Les ruines

Les Ruines ye una novela escrita n'asturianu del escritor turonés Xandru Fernández. La primer edición publicóla Ediciones Trabe nel 2004, mentes que nel 2012 la coleición Mecánica Popular de Suburbia Ediciones publicó la segunda edición. Les ruines ye la historia d'una familia y al mesmu tiempu ye la historia d'una época y un llugar que yá formen parte del pasáu. Una historia qu'empieza nos años de la guerra civil y acaba nos díes del fundimientu del Prestige, pero resumida nos sucesos d'un solu día de febreru de 1980.

Les ruines
obra lliteraria
Datos
Autor	Xandru Fernández
Fecha	2004
Llingua orixinal	asturianu
Editorial orixinal	Ediciones Trabe

Argumentu

En plena guerra civil, a puntu de cayer el frente d'Asturies nes manes de les tropes franquistes, un aviador alemán afréllase col so caza nos montes qu'arrodien el Valle. El pá de Rosa rescata al pilotu manferíu y faise pasar por él pa salvar la vida d'un amigu. Xandru Fernández compón nesta novela una espléndida imaxe, coles sos peculiares maneres de tratu social, de la familia de Rosa l'Alemana (que debe l'alcuñu a aquel llonxanu episodiu de guerra), y del so home, Goyo Godina, militante antifranquista que muerre n'accidente de mina.

Alredor del Valle, un escenariu siempre presente, inclusive cuando los protagonistes viven yá a quilómetros de distancia, los fíos y nietos de Rosa, les muyeres, les amantes, los vecinos... componen un llaberintu de rellaciones nel que'l desarraigu, una enorme dificultá p'amar (o simplemente pa comunicase) y una violencia non siempre contenida, estructuren una novela onde'l pasáu regresa pa conformar el presente y pa incidir, de manera tráxica y a vegaes absurda, nel futuru.

Receición crítica

Publicada per primer vez en 2004 por Ediciones Trabe, esta novela mereció'l Premiu de la Crítica de l'Asociación d'Escritores Asturianos y foi seleccionada polos llectores de Biblioastur como una de les diez grandes obres de la lliteratura asturiana del últimu mediu sieglu. La edición nueva de Suburbia, revisada y prologada pol autor, permítenos acceder de nuevu a un llibru que yera imposible d'atopar nes llibreríes dende hai años.

Enllaces esternos

• Datos: Q25578691