cumplíen la mayoría d'edá (alrodíu de los 12 años nel casu les muyeres y 15-17, según la dómina, nel de los homes) dexábenla, igual que cambiaben de vistimienta.

Ver tamién

• Matrimoniu
• Antigua Roma
• Derechu romanu

Referencies

• Datos: Q15281450