Gendai Budo

Gendai Budo (gendai budō, 現代武道), ye una espresión xaponesa que vien significar "vía marcial moderna", en referencia a les modernes artes marciales xaponeses que foron creándose dempués de la Restauración Meiji (1866–1869). Opónense de dalguna manera a los Koryū budō (古流武道) o cenciellamente Koryu: artes marciales antigües establecíes enantes de la Restauración Meiji.

Ámbitu y tradición

Los Gendai Budo inclúin artes como Aikido, Yudu, Jukendo, Iaido, Karate-do, Kendo, Kyudo, y Shorinji Kempo. Sicasí delles ryuha (escueles particulares) d'estes artes pueden clasificase como koryu, yá que les fundaren enantes de la Restauración Meiji (por casu, la Muso Jikiden Eishin-ryuha del iaido tien más de 400 años).

Davezu al arte xaponés del sumo defínenlu tamién como gendai budo (ta por exemplu asociáu a la Nihon Budo Kyogikai, o Asociación Xaponesa de Budo, como les artes mentaes más p'arriba). Pero esto nun ye correuto, porque’l sumo ye en realidá un arte antiguu qu'algamó popularidá y cubrimientu mediáticu na era moderna.

Los gendai budo anicien de cutiu nes koryu o artes marciales xaponeses tradicionales. Por exemplu Jigoro Kano (嘉納治五郎 Kanō Jigorō, 1860–1938) fundó l'arte del yudu en parte como un intentu de sistematizar les milenta tradiciones de jujutsu qu'había daquella. El kendo deriva igualmente de munches escueles de kenjutsu qu'evolucionaron a lo llargo de sieglos.

Los gendai budo xeneralmente sorrayen el conceutu d'artes marciales como estudiu de los principios morales, por exemplu como mediu d'enfrentase meyor a los conflictos o al peligru. Poro la mayoría alcuerden que ye incorreuto clasificar les koryu a cencielles como téuniques de llucha, o clasificar los budo como namái qu'exhibición o xuegu. Esta perspeutiva más bien suxer que tanto koryu como gendai budo contienen elementos tanto de do (camín, con rellumos espirituales) como de jutsu (téunica). Munchos artistes marciales atalanten que nel fondu los dos tán rellacionaos, y que les diferencies nel enfoque pueden inda asina manifestase de varies maneres nel terrén de la enseñanza, como l'enfoque nel estáu mental al facer una téunica cabo l'enfoque na téunica mesma.

Métodos d'enseñanza

Los métodos d'enseñanza tradicionales de les koryu céntrense nun espíritu aliellu y espiertu nel estudiante. Dacuando’l profesor namái tien que demostrar la téunica una vegada y llueu dexar que los estudiantes vayan faciéndola xuntos por sí mesmos. Les esplicaciones detallaes, repetíes y "científiques" de munchos gendai budo contrasten dafechamente con esta manera de facer les coses. Esto forne munchos alderiques sobre la pedagoxía de les artes marciales, y hai munchos que cavilen sobre cómo los maestros de koryu y de budo son quien a facer efeutivu’l so particular tipu d'instrucción.

Organización

Una dixebra perimportante de les koryu foi la introducción de les graduaciones kyu y dan, xunto col sistema de cintos de color (en dellos dojo). Estes graduaciones sustituyeron los diferentes certificaos que se daben nes koryu. Nos gendai budo tampoco nun hai davezu los mesmos rituales y xuramentos d'ingresu tan maxestosos qu'hai nes koryu, como por exemplu’l keppan ("xuramentu de sangre"). Mentanto na mayoría de los dojo de gendai budo tol mundu ye bienveníu si aceuta les regles básiques de conducta, los instructores de les koryu avecen a pescudar sobre los candidatos. (Dende llueu en dambos grupos danse variantes que dependen del instructor que seya y de les circunstancies.)