Abrir el menú principal
Los reptiles (en sentíu ampliu) son un grupu parafiléticu. El grupu puede faese monofiléticu sos referimos a Amniota porque inclúi a mamíferos y aves.

En filoxenia un grupu ye parafiléticu cuando inclúi al ancestru común de los sos miembros, pero non a tolos descendientes d'esti. Un grupu constitúyese como parafiléticu cuando a un clado (caña evolutiva) se-y sustraen unu o más grupos holofiléticos.

Les clasificaciones tradicionales tán cargaes de grupos parafiléticos, como invertebraos, pteridofites, o pónxidos. En caún d'estos casos el grupu defínese pola esclusión d'un grupu menor dientro d'otru mayor: los invertebraos son los animales que nun son vertebraos; les pteridofites son les plantes vasculares que nun son fanerógames; los pónxidos son los antropoides que nun son homínidos. Asina, cada grupu apaez definíu negativamente, por rasgos que-y falten, en cuenta de manera positiva, poles traces que comparten los sos miembros.

La llexitimidá del usu de grupos parafiléticos na clasificación ye bien aldericada. Quien lo defenden fáenlo namái p'aquellos casos en que resulta un grupu de carauterístiques primitives o ancestrales bien definíes, que conformen un grau evolutivu. Los que s'oponen alieguen que namái los grupos holofiléticos son lexítimos nuna clasificación evolutiva. Baxo un ciertu conceutu los grupos parafiléticos son llamaos monofiléticos (grupos convexos), al igual que los holofiléticos.

Nes clasificaciones, los grupos parafiléticos suelen indicase escribiendo'l nome del taxón entre comines o añediendo (P) de siguío del nome del taxón, por casu, "Radiolaria" o Protalveolata (P).[1] En delles publicaciones escribe un asteriscu darréu del nome del taxón, por casu, Reptilia*.[2]

Ver tamiénEditar

ReferenciesEditar

  1. Adl, S.M. et al. (2012). The revised classification of eukaryotes. Journal of Eukaryotic Microbiology, 59(5), 429-514
  2. Tudge, C. (2001). La variedad de la vida: historia de todas las criaturas de la Tierra. Oxford University Press. ISBN 0-19-860426-2