Fremantle
Fremantle (conocida tamién pol so nomatu, Freo) ye una ciudá portuaria del estáu australianu d'Australia occidental. Asítiase na desembocadura del ríu Swan, ta dientro l'área metropolitana de Perth, la capital estatal, y el so puertu fae les veces de puertu de Perth. La so población, nel censu de 2021, yera de 31.930 habitantes[1].
 Fremantle | |
|---|---|
 | |
| Alministración | |
| País |  Australia |
| Estáu federáu |  Australia Occidental |
Local government area of Western Australia (en)  | City of Fremantle (en) |
| Tipu d'entidá |
asentamiento portuario (es) |
| Nome oficial | Fremantle (en) |
| Nome llocal | Fremantle (en) |
| Códigu postal |
6160 |
| Xeografía | |
| Coordenaes | 32°03′15″S 115°44′51″E / 32.0542°S 115.7475°E |
  Fremantle Fremantle (Australia) | |
| Altitú | 1 m |
| Más información | |
| Fundación | 1829 |
| Llocalidaes hermaniaes | ensin valor |
 | |
Primero del asentamientu británicu los noongar habitaron la zona, que nomaben Walyalup ("el sitiu de los woylie"[2], en referencia a esa especie de rata d'agua) demientres milenios. Visitada por esploradores holandeses na década de 1600, el primer asentamientu colonial nun se produciría hasta 1829[3]. Recibió'l so nome del del capitán Charles Fremantle, un oficial naval inglés que reclamó pa la Corona británica la costa occidental de Nueva Holanda[4]. Los anicios del asentamientu foron difíciles, y en 1850, al entamar el tresporte de presos a la colonia, Fremantle convirtióse nel destín primeru pa los convictos condenaos a pena n'Australia. La prisión de Fremantle, construyida por convictos, siguió funcionando muncho dempués de que'l tresporte de presos finara en 1868, y ta anguaño incluyida na llista de Patrimoniu Mundial de la UNESCO.
Fremantle consiguió l'estatus de conceyu en 1883, y na siguiente década afondose'l so puertu pa permitir la navegación comercial. De magar, españó enforma la so actividá comercial, y la ciudá convirtióse tamién na puerta d'entrada de los buscadores d'oru qu'aportaben a les mines de la rexón. Algamó l'estatus de ciudá en 1929[5], y xugó un papel importante, como mayor base de submarinos del Hemisferiu Sur, demientres la Segunda Guerra Mundial. La inmigración europea tres de la guerra, especialmente d'italianos, ayudó a dá-y a la ciudá una personalidá propia, y tres de ser nomada sede de la Copa América de Vela en 1987 esperimentó un procesu de xentrificación. Anguaño, la ciudá tien sonadía pol so paisaxe urbanu, con bien d'edificios d'estilu victorianu ya eduardianu bien conservaos, pol so ambiente bohemiu y la so interesante escena gastronómica y artística. Ye tamién la sede d'ún de los dos equipos de la lliga profesional de fútbol australianu del estáu, el Fremantle Football Club.
Referencies
editar- ↑ «2021 Fremantle, Census All persons QuickStats | Australian Bureau of Statistics». Consultáu'l 4 d'avientu de 2022.
- ↑ "(26/3/2018) Inaugural Woylie Festival starts tomorrow", fremantle.gov.au. Retrieved 5 July 2020.
- ↑ Davidson, Ron; Davidson, Dianne (2010) Fighting for Fremantle. ISBN 9781921361913.
- ↑ Stewart, William (2009) Admirals of the World: A Biographical Dictionary, 1500 to the Present, páx. 135. ISBN 9780786482887.
- ↑ Fremantle A City. 4 June 1929. p. 17. http://nla.gov.au/nla.news-article32285027. Consultáu'l 2 May 2018.
Enllaces esternos
editar
Wikimedia Commons acueye conteníu multimedia sobre Fremantle.
Datos: Q606212- Multimedia: Fremantle, Western Australia
