Patrón de diseñu

Un patrón de diseñu ye una propuesta d'igua pa una mena de problemes repetíos con frecuencia. Nun ye una igua definitiva, que vaya aplicase direutamente; ye una descripción de cómo solucionar esi tipu de problema, y al aplicar esa igua adautaráse a les circunstancies concretes.

La idea de los patrones de diseñu vien de la estaya de l'arquiteutura y atribúise a Cristopher Alexander. La so idea yera tener exemplos típicos d'igües pa construyir ciudaes y cases.

D'equí, la idea pasó a la informática, y emplégase na inxeniería del software comu una téunica más. Como se dixo enriba, un patrón de diseñu nun ye daqué que pueda traducise direutamente a códigu fonte; ye una propuesta pa un diseñu de software.

N'informática, la fonte más famosa de patrones de diseñu ye'l llibru Design Patterns: Elements of Reusable Object-Oriented Software, espublizáu en 1994 por Erich Gamma, Richard Helm, Ralph Johnson y John Vlissides. Ye de xuru'l llibru más importante sobre'l tema, y a los sos autores llámaselos The Gang of Four (la banda de los cuatro). Poles iniciales d'esa espresión inglesa, el so llibru llámase delles veces cenciellamente "el GOF".