Wikipedia

José Pertierra y Albuerne

políticu y médicu asturianu (1851–1898)

José Ramón Pertierra y Álvarez de Albuerne (25 de mayu de 1851, Samartín de Lluiña – 21 de xineru de 1898, Cienfuegos) foi un políticu y médicu asturianu asentáu en Cuba. Foi'l primer marqués de Cienfuegos.

José Pertierra y Albuerne
Diputáu nes Cortes

22 xunu 1896 - 26 febreru 1898
Distritu: Santa Clara
Vida
Nacimientu Samartín de Lluiña, 25 de mayu de 1851
Nacionalidá España
Muerte Cienfuegos, 21 de xineru de 1898 (46 años)
Oficiu médicu, políticu
Creencies
Partíu políticu Partido Unión Constitucional (es) Traducir
Cambiar los datos en Wikidata

Biografía editar

Nació'l 25 de mayu de 1851 na parroquia asturiana de Samartín de Lluiña.[1] Coló a Cuba en 1864, onde estudió nel colexu xesuita de Sancti Spiritus.[1] Tornó a la península ibérica en 1868 pa estudiar la carrera de Medicina, que cursó na Universidá Central hasta llograr los títulos de llicenciatura y doctor en 1873.[1] Permaneció en Madrid hasta 1874, añu en que s'embarcó otra vuelta pa Cuba.[1] Na islla establecióse en Cienfuegos.[1] Desempeñó mientres trés años el cargu de médicu municipal forense y amás el de médicu del hospital militar de Cienfuegos mientres la guerra.[1] Por esti llabor concedióse-y la cruz del méritu militar de primer clase.[1] En 1878 estableció la primer casa de salú de Cienfuegos, de la que foi direutor facultativu.[1]

N'acabando la guerra, foi primer vocal nel comité del partíu Unión Constitucional de Cienfuegos.[1] Como delegáu de dicha organización entamó casi tolos comités llocales na llocalidá.[1] En 1880, al reorganizase'l comité de Cienfuegos, foi escoyíu vicepresidente del mesmu y a los dos años presidente.[1] Al crease'l comité provincial de les Villes, foi escoyíu presidente por unanimidá.[1] En 1879, al celebrase les primeres eleiciones provinciales, foi escoyíu diputáu pol distritu de Cienfuegos, siendo'l más mozu de los elixíos.[1] Al constituyise la Diputación resultó nomáu vicepresidente y poco dempués, por nomamientu del gobernador xeneral, vicepresidente tamién de la Comisión provincial, cargos que desempeñó por cuatro años.[1] Al terminar esti periodu foi reelixíu diputáu pol so distritu, al que siguió representando ensin interrupción dende 1879, siendo dempués, al constituyise de nuevu la Diputación, en 1883, propuestu y nomáu, pol gobernador xeneral, presidente de dicha corporación.[1] Foi tamién escoyíu presidente del Casino Español de Cienfuegos en 1879.[1]

Ingresó nel Cuerpu de Voluntarios de la Islla de Cuba a la so llegada per segunda vegada a la islla, col calter de médicu de la Compañía de Tiradores.[1] En 1876 nomáronlu médicu del so batallón y en 1880 foi propuestu por unanimidá de xefes y oficiales pa primer xefe del citáu batallón, que más palantre mandó como coronel.[1] En 1883 concedióse-y la encomienda de númberu d'Isabel la Católica, en 1886 la gran cruz de la mesma orde y más palantre foi compensáu col títulu de marqués de Cienfuegos,[1] en 1893.[2] Pudo ser senador pola provincia de Santa Clara en 1893, pero nun llegó a xurar el cargu.[3] Llogró escañu de diputáu a Cortes, pol distritu de Santa Clara, nes eleiciones de 1896.[4]

Pertierra, que tuvo casáu con Antonia de Madariaga y Muñoz (natural de Cienfuegos y nacida en 1858), finó'l 21 de xineru de 1898 en Cienfuegos.[5][2]

Referencies editar

  1. ↑ 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 Elices Montes, 1893, páxs. 249-251.
  2. ↑ 2,0 2,1 Barón de Cobos de Belchite, 1959, p. 622.
  3. ↑ «Pertierra y Albuerne, José. Marqués de Cienfuegos». Consultáu'l 2022-01-23.
  4. ↑ «Pertierra y Álvarez de Albuerne, José Ramón». Consultáu'l 2022-01-23.
  5. ↑ Molina, 2004, p. 553.

Enllaces esternos editar

Sacáu de «https://ast.wikipedia.org/w/index.php?title=José_Pertierra_y_Albuerne&oldid=3679097»