José de Posadas

José de Posadas y Castillo (1772, Llanes – 21 de xunu de 1825, Chiclana de la Frontera) foi un marín asturianu.

José de Posadas
Vida
Nacimientu	Llanes, 1772
Muerte	Chiclana de la Frontera, 21 de xunu de 1825 (52/53 años)
Oficiu	marineru

Biografía

Xubida nel escalafón de la marina

Cargu	Fecha
Alumnu	19 de xunu de 1789
Alférez de fragata	29 de xineru de 1793
Alférez de navíu	27 d'agostu de 1793
Teniente de fragata	5 de setiembre de 1802
Teniente de navíu	24 de febreru de 1807
Capitán de fragata	24 de payares de 1807
Capitán de navíu	13 de payares de 1824

Combatió la piratería nel Mediterraneu na fragata Santa Leocadia. Cuando la guerra d'independencia, tomó parte nos ataques escontra Toulon y Córcega y tamién en dellos combates contra la marina gala.

Al españar la guerra con Gran Bretaña pasa a sirvir nos grandes navíos de la Real Armada. Embarca nel San Juan Nepomuceno, nel San Antonio y nel Concepción, toos de la escuadra del almirante Juan de Lángara. Con esti últimu buque participa na Batalla del Cabu San Vicente, ocurrida'l 24 de febreru de 1797. Depués por mor del bloquéu británicu a que se ve suxeta la base de Cádiz, Posadas participa cada vez más nos servicios en tierra, siéndo-y encargada la instrucción de tropes de marinería xunto a la provisión de la plaza. Pasa dempués al puertu de Rota, sol mandu del almirante don Antonio de Escaño, y participa en diversos alcuentros con embarcaciones enemigues en proteición de los pescadores de la badea de Cádiz. Tres la firma del tratáu de paz pasa a sirvir n'otros buques, como'l navíu Mexicano, con base en Ferrol. Depués trabaya nes fragates Clara y na corbeta Fuerte nes que fai dos viaxes de corréu a les antilles americanes.

En 1809 yera capitán de fragata y taba destináu en Buenos Aires, dende onde'l virréi Santiago de Liniers unviólu a Santa Fe al mandu d'una flota de barcos pequeños y con tropes de desembarcu, por cuenta de qu'abarruntaba qu'esistía na ciudá un partíu revolucionariu y para torgar que la ciudá de Montevidéu, que taba gobernada por una xunta de gobiernu rebelde a la so autoridá, comunicárase pel ríu Paraná col restu del Virreinatu del Río de la Plata.

En 1810, al españar la Revolución de Mayu, tolos oficiales de los buques frente a Buenos Aires pronunciáronse en contra, y la Primer Xunta nun pudo torgar que se treslladaren con tolos sos armamentos y tripulación a Montevidéu. Al añu siguiente, el virréi Francisco Javier de Elío púnxolu al mandu d'una fuerza heteroxénea de tropes que teníen de detener l'avance de los revolucionarios dirixidos por José Artigas. Derrotáronlu y ficieronlu prisioneru na batalla de Las Piedras el 18 de mayu de 1811. N'ochobre del mesmu añu punxéronlu en llibertá pola mor d'un truecu de prisioneros.

Entamáu'l segundu sitiu de Montevidéu, Posadas dirixió'l batallón d'Infantería de Marina. Na fase final de la ofensiva de la escuadra patriota na Campaña Naval de 1814, Posadas zarpó'l 14 de mayu d'esi añu cola escuadra realista a bordu de la fragata Neptuno como segundu del comandante de la escuadra Miguel de la Sierra. Yá trabáu'l combate nel Puertu del Bucéu, el so superior abandonó la escuadra a la so suerte y retiróse de la llucha, polo que Posadas tuvo d'asumir el mandu. La escuadra foi dafechu derrotada, cayendo Montevidéu poco depués.

Depés de tar varios años encarceláu en Buenos Aires, Posadas torna a España cola so familia, pasando a exercer como segundu del Arsenal de Marina de Cádiz. Al mesmu tiempu, el rei da-y la Orde de San Hermenegildo. En xunu de 1822 diéron-y el mandu de dichu arsenal, recibiendo en payares de 1824 el grau de capitán de navíu.

Enllaces esternos

• Datos: Q5410491