Wikipedia

Luta livre

Luta livre ye una espresión portuguesa que significa llucha llibre. Úsase dacuando nesti sen xenéricu, pero en Brasil refierse davezu a la “luta livre esportiva”, una variante de llucha popular ente los prauticantes d'artes marciales mestes. Xunto col Jiu-jitsu brasilanu ye una de les disciplines de base más usaes nos combates de MMA polos lluchadores brasilanos y por otros foranos pero formaos naquel país.

Historia

editar

Brasil ye’l llar d'esti sistema de llucha, más propiamente conocíu como “luta livre esportiva”, qu'anició na primer metá del sieglu XX en Rio de Janeiro. El fundador d'esti sistema de llucha foi Euclydes Hatem (Tatu), ún de los más grandes lluchadores brasilanos de tolos tiempos, que foi quien a derrotar a George Gracie nos años 1940. La práutica de la Luta Livre siempre tuvo centrada na "llucha en suelu" ensin kimono, distancia enforma eficaz nel contestu del Vale tudo y decisiva nes peligroses cais brasilanes. Nos años 1970 la Luta livre tuvo muncha influyencia d'espertos como Roberto Leitão, profesor universitariu d'inxeniería mecánica con muncha esperiencia nel yudu ensin kimono y na llucha. Por mor de la so flacura y de la so estatura baxa, Leitão tuvo que desendolcar un estilu mui téunicu pa superar a los contrarios; esta particularidá fai más eficaz el sistema de la Luta livre, inclusive contra oponentes más pesaos y fuertes. D’esti estilu surdieron grandes campeones de les MMA, de la llucha de sumisión y del Vale tudo, ente los que s’atopen Euclides Perreria, Marco Ruas, Alexandre França Nogueira y Alexandre Ferreira. La téunica desendolcada por Tatu y por Leitão tresmitióse a les siguientes xeneraciones y espardióse per distintos países lloñe de Brasil. Asina y too nel so país d'orixe los ximnasios onde se prautica esta disciplina tán mui solicitaos por prauticantes de tol mundu non sólo pola eficacia de munchos de los sos lluchadores nos torneos de combate a plenu contautu, sinón tamién pola so semeyanza col “catch wrestling” (llucha llibre tradicional, d'aniciu británicu) y el “shoot wrestling” (llucha profesional d'aniciu xaponés), a pesar de desendolcase cuasi dafechu de forma independiente a talos estilos.

Carauterístiques

editar

La Luta livre ye un sistema eclécticu de llucha, qu'amiesta téuniques de golpiar con puños y piernes (nes modalidaes conocíes como Luta Livre Vale Tudo y Luta Livre T36) a otres propies de la llucha y del Yudu en cata de la sumisión (mañes que provoquen l'abandonu, les úniques válides na modalidá de sumisión o Luta Livre Esportiva). Ensin embargu los lluchadores nun lleven “judogi” o kimono, sinón un pantaloncín de llucha, colo que la manera de facer les mañes nun pue tener el sofitu de la vistimienta nin pa valtar nin pa inmovilizar. Tienden a predominar les téuniques de llucha en suelu, sobre too les llaves a les articulaciones de los brazos y de les piernes y los estrangulamientos. La modalidá Luta Livre T36 ta empobinada a la defensa personal real, y va entrando por ello nos programes d'entrenamientu de dellos cuerpos policiales y militares.

Ver tamién

editar

Referencies

editar

Enllaces esternos

editar
Sacáu de «https://ast.wikipedia.org/w/index.php?title=Luta_livre&oldid=4276952»