Ilesia de Santu Tomás de Cantorbery (Avilés)

Ilesia de Santu Tomás de Cantorbery (Avilés)
	Bien d'Interés Cultural
	ilesia y monumentu
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Avilés
Parroquia	Avilés
Villa	Avilés
Coordenaes	43°33′36″N 5°55′24″W / 43.559964°N 5.923283°O
	Ilesia de Santu Tomás de Cantorbery (Avilés) Ilesia de Santu Tomás de Cantorbery (Avilés) (Asturies)
Historia y usu
Orixe del nome	Tomás Becket (es)
Diócesis	Archidiócesis d'Uviéu
Patrimoniu
BIC	RI-51-0011511

La Ilesia de Santu Tomás de Cantorbery nel conceyu d'Avilés, ye una ilesia románica emplazada nel centru del antiguu pueblu de pescadores de Sabugo, na actual plaza del Carbayu d'Avilés, estramuros de la cerca medieval que protexía a la villa. Paez que la so construcción empecipióse nes primeres décades del sieglu XIII, magar dellos estudiosos asígnen-y otres cronoloxíes.

Descripción

El templu ye de nave única y planta basilical rematando en cabecera semicircular empobinada al este y precedida de trechu rectu. Nel llau meridional ábrese una portada n'arimez con trés arcos de mediu puntu con guardapolvu y capiteles que combinen los motivos decorativos vexetales coles figures humanes y d'animales. Un texaroz sobro canecillos guarezla. A los pies alcuéntrase la fachada principal, que presenta una portada en resalte y pronunciáu abocinamientu, intégrenla cuatro archivoltes, n'oxiva, con moldures de bocel y medies cañes desornamentaes, que posen en columnes remataes por cuatro capiteles a cada llau con talles nes que se combinen los motivos fitomórficos, colos antropomórficos y zoomórficos, asitiándose en xambes toraes. L'interior del templu ye un espaciu ampliu, ensin interrupción dalguna, con una tribuna o coru eleváu a los pies, dos capiyes nel llau del evanxeliu y la cabecera en semicírculu. L'edificiu n'aniciu cubría la so amplia nave con armadura de madera vista y la cabecera con bóveda de cañón precedida de fornu; un gran arcu de trunfu apuntáu de doble rosca preciede la boca d'accesu al altar. Estes cubriciones camudaron, arriendes de les reformes asocedíes nos sieglos XV-XVI y XVIII, poles que güei día caltenemos, de bóveda con llunetos pal cuerpu y pal hemiciclu bóveda de crucería, que terminaron por camudar la fisonomía orixinal del edificiu. Estes intervenciones traxeron de resultes que delles saeteres fueren cegaes, abriérense ventanes de mayor tamañu na nave, se recrecieran los murios portantes y pa compensar el pesu de la cubrición asitiárense trés gruesos contrafuertes o estribos nel muriu meridional, ente que nel llau septentrional esta función de compenso faíenla trés capiyes, quedando amenorgáu'l so númberu na actualidá a dos. El gran volume de la ilesia apaez gradiáu, siendo la nave'l trechu más altu pa de siguío sumase n'orde decreciente l'ábside y les capiyes, cubrir tol edificiu con texa corva. La fachada principal remata'l vértiz del teyáu con una espadaña de doble güeyu cubierta a dos agües y coronada por una cruz de piedra. Adosáu na base esterior del muriu meridional esiste un bancu de piedra corrío que sirvió p'acoyer, ente otros, a los miembros del gremiu d'amoriantes que s'axuntaben y protexíen baxu un pórtico o cabildo de mampostería y cubiertu con armadura de madera, que foi definitivamente retiráu a empiezos del sieglu XX, quedando entá nos murios les piedres de descansu que tuvieron de sirvir como encontu a la mesma.

Referencies

↑ «base de datos de monumentos de Wiki Loves Monuments» (13 payares 2017).

Enllaces esternos

[9c08cb6c3e750608ad9d15bb5b0ceaf3dbc4acaf-1] «base de datos de monumentos de Wiki Loves Monuments» (13 payares 2017).

[1]