Wikipedia

Prehistoria


La Prehistoria (del llatín præ- 'antes de' y de historia 'historia, investigación, noticia' ye, según la definición tradicional, el periodu de tiempu que trescurrió ente l'apaición de los primeros homininos, antecesores del Homo sapiens, hasta l'apaición, alredor del 3300 e.C. n'Oriente Próximu[1], de los primeros documentos escritos de los que podemos asegurar la so esistencia[2]. Pa otros autores, sicasí, la prehistoria finaría, en dalgunes rexones, antes, nel momentu de l'apaición de les sociedaes complexes que crearon los primeros estaos y civilizaciones.

Prehistoria
Tiempu, periodu históricu y periodización (es) Traducir
cultura arqueolóxica
Prehistoria Edá Antigua
Cambiar los datos en Wikidata

El términu prehistoria, acordies coles nueves interpretaciones de la ciencia histórica, nun tien significáu real dengún. Si la Historia ye, como definió Marc Bloch, «l'acontecer humanu nel tiempu», too ye historia de magar qu'esiste'l ser humanu, y la prehistoria tendría de ser l'estudiu de la vida anantes de l'apaición del primer homínidu nel planeta. Amás, dende'l puntu de vista cronolóxicu el términu nun tien unes llendes clares, porque nin el ser humanu llegó a la vez a toles fasteres del planeta nin l'apaición de la escritura foi simultánea en toes elles.

Otros autores defenden una definición d'esta fase, o polo menos la so dixebra de la Edá Antigua, a partir de criterios non cronolóxicos sinón económicos y sociales. Y esto porque los primeros son más particularizadores, más ideográficos, mentantu que los económicos y sociales, al ser más xeneralizadores, son más afayaízos pa estudialos dende una perspeutiva científica.

Nesti sentíu el fin de la prehistoria y l'entamu de la Historia vendríen marcaos por una estructuración creciente de la sociedá que provocaría: un cambéu sustancial del hábitat, l'agrupamientu de la población en ciudaes, una socialización avanzada, l'apaición de la xerarquización social y d'estructures alministratives, l'apaición de la moneda y l'aumentu de los intercambios comerciales de llarga distancia. Acordies con esta perspeutiva nun sedría adecuáu estudiar como prehistóriques sociedaes totalmente urbanes, como los incas y los mexicas n'América, l'Imperiu de Ghana y el Gran Zimbabue n'África o l'Imperiu Khmer nel sudeste asiáticu, y que namái s'incluin nel espectru de la prehistoria pola ausencia de testos escritos producíos por elles[3]. Notru exemplu de la escasa definición de les llendes cronolóxiques del términu, los mayas son consideraos una sociedá histórica namái nes últimes décades, tres de tenerse descifráu los sos glifos, que por tener valor fonéticu formen un sistema completu d'escritura[4].

La prehistoria ye un campu académicu pervenceyáu a l'Arqueoloxía, la Paleontoloxía y la Xeoloxía histórica.

Periodización

editar
 
Cronoloxía prehistórica simplificada (n'español).

La prehistoria divídese en múltiples periodos, con periodizaciones estremaes nes distintes tradiciones culturales. Nos países de llingua castellana divídese xeneralmente en dos etapes que son aplicaes a la mayoría de les rexones del mundu: la Edá de Piedra y la Edá de los Metales (que compriende les edaes del Cobre, el Bronce y el Fierro)[5][6]. La esceición ye la prehistoria americana, sodividida nos periodos Paleoamericanu, Arcaicu y Formativu[7]. El conceptu d'Edá de los Metales, sicasí, nun ye d'usu xeneralizáu notros países ya idiomes. Asina, nos artículos asoleyaos n'inglés ye vezu referise al conxuntu de les trés edaes col nome xenéricu de the metal ages ("les edaes de los metales", ensin un nome conxuntu específicu)[8][9].

La división en dos grupos del periodu prehistóricu céntrase, en función del criteriu usáu pa facela (división xeolóxica, estadíu de la evolución humana, etc.) nes llendes ente'l Pleistocenu ya'l Holocenu (nel qu'el Neolíticu comparte grupu cola Edá de los Metales), el Pleistocenu y el Pliocenu (nel contextu xeolóxicu, especialmente) y entre prehistoria y la protohistoria (una división asemeyada en muchos aspectos a la dixebra ente Edá de Piedra y Edá de los Metales).[8] Hay, sicasí, otros historiadores que nun consideren que la dixebra en dos seya afayadiza, pola complexidá d'estos[10], pa referise a los periodos prehistóricos, y utilicen en cuenta d'ella una división tripartita, con diferencies ente lo xeolóxicu y lo cultural[11], que divide la prehistoria en Paleolíticu, Neolíticu ya Edá de los Metales[12]. Hai, tamién, periodizaciones que la dividen en 4-5 etapes principales[13].

Ún de los sistemes de periodización más usaos dende'l sieglu XIX, y qu'entá persiste nel conocimientu popular de países como Alemania y dellos del mundu de llingua inglesa, divídela en trés etapes: Edá de Piedra, Edá del Bronce ya Edá del Fierro[14]. Nostante, anguaño ta en retrocesu nel ámbetu acádemicu sacante en disciplines concretes como la etnoloxía[10]. Critícase-y que seya muy simplista, porque céntrase namái nos afayos de la historia europea, norteafricana y del Oriente Próximu y Mediu ya ignora los estudios realizaos notres partes del mundu[8][15].

Referencies

editar
  1. ↑ Renfrew, Colin; Bahn, Paul (1993). Arqueología. Ediciones AKAL. ISBN 9788446002345.
  2. ↑ Eiroa, Jorge Juan (2006). Nociones de Prehistoria general. Grupo Planeta (GBS). ISBN 9788434452138
  3. ↑ Fullola Pericot, Josep Maria; Nadal Lorenzo, Jordi (1 de diciembre de 2012). Introducción a la prehistoria: La evolución de la cultura humana (1ª edición). Barcelona: Editorial UOC. p. 216. ISBN 84-9788-153-2
  4. ↑ Renfrew, Andrew Colin; Bahn, Paul (1993). «¿Qué pensaban? Arqueología Cognitiva, arte y religión». En Arqueología: Teorías, métodos y prácticas. Madrid: Ediciones Akal. pp. 372-373. ISBN 9788446002345.
  5. ↑ National Geographic: “Prehistoria”.
  6. ↑ «Historia y evolución de los metales» (castellanu). Consultáu'l 2023-04-01.
  7. ↑ Revista "Anales de Arqueología y Etnología", No. 38-40 (Primera parte) 1983, Juan Schobinger: "Algunas observaciones terminológicas sobre la prehistoria americana", Páginas 10-19.
  8. ↑ 8,0 8,1 8,2 Nason, Leonard Herbert (2022). History of the prehistoric ages: written by the ancient historic band of spirits (classic reprint).. Forgotten books. ISBN 0-282-61641-1. OCLC 1355914283
  9. ↑ «Copper: An Ancient Metal | Dartmouth Toxic Metals». Consultáu'l 18 de xineru de 2025.
  10. ↑ 10,0 10,1 Chazan, Michael (2021). World prehistory and archaeology: pathways through time (Fifth edition edición). ISBN 978-1-000-34909-2. OCLC 1198989984.
  11. ↑ «Prehistoric Times [ushistory.org]». Consultáu'l 2023-04-01.
  12. ↑ Sevilla Zamora, Cristina (9 de payares de 2013). Prehistory diagram. https://pt.slideshare.net/KRSTI33/prehistory-diagram. Consultáu'l 18 de xineru de 2025. 
  13. ↑ «Prehistory Timeline». Consultáu'l 18 de xineru de 2025.
  14. ↑ Morris, Neil; Baldanzi, Paola; Göhrmann, Sabine (2004). Die Urgeschichte. ISBN 978-3-7886-1345-7. OCLC 76602030.
  15. ↑ Pohanka, Reinhard (2016). Die Urgeschichte Europas (2. Auflage edición). ISBN 9783865399960. OCLC 1301963996.

Enllaces esternos

editar
Sacáu de «https://ast.wikipedia.org/w/index.php?title=Prehistoria&oldid=4329966»