Julián Cifuentes Fernández

Julián Cifuentes Fernández
miembro de la Asamblea Nacional Consultiva (es)	; 10 ochobre 1927 - 29 ochobre 1927
miembro de la Asamblea Nacional Consultiva (es)
Vida
Nacimientu	Xixón, 7 de xineru de 1865
Nacionalidá	España
Muerte	Madrid, 5 d'ochobre de 1927 (62 años)
Estudios
Llingües falaes	castellanu
Oficiu	políticu

Julián Cifuentes y Fernández (7 de xineru de 1865, Xixón – 5 d'ochobre de 1927, Madrid) foi un home de negocios asturianu.

Biografía

Emplegáu dende bien nuevu nun establecimientu comercial, algamó una gran esperiencia nes finances, consiguiendo los títulos de profesor mercantil y abogáu na Escuela de Comerciu de Bilbao y na Universidá d'Uviéu, respeutivamente. Nel añu 1899 foi encargáu de la organización del Bancu de Xixón —nel que se-y confier la direición de la contabilidá, según el cargu d'apoderáu—, que surdía en sustitución de la Casa de Banca de Florencio Rodríguez; poco dempués redactó un folletu, Apuntes sobre l'aforru, que sopelexaba les ventayes d'ésti. Al empar que realizaba estos proyeutos, tuvo al so cargu la esplicación de delles asignatures na Escuela de Comerciu del so llugar de nacencia. Fináu'l señor Rodríguez, pasó a ocupar el puestu de direutor del citáu bancu, que simultaneó col de conseyeru de delles compañíes, ente elles: Tranvíes de Xixón, Popular de Gas y Lletricidá, Asturiana d'Artes Gráfiques, La Estrella S.A. de Seguros y Banco Herrero de Madrid, del que foi promotor.

En Madrid

En 1914 treslládase a Madrid pa faese cargu de la direición del Bancu Hispanoamericano, dende onde, al términu de la Primer Guerra Mundial, promovió un conveniu ente la banca francesa y la española col propósitu de regular les rellaciones económiques ente dambos países, llabor pola que mereció ser estremáu pol presidente de la nación vecina, Raymond Poincaré cola Condecoración de Caballeru de la Orde Nacional de la Lexón d'Honor. Dempués desempeñó dellos puestos en delles entidaes, ente elles: Ferrocarriles de Madrid-Zaragoza-Alicante, Unión Llétrica Madrilana, Conseyu Cimeru Bancariu, Xuráu Central d'Utilidaes, Cámara de Compensación Bancaria de Madrid, Compañía Telefónica Nacional, Bancu de Creitu industrial, Standard Llétrica, Ferrocarril Santander-Mediterráneo y Sociedá Española de Construcción Naval. Algamó'l culmen de la so carrera col nomamientu de miembru de l'Asamblea Nacional, instaurada pola Dictadura del xeneral Miguel Primo de Rivera. Finó en Madrid el 5 d'ochobre de 1927.

Noticia del entierru de Julián Cifuentes nel ABC

Fundación de Telefónica

En 1922, Amadeo Álvarez García, importante home de negocios de la dómina, entamó un alcuentru na so casa de Madrid al qu'asistieron dellos magnates de les finances y del sector empresarial, ente los que s'atopaben el mesmu Julián y Valentín Ruiz Senén. Julián Cifuentes yera un reputáu personaxe de los medios financieros españoles; ostentaba la Presidencia del Consejo Superior Bancario y la Direición Xeneral del Banco Hispano Americano, amás de diversos puestos fixos en conseyos d'alministración d'empreses venceyaes a la banca, a los ferrocarriles, al gas y a la lletricidá.

Naquel alcuentru Gumersindo Rico treslladó-yos el so proyeutu de crear una empresa pa faese con toles concesiones telefóniques del país, creando una única entidá nacional al estilu de la ATT americana. Según paez, aquel grupu de graves señores nun amosó escesivu interés nel proyeutu de Rico y foi Julián el que tomó la pallabra pa referise a la viabilidá del asuntu.

Tres esto tuvieron llugar diversos alcuentros col rei Alfonsu XIII y el magnate americanu Louis Richard Sosthenes Behn, propietariu de la compañía ITT. El nacionalismu económico de Primo de Rivera emburrió a Behn a entender que yera meyor que nun hubiera foranos nel accionariado de la nueva compañía, y por cuenta de los contactos qu'estableciera Rico dos años tras, convencer a Julián Cifuentes Fernández, Amadeo Álvarez García y Valentín Ruiz Senén de que s'incorporaren, a títulu personal, a la nueva compañía en calidá d'accionistes y vocales del Conseyu d'Alministración.

La idea orixinal de Rico, absorbida yá polos intereses de Behn, tomó forma'l 19 d'abril de 1924 cola creación de la CTNE (Compañía Telefónica Nacional d'España). Esta tenía un capital social, dafechu nacional, d'un millón de pesetes; con un accionariado compuestu namái de cinco persones ensin apenes esperiencia nel negociu telefónicu. Julián foi nomáu Vicepresidente, en funciones de Presidente de la Compañía, y llevó a cabu la firma d'un contratu priváu cola ITT pa la prestación de determinaos servicios téunicos y financieros. En felicidá robla intervinieron, como yá se dixo, el mesmu Julián, y Sosthenes Behn en nome de la ITT.

Referencies

↑ URL de la referencia: http://www.congreso.es/portal/page/portal/Congreso/Congreso/Iniciativas?_piref73_2148295_73_1335437_1335437.next_page=/wc/servidorCGI&CMD=VERLST&BASE=DIPH&FMT=DIPHXD1S.fmt&DOCS=1-1&DOCORDER=FIFO&OPDEF=Y&NUM1=&DES1=&QUERY=%2826120%29.NDIP.. Data de consulta: 2 mayu 2020.

Enllaces esternos

[4f9ea236456f77a85df7efbbc4803532b5dac36b-1] URL de la referencia: http://www.congreso.es/portal/page/portal/Congreso/Congreso/Iniciativas?_piref73_2148295_73_1335437_1335437.next_page=/wc/servidorCGI&CMD=VERLST&BASE=DIPH&FMT=DIPHXD1S.fmt&DOCS=1-1&DOCORDER=FIFO&OPDEF=Y&NUM1=&DES1=&QUERY=%2826120%29.NDIP.. Data de consulta: 2 mayu 2020.

[1]