Los Brincos

Los Brincos fueron una banda española de rock fundada en 1964 en Madrid, que llogró un enorme ésitu ente esi añu y 1968 (convirtiéndose nun auténticu fenómenu musical nel so país). Tres diversos cambeos de formación y evoluciones estilístiques, terminó eslleiéndose en 1970.

Los Brincos
Datos
Tipu	grupu de rock
Miembros	Fernando Arbex, Juan Pardo, Antonio Morales Barreto y Manuel González Martínez
Xéneru	rock
País	España
Orixinarios de	Madrid
Fecha fundación	1964
Web oficial

Nel so tiempu fueron conocíos como The Beatles españoles. La so imaxe (siquier nos primeros tiempos), anque inspirada nos grupos Beat británicos, incluyía tamién elementos idiosincráticos y más o menos castizos, como les capes españoles o los cascabeles.

Historia

Primer formación («clásica o orixinal»). 1964-1966

El grupu creóse en 1964. Los sos componentes orixinales fueron Fernando Arbex (batería), Manuel González (baxu llétricu), Juan Pardo (guitarra llétrica) y Antonio Morales, Junior (guitarra llétrica). Ésta ye la que vien siendo conocida como "formación clásica" o "formación orixinal".

Arbex tocara la batería con Los Estudiantes dende finales de los 50. Cuando esta banda se disolvió a principios de 1964, pensó en montar otru grupu, pa lo que contautó con Juan Pardo y Manuel González. L'últimu miembru n'incorporase foi l'hispanu-filipín Antonio Morales "Junior" (que, como Pardo, fuera dacuando cantante de Los Pekenikes). El so representante, Luis Sartorius, consiguió que fueren fichaos pola discográfica española Zafiru, convenciendo a la compañía de que n'España podía llanzase con ésitu un grupu al estilu de les bandes britániques de Beat, pero con personalidá propia ya interpretando les sos propies composiciones en castellán. Sartorius morrió poco antes del llanzamientu nun accidente de tráficu, pero yá sentara les bases d'un proyeutu que tuvo la so plasmación nel estudiu gracies a la producción de Mariní Callejo, que formara parte de Los Brujos y col tiempu sería considerada como una de les grandes productores del pop melódicu español de los 60 y primeros 70.

Los sos primeros discos (el Lp tituláu "Los Brincos I" y dellos singles y Ep's) apaecieron a finales de 1964 y principios de 1965. Y toos ellos convirtiéronse en superventes con gran rapidez (falamos de temes como "Flamenco", "Dance The Pulga", "Bye Bye Chiquilla", "Borracho", "No soy malo", etc).

Mientres l'añu 1965 encadenaron un ésitu tres otru nes llistes españoles, convirtiéndos nel grupu más vendedor y en tou un fenómenu mediáticu y de "fans" (xenerando lo que dio en llamase "Brincosis", nuna evidente imitación de la británica Beatlemania).

En 1966 apaez el so segundu Lp, "Los Brincos II". Y siguen los ésitos y los númberos unu nes llistes españoles: Mejor", "Sola", "Un sorbito de champán", "A mi con esas", "Renacerá", etc.

Mientres esi periodu planteguen entrar nel mercáu européu, grabando versiones de los sos cantares n'inglés, francés ya italianu con oxetu d'aportar a les llistes d'esos países. Y anque consiguen apaecer en delles televisiones y ser portaes de delles revistes, lo cierto ye que la so repercusión, siendo estimable (sobremanera n'Italia, Francia y Portugal, foi modesta.

Na segunda metá de 1966, y tres ciertes desavenencies personales y musicales, Juan Pardo y Antonio Morales abandonen la banda y formen el dúu Juan y Junior, que tamién conoció un enorme ésitu mientres tuvo n'activu (1966-69).

Segunda formación. 1966-68

Tres la marcha de los dos guitarristes y vocalistas principales, Fernando Arbex, convertíu en líder indiscutible, ficha como sustitutos a Ricky Morales (hermanu de Junior) y a Vicente Jesús Martínez, dambos procedentes del grupu Los Shakers (una banda madrilana que nun tien de ser confudnida cola qu'esistió n'Uruguái xusto na mesma dómina).

El cambéu, afecta al soníu del grupu que, ensin abandonar el Beat melódicu y les harmoníes vocales que los caracterizaron dende'l principiu, ábrese a nueves corrientes como la Sicodelia, el Pop barrocu o'l Freakbeat, soníos que, entós daquella, apoderaben el panorama internacional. Y l'ésitu sigue acompañándolos mientres 1967, con temes como "Lola", "El Pasaporte", "Nadie te quiere ya" o "Érase una vez".

Siguiendo cola so estratexa destinada a algamar el mercáu anglosaxón, consiguieron ser portada del New Musical Express británicu ya inclusive recurrieron a los servicios de Larry Page (famosu productor inglés de la dómina, conocíu polos sos trabayos con The Kinks) pa grabar el so tercer álbum, tituláu "Contrabando". Anque'l discu foi otru ésitu nel mercáu español, lo cierto ye que tampoco esta vegada llograron aportar a les llistes internacionales (a pesar de que, precisamente nesi momentu, otros grupos españoles como Los Bravos o Los Pop Tops sí lo consiguíen).

Tercer formación (final). 1968-70

En 1968 Vicente Martínez abandona la formación y ye sustituyíu por otru hermanu del ex-componente Junior (y del guitarrista -titular nesi momentu- Ricky): Miguel. Nesa dómina la escena musical española ta camudando. La vieya corriente beat dio pasu a nuevos soníos como'l Soul, el Folk rock, el Blues rock y, sobremanera, la Sicodelia y l'incipiente Rock progresivu. La banda adáutase a esos nuevos estilos fichando, amás, al multiinstrumentista colombianu Óscar Lasprilla (antiguu miembru de Los Speakers, banda suramericana liderada pol español Rodrigo García) y convirtiéndose nun quintetu.

Mientres 1969 publiquen dellos singles que nun llogren l'ecu de los sos trabayos anteriores. El so soníu vuélvese cada vez más sicodélicu y progresivu, rematando cola apaición, a principios de 1970, del so postreru Lp. Un discu del que se grabaron dos versiones: una n'español, titulada "Mundo, demonio y carne"; y otra n'inglés que'l so nome ye "World, Devil And Body". Trátase d'un discu conceptual (con un filu conductor y una hestoria coherente que percuerre tolos cantares) al estilu de lo que, entós daquella, taben faciendo bandes anglosaxones como The Who, The Pretty Things y otros.

El discu llogró escasa repercusión comercial y, a diferencia de los anteriores álbumes de Los Brincos, nun entró nos primeros puestos de les llistes españoles. Asina qu'Arbex decidió disolver el grupu.

Colos hermanos Morales y Lasprilla formó, esi mesmu añu, Alacrán, una banda de curtia vida pero que publicó un álbum adscritu a la tardopsicodelia y al Rock progresivu.

Y, yá en 1971, montó'l grupu Barrabás; que, practicando un amiestu ente'l Latin rock, el Soul y el Funk (na onda de Santana, Malo, Mandrill o Osibisa), y cantando n'inglés, consiguiría l'ésitu (ente 1971 y 1976) nel mercáu internacional -européu y anglosaxón- que Los Brincos nunca llograren.

Xunta nel sieglu XXI. 2000-2003

La banda anguaño llamada "Los Brincos" nuna imaxe de 2008

Nel añu 2000, Fernando Arbex formó una banda a la que volvió bautizar como Los Brincos (yá que tenía rexistráu'l nome n'esclusiva dende 1966). L'únicu componente fundador yera él, anque tamién cuntaba con Miguel, miembru de la última formación sesentera (la tercera).

Esi mesmu añu sacaron un nuevu álbum tituláu "Eterna mocedá", que'l so soníu podía recordar, remotamente, al de los dos primeros discos del grupu. Aprovechando la fola señardosa que reivindicaba los vieyos soníos de los 60's, la formación dedicóse, básicamente, a tocar los sos vieyos clásicos en gales y festivales.

El 5 de xunetu de 2003 Fernando Arbex finó, a la edá de 62 años.

Tres la muerte de Arbex, el grupu sigue realizando actuaciones col nome orixinal anque ensin cuntar ente les sos files con nengún de los miembros fundadores.

Discografía orixinal (álbumes)

• Los Brincos (Zafiru-Novola, 1964).
• Brincos II (Zafiru-Novola, 1966).
• Contrabandu (Zafiru-Novola, 1968).
• Mundu, demoniu y carne (Zafiru-Novola, 1970).
• World, Evil & Body (Zafiru-Novola, 1970) — versión n'inglés del anterior con delles temes distintes.

Dalgunes de los sos cantares más conocíos

• "Bailla la pulga" (1964).
• "Flamencu" (1964).
• "Sola" (1965).
• "Borrachu" (1965).
• "Tu dixístime adiós" (1965).
• "A mi con éses" (1965).
• "Meyor" (1966).
• "Va Renacer" (1966).
• "Un sorbito de xampán" (1966).
• "Lola" (1967).
• "El Pasaporte" (1967).
• " Nadie te quier yá" (1967).
• "Soi como quiero" (1968).
• "Amiga mio" (1968).

Bibliografía

• ORDOVÁS BLASCO, Jesús: Historia de la música pop española, Alianza Editorial, 1987. ISBN 84-206-0224-8.
• PARDO, José Ramón: Hestoria del pop español, Caña Llamba Music, Madrid, 2005. ISBN 84-934307-0-6.

Enllaces esternos

• Los Brincos biografía y crítiques de discos en Lafonoteca
• Biografía y discografía en Aloha Pop Rock
• Cronoloxía detallada de Los Brincos en 1965 y 1966, en Pop Thing

• Datos: Q1228384
• Multimedia: Los Brincos