Fudoshin

Fudoshin (不動心, fudōshin) ye un estáu de mente firme o inalterable. El términu traduzse lliteral, y metafóricamente, como “mente inmóvil” o "corazón inmóvil". Ye un aspeutu filosóficu o mental de les artes marciales (davezu les xaponeses) que contribúi a la eficacia del prauticante avanzáu.

Corazón, mente, espíritu

El términu “fudoshin” compónse de tres ideogrames. El primeru, pronunciáu “fu”, ye negación; el segundu,“dō” ye movimientu, aición; y el terceru, “shin” (o “kokoro”) ye corazón, mente, espíritu.

Fudo Myoo

Shin, o kokoro, pue traducise n’efeutu como corazón, pero esto ye confuso dende un puntu de vista occidental. Na fala xaponesa ordinaria “kokoro” pue referise al mundu interior, incluyendo pensamientos y sentimientos. Nel sen en que s’utiliza’l términu na filosofía y nes artes tradicionales acércase más al conceutu d'interioridá fonda. Kokoro ye una realidá cola que tamos direutamente en contautu los seres humanos y que podemos sentir y vivir si afondamos daveres dientro de nueso. Los qu'albidren que l'“espíritu” tamién se pue esperimentar d'esta miente, podrán tornar “kokoro” a espíritu.

Carauterización de “fudoshin”

Fudoshin ye un espíritu de calma y determín infrayables, coraxe ensin temeridá, estabilidá afitada tanto nel terrén físicu como nel mental. Compárase a un salgueru, con fuertes raigaños qu'afonden na tierra y una resistencia suave, que cede a los vientos que lu azoten.

Prototipu del espíritu fudoshin ye Fudo Myoo, deidá guardia del Budismu Shingon y patrón de les artes marciales, que se representa con una espada na mandrecha (pa cortar les ilusiones y la inorancia) y una cuerda na manzorga (p'amarrar les "fuercies malines" y les pasiones y emociones violentes o descontrolaes). A pesar del so fustax espantible, los sos atributos de benevolencia y serviciu a los seres vivientes son simbolizaos por un peñáu asociáu a la clas servil.

Ver tamién

• Artes marciales de Xapón
• Bushido
• Mushin
• Zanshin
• Shoshin
• Zen

Referencies

• Datos: Q1431032