Manolo Ponteo

Manuel González González (15 d'agostu de 1935, Quexu – 25 de xineru de 2001), conocíu como Manolo Ponteo, foi un cantante de tonada.

Manolo Ponteo
Vida
Nacimientu	Quexu, 15 d'agostu de 1935
Nacionalidá	España
Muerte	25 de xineru de 2001 (65 años)
Estudios
Llingües falaes	castellanu asturianu
Oficiu	cantante
Instrumentu musical	voz

Biografía

A la edá de trece años yá entamó la so carrera artística como cantante de tonada ganando'l concursu de les fiestes de la Fábrica d'Armes de Trubia. Años depués, en 1966, algamaría'l segundu premiu na cuarta edición del concursu entamáu pol diariu Región, ganando finalmente'l primer premiu na sesta edición del concursu de Radio Oviedo.

El so nome artísticu ye consecuencia de qu'al casase marchó a vivir al pueblu de Ponteo, en San Cloyo (Uviéu) y decidió amestar el topónimu al so nome.

Foi participante habitual en concursos, romeríes y fiestes a lo llargo de tola xeografía asturiana, llegando a convertise nuna de les voces de referencia de la tonada.

Dexó grabaos unos ochenta cantares, y fízolo tanto cantando en solitario (Nieve en el Puerto – 1970, Pasé'l Puertu de Payares – 1971, Pincheme con una espina – 1971,…), como acompañáu a la gaita, tanto con Luis d'Arnizo (Ay de mi que me oscurez - 1973) como con Eduardo'l de Sabina (Los gües de Xuana – 1967, Les Cuatro Poles – 1967, Baxé del monte - 1967, Adiós llugarín de Pio – 1973, …)

Foi homenaxeáu pol Concursu y Muestra de Folklore Ciudá d'Uviéu, nel Teatru Campoamor, nun actu que tuvo llugar el 1 d'abril de 1993. El Plenu del Ayuntamientu d'Uviéu de 30 d'ochobre de 1998, aprobó da-y el nome de Manolo Ponteo a una calle de La Corredoria. Coincidiendo cola Feria de l'Ascensión, l'Ayuntamientu de la capital vien entamando dende l'añu 2001 un Memorial n'acordanza del cantante.

Enllaces esternos

• Datos: Q13147744