Galaxa del Cigarru
La galaxa del Cigarru (tamién conocida como Galaxa Irregular M82, Messier 82, M82 o NGC 3034) ye una galaxa irregular allargada y estrecha na constelación del sietestrellu. Ye'l prototipu de galaxa con biltu estelar, tando carauterizada por una elevada tasa de formación estelar nel so centru, causada según paez por una interaición gravitatoria hai ente doscientos y quinientos millones d'años cola primaria galaxa de Bode.[1][2]
| Messier 82 | ||
|---|---|---|
 | ||
| Datos d'observación (dómina J2000.0) | ||
| Tipu | Irr-II | |
| Ascensión reuta | 9h 55,8m | |
| Declinación | +69° 41′ | |
| Distancia | 12 millones d'al | |
| Magnitú aparente (V) | +8,4 | |
| Tamañu aparente (V) | 9 × 4 minuto d'arcu | |
| Constelación | sietestrellu | |
| Otres designaciones | ||
| [editar datos en Wikidata] | ||
Ési biltu estelar duró 50 millones d'años, con una tasa de formación estelar de 10 mases solares per añu, y foi siguíu por otros dos, el postreru d'ellos asocedíu hai ente 4 y 6 millones d'años y que paez formar los cúmulos del nucleu. Estudios fechos col telescopiu espacial Hubble amuesen la presencia de 197 cúmulos estelares ellí, con una masa medio de 2 ∙ 10⁵ mases solares.
La rexón ónde se concentra la formación estelar tien un tamañu de 500 pársecs, y son visibles nella cuatro rexones brillosos conocíes cómo A, B, C y D, que son interpretaes cómo supercúmulos estelares que sufren relativamente poca estinción debíu al polvu interestelar. La frecuencia de supernoves ellí ye d'una cada 10 años. Les producíes nes rexones A y C paecen ser les responsables de los remexos de materia espulsaos al espaciu intergaláctico visibles na fotografía.[3]
L'Observatoriu de rayos X Chandra detectó emisiones de rayos X fluctuando na zona, aproximao a 600 años lluz del centru del oxetu. Los astrónomos postularon que podría contener el primer furacu prietu de masa mediano conocíu, en redol a 500 mases solares.[4] Coles mesmes, ye posible qu'esista un furacu prietu nel so centru con 30 millones de vegaes la masa del Sol.[5]
Estudios llevaos a cabu en 2005 por un grupu d'astrónomos mexicanos amuesen que podría tratase d'una galaxa espiral barrada de tipu tardíu y baxo masa vista cuasi de cantu, siendo que les aburuyes gravitacionales y les rexones de polvu faen que presente una morfoloxía irregular.[6]
De magar, siguióse la investigación analizando en detalle'l restu de la galaxa, yá non yá el so biltu estelar central. Llegándose a la conclusión de qu'una gran parte de les estrelles del so discu nacieron nun gran biltu estelar hai 500 millones d'años, deteniéndose la formación estelar ellí hai 100 millones d'años y dexando cómo prueba de tal biltu un gran númberu de super cúmulos estelares. Na actualidá, l'únicu llugar de la galaxa ónde siguen naciendo estrelles ye nel so centru y quiciabes nel so halo galácticu, anque a una escala bien lenta. Tou ello suxer un escenariu según el cual la galaxa del Cigarru yera una galaxa de baxu rellumu superficial que sufrió'l potente biltu estelar mentáu que formó gran parte de les estrelles del so discu.[7]
Referencies
editar- ↑ «APOD: 2008 March 25 - Galaxy Wars: M81 versus M82».
- ↑ http://adsabs.harvard.edu/abs/2008A%26A...484..711B "Star cluster versus field star formation in the nucleus of the prototype starburst galaxy M 82
- ↑ "Star cluster versus field star formation in the nucleus of the prototype starburst galaxy M 82
- ↑ The ultraluminous X-ray source in M82: an intermediate-mass black hole with a giant companion
- ↑ The stellar velocity dispersion in the nucleus of M82
- ↑ Mayya, Divakara; Carrasco, Luis y Lluna, Abraham (2005). «The Discovery of Spiral Arms in the Starburst Galaxy M82». The Astrophysical Journal 628 (1): páxs. L33-L36. http://iopscience.iop.org/1538-4357/628/1/L33/pdf/1538-4357_628_1_L33.pdf.
- ↑ Mayya, Divakara y Carrasco, Luis (2009). «M82 as a Galaxy: Morphology and Stellar Content of the Disk and Halo». Revista Mexicana d'Astronomía y Astrofísica (Serie de Conferencies) 37: páxs. 44-55. Archivado del original el 2016-03-06. https://web.archive.org/web/20160306054435/http://www.astroscu.unam.mx/rmaa/RMxAC..37/PDF/RMxAC..37_ymayya.pdf. Consultáu'l 2015-10-22.
Enllaces esternos
editar
Wikimedia Commons tien conteníu multimedia tocante a Galaxa del Cigarru.- Messier 82, SEDS Messier (n'inglés)
- Fumu de la galaxa del cigarru.
Coordenaes: 
9h 55m 52.43s, 69° 40′ 46.93″
Datos: Q14026- Multimedia: Messier 82
