Les Candases
Les Candases ye como se conoz popularmente al grupu de 8 muyeres asturianes qu'el 2 de xunu de 1938 fueron fusilaes y dempués refundiaes al mar dende el Cabu de Peñes poles tropes franquistes mientres la guerra civil española. Pertenecíen a la industria conservera de Candás y dalgunes fueron torturaes y violaes polos falanxistes mientres la so detención por ser familiares de republicanos rellacionaos col Frente Popular.[1][2]
Hestoria
editarEn mayu de 1938, el negociáu d'orde públicu del Conceyu de Carreño creó una llista de fugaos que formaben parte de directives de partíos d'esquierdes ciños al frente Popular. N'otra carta recibida ese mesmu día, incluyose una relación de 23 persones de Carreño que se pensaba que fuxeren a Francia o poblaciones de Llevante en formando parte de los conceyos mientres el períodu coloráu.[1]
Énte el barruntu de que non toos quien se consideraben fugaos realmente fuxeren, el 10 de mayu de 1938 empecipió la so busca. Finalmente, el 1 de xunu de 1938, producióse una redada na que se detuvo a ocho muyeres, nes que toes, menos María Fernández Menéndez, teníen relación directa con trés de los fugaos.[1]
El 2 de xunu de 1938, un camión que tresportaba a los 13 deteníos salió dende Candás hasta el Cabu Peñes. A lo cimero del cantil, fueron fusilaos y llanzaos al mar Áurea Artime García (76 años), Balbina López Artime (34 años), Daría González Pelayo (62 años), María Fernández Menéndez “La Papona” (46 años), Plácida López Artime (31 años), Rosaura Muñiz González (58 años), Rita Fernández Suárez “La Camuña” (21 años) y Secunda Rodríguez (59 años), conocíes dende entós como Les Candases, amás d'otros cinco homes, Emilio Álvarez Rodríguez (57 años), Anselmo Álvarez Rodríguez (33 años), José Aser Álvarez Rodríguez (30 años), Guillermo Álvarez Rodríguez (16 años) y Félix Menéndez González.[1]
Mientres los siguientes díes, tolos cadabres fueron devueltos a la mariña, lo que creó una gran conmoción ente la población. Los restos mortales de Les Candases y los homes executaos fueron soterraos nos campusantos de Bañugues y Vodio, amás d'en dalguna fuesa.[1]
En 2017, l'Asociación pa la Recuperación de la Memoria Histórica, con la Sociedá de Ciencias Aranzadi empobináu pol antropólogu forense Francisco Etxebarría, empecipiáronse los trabayos de exhumación y analizáronse los restos, pero solu foi posible identificar los restos de Daría González Pelayo.[2][3]
Reconociencies
editarNa seronda de 2018 instalóse una placa n'honor de Les Candases na fastera de San Antonio, xuntu con un versos de Miguel Hernández que fueron traducíos al asturianu. Dende 2019, xuna plaza de Candás llámase plaza de Les Candases.[1][4]
En 2020, estrenóse el documental "La hestoria escaecida de Les candases", de J.K. Álvarez, que narra la hestoria de les conserveres executaes.[5][6]
Referencias
editar- ↑ 1,0 1,1 1,2 1,3 1,4 1,5 «Ochenta años de olvido para ocho mujeres arrojadas al mar en el Cabo Peñas» (local). www.elsaltodiario.com. Consultáu'l 2024-11-24.
- ↑ 2,0 2,1 GARCÍA-OVIES, ALICIA (2020-09-20). ««La historia de 'Les Candases' estuvo silenciada, pero ya no tenemos miedo»» (castellanu). El Comercio: Diario de Asturias. Consultáu'l 2024-11-25.
- ↑ Alonso, Diego Díaz (2022-06-19). «Entierro familiar para Daría González Pelayo, arrojada al mar en 1938 por un grupo de falangistas» (castellanu). Nortes | Centradas en la periferia. Consultáu'l 2024-11-25.
- ↑ «Informe PLAZA LES CANDASES» (castellanu). Somos Carreño (2023-04-03). Consultáu'l 2024-11-24.
- ↑ «Estreno en Candás del documental 'La historia olvidada de Les Candases'». www.rtpa.es. Consultáu'l 25 de noviembre de 2024.
- ↑ «CARREÑO INVESTIGARÁ LA REPRESIÓN FRANQUISTA EN LAS CONSERVERAS | infoCarreño». CARREÑO INVESTIGARÁ LA REPRESIÓN FRANQUISTA EN LAS CONSERVERAS | infoCarreño. Consultáu'l 2024-11-24.
Datos: Q131319005
