Galera

Galera
	tipo de navío (es)
	buque
Más información
Derivaos	Galeaza

La galera ye un barcu impulsáu pola fuercia de los remos y pol vientu.

La galera esite dende l'antigüedá. Orixinalmente, usaba una fila de remeros por cada llau del barcu. Tiempu dempués, los fenicios inventaron una galera con dos files de remeros, que yera más veloz ensin perder maniobrabilidá; esta evolución de la galera llamóse birreme. Na Antigua Grecia encastaron y usaron el trirreme, galera de tres files de remeros. Los antiguos romanos, y enantes d'ellos los cartaxineses, llegaron a utilizar el quinquerreme, con cinco files de remos, magar que lo común yera usar birremes.

Los remeros normalmente yeren esclavos o prisioneros. Demientres munchos sieglos caltúvose la condena a galeres como unu de los más crueles castigos posibles, tanto que mesmo Miguel de Cervantes la mencionaba nel Quixote.

Demientres la Edá Media nun se ficieron progresos notables nel arte de construir embarcaciones. La innovación de montar una fila de remeros estra foi abandonada. Por embargu, les galeres permitieron a diverses cultures espardise pel mar. Foi casu talu, por exemplu, del célebre drakkar o barcu-dragón de los viquingos.

Nel Sieglu XV apaez una nueva clase de embarcación, llamada carabela, usaba un velame variáu pa navegar ensin remeros y, poro, requería muncha menos tripulación que la galera. Por embargu, la carabela nun sustituyó aína a la galera. Pa dar una idea: na dómina del descubrimientu d'América, 1492, la espedición de Cristóbal Colón navegó en dos carabeles y una carraca, pero la flota aconceyada poles potencies cristianes escontra l'Imperiu Otomanu demientres la Batalla de Lepanto en 1571 yeren galeres principalmente. Esti sería'l caberu combate históricu au dicha embarcación sería utilizada.

Demientres el Renacimientu apaez un tipu intermediu; una galera con veles, llamada galeaza, precedente del galeón.

Referencies

Enllaces esternos

Wikimedia Commons tien conteníu multimedia tocante a Galera.